TITUS
Heliand
Part No. 49
Previous part

Chapter: XLIX 
XLIX


Verse: 4025    Thô them uuîbun uuas   uuilleono mêsta
Verse: 4026    cumi drohtines   endi Cristes uuord
Verse: 4027    te gihôrienne.   Heoƀandi geng
Verse: 4028    Martha [môdkarag]   uuið sô mahtigne
Verse: 4029    uuordun uuehslan   endi uuið uualdand sprak
Verse: 4030    an iro hugi hriuuig:   "thar thu mi, hêrro mîn", quað siu,
Verse: 4031    "neriendero bezt,   nâhor uuâris,
Verse: 4032    hêleand the gôdo,   than ni thorfti ik [nu] sulic harm tholon,
Verse: 4033    bittra breostkara,   than ni uuâri nu mîn brôđer dôd,
Verse: 4034    Lazarus fan thesumu liohte,   ac he [imu mahti] libbien forð
Verse: 4035    ferahes gefullid.   Ik thoh, frô mîn, te thi
Verse: 4036    liohto gilôƀiu,   lêriandero bezt,
Verse: 4037    sô hues sô thu biddien uuili   berhton drohtin,
Verse: 4038    that he it thi sân fargiƀid,   god alomahtig,
Verse: 4039    giuuerðot thînan uuillean."   Thô sprak eft uualdand Krist
Verse: 4040    theru idis [anduuordi:]   "ni lât thu thi an innan thes", quað he,
Verse: 4041    "thînan seƀon suerkan:   ik thi seggian mag
Verse: 4042    uuârun uuordun,   that thes nis giuuand ênig,
Verse: 4043    [neƀu] thîn brôðer scal   thurh gibod godes,
Verse: 4044    thurh drohtines craft   fan dôđe astanden
Verse: 4045    an is lîchamon."   "All hebbiu ik gilôƀon sô", quað siu,
Verse: 4046    "that it sô giuuerðen scal,   sô huan sô thius uuerold endiod
Verse: 4047    endi the mâreo dag   oƀar man ferid,
Verse: 4048    that he than fan erðu scal   up astanden
Verse: 4049    an themu [dômes] daga,   than uuerðad fan dôđe quica
Verse: 4050    thurh maht godes   mankunnies gehuilic,
Verse: 4051    arîsad fan restu."      Thô sagde [rîkeo] Krist
Verse: 4052    theru idis alomahtig   oponun uuordun,
Verse: 4053    that he selƀo uuas   sunu [drohtines],
Verse: 4054    [bêðiu ia lîf ia lioht]   liudio [barnon]
Verse: 4055    te astandanne:   "nio the [sterƀen] ni scal,
Verse: 4056    lîf farliosen,   the hêr gilôƀid te mi:
Verse: 4057    thoh ina eldibarn   erðu bithekkien,
Verse: 4058    diapo bidelƀen,   nis he dôd thiu mêr:
Verse: 4059    that flêsk is bifolhen,   that ferah is gihalden,
Verse: 4060    is thiu siola gisund."   Thô sprak imu eft sân angegin
Verse: 4061    that uuîf mid iro uuordun:   "ik gilôƀiu that thu the uuâro bist", quað siu,
Verse: 4062    "[Krist godes sunu:]   that mag man antkennien uuel,
Verse: 4063    uuiten an thînun uuordun,   that thu giuuald haƀes
Verse: 4064    thurh thiu hêlagon giscapu   himiles endi erðun."
