TITUS
Heliand
Part No. 37
Previous part

Chapter: XXXVII 
XXXVII


Verse: 3057    "thu bist the [uuâro]   uualdandes sunu,
Verse: 3058    libbiendes godes,   the thit lioht giscôp,
Verse: 3059    Crist cuning êuuig:   sô uuilliad uui queðen alle,
Verse: 3060    iungaron thîne,   that thu sîs god selƀo,
Verse: 3061    hêleandero bezt."   Thô sprac imu eft is hêrro angegin:
Verse: 3062    "sâlig bist thu Sîmon", quað he, "sunu [Ionases];   ni mahtes thu that selƀo gehuggean,
Verse: 3063    gimarcon an thînun môdgithâhtiun,   ne it ni mahte thi mannes tunge
Verse: 3064    uuordun geuuîsien,   ac dede it thi uualdand selƀo,
Verse: 3065    fader allaro firiho barno,   that thu [sô] forð gisprâki,
Verse: 3066    sô diapo bi drohtin thînen.   [Diurlîco] scalt thu thes lôn antfâhen,
Verse: 3067    hluttro haƀas thu an thînan hêrron gilôƀon,   hugiskefti sind thîne stêne gelîca,
Verse: 3068    sô fast bist thu sô felis the hardo;   hêten sculun [thi] firiho barn
Verse: 3069    sancte Pêter:   oƀar themu [stêne] scal man mînen seli uuirkean,
Verse: 3070    hêlag hûs godes;   thar scal is hîuuiski tô
Verse: 3071    sâlig samnon:   ni mugun uuið them thînun suîðeun [crafte]
Verse: 3072    anthebbien [hellie portun].   Ik fargiƀu thi [himilrîceas slutilas],
Verse: 3073    that thu môst aftar mi   allun [giuualdan]
Verse: 3074    kristinum folke;   kumad alle te thi
Verse: 3075    gumono gêstos;   thu haƀe [grôte] giuuald,
Verse: 3076    huene thu hêr an erðu   eldibarno
Verse: 3077    gebinden uuillies:   themu is bêðiu giduan,
Verse: 3078    himilrîki biloken,   endi hellie sind imu [opana,]
Verse: 3079    brinnandi fiur;   sô huene sô thu eft antbinden uuili,
Verse: 3080    antheftien is hendi,   themu is himilrîki,
Verse: 3081    antloken liohto mêst   endi lîf êuuig,
Verse: 3082    grôni godes uuang.      Mid sulicaru ik thi geƀu uuilliu
Verse: 3083    lônon thînen gilôƀon.   Ni uuilliu ik, that gi thesun liudiun noh,
Verse: 3084    mârien thesaru menigi,   that ik bium mahtig Crist,
Verse: 3085    godes [êgan] barn.   Mi sculun [Iudeon] noh,
Verse: 3086    unsculdigna   erlos binden,
Verse: 3087    uuêgean mi te uundrun   - [dôt mi uuîties filo -]
Verse: 3088    innan Hierusalem   gêres ordun,
Verse: 3089    âhtien mînes aldres   eggiun scarpun,
Verse: 3090    bilôsien mi lîƀu.   Ik an thesumu [liohte] scal
Verse: 3091    thurh ûses drohtines craft   fan dôde astanden
Verse: 3092    [an] thriddiumu dage".   Thô uuarð thegno bezt
Verse: 3093    suîðo an sorgun,   Sîmon Petrus,
Verse: 3094    uuarð imu hugi [hriuuig,]   endi te is hêrron sprak
Verse: 3095    rink an rûnun:   "ni scal that rîki god", quað he,
Verse: 3096    "uualdand uuillien,   that thu eo sulic uuîti mikil
Verse: 3097    githolos undar [thesaru thiod:]   nis thes tharf nigiean,
Verse: 3098    hêlag drohtin."   Thô sprak imu eft is hêrro angegin,
Verse: 3099    mâri mahtig Crist   - uuas imu an is môde hold -:
Verse: 3100    "huat, thu nu uuiðeruuard bist", quað he,   "uuilleon mînes,
Verse: 3101    thegno bezto!   Huat, thu thesaro thiodo [canst]
Verse: 3102    menniscan [sidu:]   thu ni uuêst [the] maht godes,
Verse: 3103    [the] ik gifrummien scal.   Ik mag thi filu seggean
Verse: 3104    uuârun uuordun,   thar [hêr undar thesumu uuerode standad]
Verse: 3105    gesîðos mîne,   thea ni môtun suelten êr,
Verse: 3106    huerƀen an hinenfard   êr sie himiles lioht,
Verse: 3107    godes rîki sehat."   Côs imu [iungarono] thô
Verse: 3108    sân aftar thiu   Sîmon Petrus,
Verse: 3109    Iacob endi Iohannes,   [ea] gumon tuêne,
Verse: 3110    bêðea thea gibrôðer,   endi imu thô uppen thene berg giuuêt
Verse: 3111    sunder mid them gesîðun,   sâlig barn godes,
Verse: 3112    mid them thegnun thrim,   thiodo drohtin,
Verse: 3113    uualdand thesaro uueroldes:   uuelde im thar uundres filu,
Verse: 3114    têcno tôgean,   that sie [gitrûodin] thiu bet,
Verse: 3115    that he selƀo uuas   sunu drohtines,
Verse: 3116    hêlag heƀencuning.   Thô sie [an] hôhan uuall
   
Verse: 3117    stigun stên endi berg,   antat sie te theru stedi quâmun,
Verse: 3118    uueros uuiðer uuolcan,   thar uualdand Krist,
Verse: 3119    cuningo craftigost   gicoren habde,
Verse: 3120    that he is godkundi   iungarun sînun
Verse: 3121    thurh is ênes craft   ôgean uuelde,
Verse: 3122    berhtlîc biliði.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.