TITUS
Edda
Part No. 36
Previous part

Song: Grt. 
Strophe: 1 
(GROTTASǪNGR.)


Verse: 1    Nú ero komnar til konungs húsa
Verse: 2    framvísar tvær, Fenia ok Menia;
Verse: 3    þær ro at Fróða, Friðleifs sonar,
Verse: 4    mátcar meyiar, at mani hafðar.

Strophe: 2 
Verse: 1    Þær at lúðri leiddar vóro,
Verse: 2    ok grióz griá gangs of beiddo;
Verse: 3    hét hann hvárigri hvíld né ynði,
Verse: 4    áðr hann heyrði hlióm ambátta.

Strophe: 3 
Verse: 1    Þær þyt þulo þǫgnhorfinnar:
Verse: 2    "leggiom lúðra, léttom steinom!"
Verse: 3    bað hann enn meyiar, at þær mala scyldo.

Strophe: 4 
Verse: 1    Sungo oc slungo snúðgasteini,
Verse: 2    svá at Fróða man flest sofnaði;
Verse: 3    þá qvað þat Menia, var til meldrs komin:

Strophe: 5 
Verse: 1    "Auð mǫlom Fróða. mǫlom alsælan,
Verse: 2    mǫlom fiolð fiár á feginslúðri!
Verse: 3    siti hann á auði, sofi hann á dúni,
Verse: 4    vaki hann at vilia! þá er vel malit.

Strophe: 6 
Verse: 1    Hér scyli engi ǫðrom granda,
Verse: 2    til bǫls búa né til bana orca,
Verse: 3    né hǫggvagi hvǫsso sverði,
Verse: 4    þóat bana bróður bundinn finni."

Strophe: 7 
Verse: 1    Enn hann ecci qvað orð it fyrra:
Verse: 2    "Sofið eigi it né of sal gaucar,
Verse: 3    eða lengr, enn svát lióð eitt qveðac."

Strophe: 8 
Verse: 1    "Vartattu, Fróði, fullspacr of þic,
Verse: 2    málvinr manna, er þú man keyptir;
Verse: 3    kaustu at afli oc at álitom,
Verse: 4    enn at ætterni ecci spurðir.

Strophe: 9 
Verse: 1    Harðr var Hrungnir oc hans faðir,
Verse: 2    þó var Þiazi þeim ǫflgari;
Verse: 3    Iði oc Aurnir, ocrir niðiar,
Verse: 4    broðr bergrisa, þeim erom bornar.

Strophe: 10 
Verse: 1    Komia Grotti ór griá fialli,
Verse: 2    né sá inn harði hallr ór iorðo,
Verse: 3    né moli svá mær bergrisa,
Verse: 4    ef vissi vit vætr til hennar.

Strophe: 11 
Verse: 1    Vér vetr nío vórom leicor,
Verse: 2    ǫflgar, alnar fyr iorð neðan;
Verse: 3    stóðo meyiar at meginvercom,
Verse: 4    forðom siálfar setberg ór stað.

Strophe: 12 
Verse: 1    Veltom grióti of garð risa,
Verse: 2    svá at fold fyrir fór sciálfandi;
Verse: 3    svá sløngðom vit snúðgasteini
Verse: 4    hǫfgahalli, at halir tóco.

Strophe: 13 
Verse: 1    Enn vit síðan á Svíðióðo,
Verse: 2    framvísar tvær, í fólc stigom;
Verse: 3    beittom biorno, enn brutom scioldo,
Verse: 4    gengom í gegnom gráserkiat lið.

Strophe: 14 
Verse: 1    Steypþom stilli, studdom annan,
Verse: 2    veittom góðom Gothormi lið;
Verse: 3    vara kyrrseta, áðr Knúi felli.

Strophe: 15 
Verse: 1    Fram heldom því þau misseri,
Verse: 2    at vit at kǫppom kendar vórom;
Verse: 3    þar scorðo vit scǫrpom geirom
Verse: 4    blóð ór beniom oc brand ruðom.

Strophe: 16 
Verse: 1    Nú erom komnar til konungs húsa,
Verse: 2    miskunnlausar, oc at mani hafðar;
Verse: 3    aurr etr iliar, enn ofan kulði,
Verse: 4    drǫgom dólgs siotul; daprt er at Fróða.

Strophe: 17 
Verse: 1    Hendr scolo hvílaz, hallr standa mun.
Verse: 2    malit hefi ec fyr mic mitt of leiti."
Verse: 3    "Munoma hǫndom hvíld vel gefa,
Verse: 4    áðr fullmalit Fróða þicci.

Strophe: 18 
Verse: 1    Hendr scolo hǫndla harðar triónor,
Verse: 2    vápn valdreyrug, vaki þú, Fróði!
Verse: 3    vaki þú, Fróði, ef þú vill hlýða
Verse: 4    sǫngom ocrom oc sǫgom fornom.

Strophe: 19 
Verse: 1    Eld sé ec brenna fyr austan borg,
Verse: 2    vígspioll vaca, þat mun viti kallaðr;
Verse: 3    mun herr koma hinig af bragði
Verse: 4    oc brenna bo fyr buðlungi.

Strophe: 20 
Verse: 1    Munat þú halda Hleiðrar stóli,
Verse: 2    rauðom hringom né regingrióti.
Verse: 3    Tǫcom á mǫndli, mær, scarpara!
Verse: 4    eroma varmar í valdreyra.

Strophe: 21 
Verse: 1    Mól míns fǫður mær ramliga,
Verse: 2    þvíat hon feigð fira fiolmargra sá;
Verse: 3    stucco stórar støðr frá lúðri,
Verse: 4    iárni varðar, mǫlom enn framarr!

Strophe: 22 
Verse: 1    Mǫlom enn framarr! mun Yrso sonr
Verse: 2    við Hálfdana hefna Fróða;
Verse: 3    sá mun hennar heitinn verða
Verse: 4    burr oc bróðir; vitom báðar þat."

Strophe: 23 
Verse: 1    Mólo meyiar, megins kostoðo,
Verse: 2    óro ungar í iotunmóði;
Verse: 3    sculfo scaptré, scauz lúðr ofan,
Verse: 4    hraut inn hǫfgi hallr sundr í tvau.

Strophe: 24 
Verse: 1    Enn bergrisa brúðr orð um qvað:
Verse: 2    "Malit hǫfom, Fróði, sem munom hætta,
Verse: 3    hafa fullstaðit flióð at meldri."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.