TITUS
Heliand
Part No. 48
Previous part

Chapter: XLVIII 
XLVIII


Verse: 3926    Uurðun thô thea liudi   umbi thea lêra Cristes,
Verse: 3927    umbi thiu uuord an geuuinne:   stôdun uulanca man,
Verse: 3928    gêlmôde Iudeon,   sprâkun gelp mikil,
Verse: 3929    habdun it im te hosca,   quaðun that sie mahtin gihôrien uuel,
Verse: 3930    that imu mahlidin fram   môdaga uuihti,
Verse: 3931    unholde ût:   "nu he an [aƀu] lêrid", quâðun sie,
Verse: 3932    "uuordu gehuilicu."   Thô sprak eft that uuerod ôðar:
Verse: 3933    "ni thurƀun gi thene lêriand lahan", quâðun sie:   "kumad lîƀes uuord
Verse: 3934    [mahtig] fan is mûde;   he [uuirkid] manages huat,
Verse: 3935    uundres an thesaru uueroldi:   nis that uurêðaro dâd,
Verse: 3936    fîundo craftes:   nio it than te [sulicaru] frumu [ni uurði,]
Verse: 3937    ac it gegnungo   fan gode alouualdon,
Verse: 3938    kumid fan is crafte.   That mugun gi antkennien uuel
Verse: 3939    an them is uuârun uuordun,   that he giuuald haƀad
Verse: 3940    alles oƀar [erðu]."   Thô uueldun ina the andsacon thar
Verse: 3941    an stedi fâhen   eftha stên ana uuerpen,
Verse: 3942    ef sie im thero manno   menigi ni andrêdin,
Verse: 3943    ni forhtodin that folcskepi.   Thô sprak that friðubarn godes:
Verse: 3944    "ik [tôgiu] iu gôdes sô filu", quað he,   "fan gode selƀumu,
Verse: 3945    uuordo endi uuerko:   nu uuilliad gi mi uuîtnon hêr
Verse: 3946    thurh iuuuan starkan hugi,   stên ana uuerpen,
Verse: 3947    bilôsien mi lîƀu."   Thô sprâkun imu eft thea liudi angegin,
Verse: 3948    uurêða uuiđersakon:   "ne uui it be thînun uuerkun ni duat", [quâðun] [sia,]
Verse: 3949    "that uui thi aldres tô   âhtien uuilliad,
Verse: 3950    ac uui duat it be thînun uuordun,   huand thu sulik uuâh sprikis,
Verse: 3951    *huand thu thic sô mâris   endi sulic mên sagis,
Verse: 3952    gihis for theson Iudeon,   that thu sîs god selƀo,
Verse: 3953    mahtig drohtin,   endi bist thi thoh man sô uui,
Verse: 3954    cuman fan theson cunnie."   Crist alouualdo
Verse: 3955    ne uuolda thero Iudeono thuo leng   gelpes hôrian,
Verse: 3956    uurêðaro uuillion,   ac hie im af them uuîhe fuor
Verse: 3957    oƀar Iordanes strôm;   habda iungron mid im,
Verse: 3958    thia is sâligun gisîðos,   thia im simlon mid im
Verse: 3959    uuillion uuonodun:   suohta uuerod ôðer,
Verse: 3960    deda thar sô hie giuuonoda,   drohtin selƀo,
Verse: 3961    lêrda thia liudi:   gilôƀda thie uuolda
Verse: 3962    an is [hêlagun uuord].   That scolda [sinnon uuel]
Verse: 3963    manno sô huilicon,   sô that an is muod ginam.

Verse: 3964    Thuo gifrang ik that thar te Criste   cumana uurðun
Verse: 3965    bodon fan Bethaniu   endi sagdun them barne godes,
Verse: 3966    that sia an that ârundi tharod   idisi sendin,
Verse: 3967    Maria endi Martha,   magað frîlîca,
Verse: 3968    suîðo uunsama uuîf;   thia uuissa hie bêðia,
Verse: 3969    uuârun im gisuester tuâ,   thia hie selƀo êr
Verse: 3970    minnioda an is muode   thuru iro mildian hugi,
Verse: 3971    thiu uuîf thuru iro uuillion guodan.   [Sia im te uuâron thuo]
Verse: 3972    anbudun fon Bethaniu,   that iro bruoðer uuas
Verse: 3973    Lazarus legarfast   endi that sia is lîƀes ni uuândun;
Verse: 3974    bâdun that tharod quâmi   Crist alouualdo
Verse: 3975    hêlag te helpu.   Reht sô hie sia gihôrda thuo
Verse: 3976    seggian fan sô siecon,   sô sprak hie sân angegin,
Verse: 3977    quað that Lazaruses   legar ni uuâri
Verse: 3978    giduan im te dôðe,   "ac thar scal drohtines lof", quathie,
Verse: 3979    "gifrumid uuerðan:   nis it im te ôðron frêson giduan."
Verse: 3980    Uuas im thar thuo selƀo   suno drohtines
Verse: 3981    tuâ naht endi dagas.   Thiu tîd uuas [thuo genâhit],
Verse: 3982    that hie eft te Hierusalem   Iudeo liudeo
Verse: 3983    uuîson uuelda,   sô hie giuuald habda.