Verse: 4065    Thô gefragn ik that [thar thero idisio quam]   ôðar gangan
Verse: 4066    Maria môdkarag:   gengun iro managa aftar
Verse: 4067    Iudeo [liudi.]   Thô siu themu godes barne
Verse: 4068    sagde sêragmôd,   huat iru te sorgun gistôd
Verse: 4069    an iro hugi harmes:   hofnu kûmde
Verse: 4070    Lazaruses farlust,   liaƀes mannes,
Verse: 4071    griat gornundi,   antat themu godes barne
Verse: 4072    hugi uuarð gihrôrid:   hête trahni
Verse: 4073    uuôpu [auuellun],   endi thô te them uuîƀun sprac,
Verse: 4074    hêt ina thô lêdien,   thar Lazarus uuas
Verse: 4075    [foldu] bifolhen.   Lag thar ên felis bioƀan,
Verse: 4076    hard stên behliden.   Thô hêt the hêlago Crist
Verse: 4077    antlûcan thea [lêia,]   that he môsti that lîk sehan,
Verse: 4078    hrêo scauuoien.   Thô ni mahte [an] iro hugi mîðan
Verse: 4079    [Martha] for theru menegi,   uuið mahtigne sprak:
Verse: 4080    "frô mîn the gôdo", quað siu,   "ef man thene felis nimid,
Verse: 4081    thene stên antlûkid,   than uuâniu ik that thanen stank kume,
Verse: 4082    unsuôti suek,   huand ik thi seggian mag
Verse: 4083    uuârun uuordun,   that thes nis giuuand ênig,
Verse: 4084    [that] he thar nu bifolhen uuas   fiuuuar naht endi dagos
Verse: 4085    an themu erðgraƀe."   Anduuordi gaf
Verse: 4086    uualdand    themu uuîbe:   "huat, [ni] sagde ik thi te uuârun [êr]", quað he,
Verse: 4087    "ef thu gilôƀien uuili,   than nis nu lang te thiu,
Verse: 4088    [that] thu hêr antkennien scalt   craft drohtines,
Verse: 4089    the mikilon maht godes?"   Thô gengun manage tô,
Verse: 4090    afhôƀun harden stên.   Thô sah the hêlago Crist
Verse: 4091    up mid is ôgun,   ôlat sagde
Verse: 4092    themu the these uuerold giscôp,   "thes thu mîn uuord gihôris", [quað he],
Verse: 4093    ["sigidrohtin selƀo;   ik uuêt that thu sô simlun duos,
Verse: 4094    ac ik duom it be thesumu grôton   Iudeono folke,]
Verse: 4095    that sie that te uuârun uuitin,   that thu mi an [these] uuerold [sendes]
Verse: 4096    thesun liudiun te lêrun."   Thô he te Lazaruse hriop
Verse: 4097    starkaru [stemniu]   endi hêt ina [standen up]
Verse: 4098    ia fan themu graƀe gangan.   Thô uuarð the gêst kumen
Verse: 4099    an thene lîchamon:   [he] bigan is liði hrôrien,
Verse: 4100    antuuarp undar themu giuuêdie:   uuas imo [sô] beuunden thô noh,
Verse: 4101    an hrêobeddion bihelid.   Hêt imu helpen thô
Verse: 4102    uualdandeo Krist.   Uueros gengun tô,
Verse: 4103    antuundun that geuuâdi.   [Uuânum] up arês
Verse: 4104    Lazarus te thesumu liohte:   uuas imu is lîf fargeƀen,
Verse: 4105    that he is [aldarlagu]   êgan [môsti],
Verse: 4106    friðu forðuuardes.   Thô fagonadun bêðea,
Verse: 4107    Maria endi Martha:   ni mag that man ôðrumu
Verse: 4108    giseggian te sôðe,   huô thea gesuester tuô
Verse: 4109    [mendiodun] an iro môde.   Maneg uundrode
Verse: 4110    Iudeo liudio,   thô sie ina fan themu graƀe sâhun
Verse: 4111    sîðon gesunden,   thene the êr suht farnam
Verse: 4112    endi sie bidulƀun   diapo undar [erðu]
Verse: 4113    lîƀes lôsen:   thô môste imu libbien forð
Verse: 4114    hêl an hêmun.   Sô mag heƀenkuninges,
Verse: 4115    thiu mikile maht godes   manno gehuilikes
Verse: 4116    ferahe giformon   endi [uuið] fîundo [nîđ]
Verse: 4117    hêlag helpen,   sô huemu sô he is huldi fargiƀid.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.