TITUS
Edda
Part No. 38
Previous part

Song: Hild. 
Strophe: 0 
(HILDIBRANDS STERBELIED)


Verse: 1    Oc er Hildibrandr frá þetta, at kappar hans vóro
Verse: 2    drepnir, þá kom á hann bersercsgangr, oc sneriz þegar til
Verse: 3    ferðar oc mælti: "eigi scal þat mælt, at ec hætta mǫnnom
Verse: 4    mínom út, enn þorac eigi siálfr at beriaz." Enn í vanstilli
Verse: 5    þesso, er á hánom var, oc hann var á ferðina kominn, þá
Verse: 6    sá hann son sinn oc drap hann þegar.
Verse: 7    Síðan óc hann upp með ánni Rín til móz við Ásmund.
Verse: 8    Þann sciold hafði hann, er á vóro marcaðir menn svá
Verse: 9    margir, sem hann hafði drepit. Enn er Ásmundr spurði
Verse: 10    þetta, þá bióz hann til móz við Hildibrand. Enn þegar er
Verse: 11    þeir funduz, þá bǫrðuz þeir, oc vóro flest hǫgg orit stór.
Verse: 12    Enn er þeir hǫfðo lengi bariz af mikilli reiði, þá neytti
Verse: 13    Hildibrandr afls, oc hió til Ásmundar af ǫllo afli tveim
Verse: 14    hǫndom. Oc í því, er sverð kom í hiálminn, þá brast þat
Verse: 15    sundr undir hialtino, oc fór brandrinn greniandi niðr
Verse: 16    í ána. Enn hann var þá sárr mǫrgom sárom. Síðan qvað
Verse: 17    hann vísor þessar:

Strophe: 1 
Verse: 1    Mioc er vandgætt, hvé verða scal
Verse: 2    of borinn ǫðrom at banorði;
Verse: 3    þic Drótt of bar af Danmorco,
Verse: 4    enn mic siálfan á Svíðióðo.

Strophe: 2 
Verse: 1    Tveir vóro þeir tyrvir giarnir,
Verse: 2    Buðlanautar, nú er brotinn annarr;
Verse: 3    svá hǫfðo dvergar dauðir smíðat,
Verse: 4    sem engi mun áðr né síðan.

Strophe: 3 
Verse: 1    Stendr mér at hǫfði hlíf in brotna;
Verse: 2    ero þar talðir tigir ins átta
Verse: 3    manna þeira, er ec at morði varð.

Strophe: 4 
Verse: 1    Liggr þar inn svási sonr at hǫfði,
Verse: 2    eptirerfingi, er ec eiga gat;
Verse: 3    óviliandi aldrs syniaðag.

Strophe: 5 
Verse: 1    Bið ec þic, bróðir, bonar einnar,
Verse: 2    einnar bonar, eigi þú synia!
Verse: 3    mic scaltu veria váðom þínom,
Verse: 4    sem fiorsbani fár annars mun.

Strophe: 6 
Verse: 1    Nú verð ec liggia, lífs andvana,
Verse: 2    mæki undaðr, þeim er magnar sár.

Verse: 3    Eptir þat dó Hildibrandr Húna kappi, oc gorði Ásmundr
Verse: 4    virðoliga leizlo hans oc hugði þá illa síno verki.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.