Verse: 3984    Sagda thuo is gisîðon   suno drohtines,
Verse: 3985    that hie eft oƀar [Iordan]   Iudeo liudi
Verse: 3986    suokean uuelda.   Thuo sprâcun im sân angegin
Verse: 3987    iungron sîna:   "te huî [bist] thu sô gern tharod", quaðun sia,
Verse: 3988    "fro mîn, te faranne?   Ni that nu furn ni uuas,
Verse: 3989    that sia thik thînero uuordo   uuîtnon hogdun,
Verse: 3990    uueldun thi mid [stênon starcan auuerpan?   nu thu eft undar thia strîdigun thioda]
Verse: 3991    fundos te faranne,   thar ist fîondo ginuog,
Verse: 3992    erlos oƀarmuoda?"   Thuo [ên thero tueliƀio,]
Verse: 3993    Thuomas gimâlda   - uuas im githungan mann,
Verse: 3994    [diurlîc] drohtines thegan -:   "ne sculun uui im thia dâd lahan", quathie,
Verse: 3995    "ni uuernian uui im thes uuillien,   ac uuita im uuonian mid,
Verse: 3996    thuoloian mid [ûsson] thiodne:   that ist thegnes cust,
Verse: 3997    that hie mid is frâhon samad   fasto gistande,
Verse: 3998    dôie [mid] im thar an duome.   Duan ûs alla sô,
Verse: 3999    folgon im te thero ferdi:   ni lâtan ûse [ferah] uuið thiu
Verse: 4000    uuihtes uuirðig,   neƀa uui an them uuerode mid im,
Verse: 4001    dôian mid ûson drohtine.   Than lêƀot ûs thoh duom after,
Verse: 4002    [guod uuord] for gumon."   Sô uurðun thuo iungron Cristes,
Verse: 4003    erlos aðalborana   an [ênfalden] hugie,
Verse: 4004    hêrren [te] uuillien.   Thuo sagda hêlag Crist
Verse: 4005    selƀo is gisîðon   that aslâpan uuas
Verse: 4006    Lazarus fan them legare,   "haƀit thit lioht ageƀan,
Verse: 4007    ansueƀit ist an selmon.   Nu uui an thena sîð faran
Verse: 4008    endi ina auuekkian,   that hie muoti eft thesa uuerold sehan,
Verse: 4009    libbiandi lioht:   [than] uuirðit iuuua gilôƀo after thiu
Verse: 4010    forðuuerd gifestid."   Thuo giuuêt hie im oƀar thia fluod thanan,
Verse: 4011    thie guodo godes suno,   anthat hie mid is iungron quam
Verse: 4012    thar te Bithaniu,   barn drohtines
Verse: 4013    selƀo mid is gisîðon,   thar thia gisuester tuâ,
Verse: 4014    Maria endi Martha   an muodkaron
Verse: 4015    sêraga sâtun.   Uuas thar gisamnot filo
Verse: 4016    fan Hierusalem   Iudeo liudo,
Verse: 4017    thia thiu    *uuîf uueldun   uuordun fruoƀrean,
Verse: 4018    that sie sô ni [karodin]   kindiungas dôđ,
Verse: 4019    Lazaruses farlust.   Sô thô the landes uuard
Verse: 4020    geng an [thiu] gardos,   sô uurðun thes [godes] barnes
Verse: 4021    kumi thar gikûðid,   that he sô craftig uuas
Verse: 4022    bi theru burg ûten.   Thô im bêðiun uuas,
Verse: 4023    them uuîƀun sulik uuillio,   that sie im uualdand [tô],
Verse: 4024    that friðubarn godes,   farandien uuissun.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.