TITUS
Aegidius Romanus, De regimine principum
Part No. 13
Previous part

Chapter: XIII 
Capitulum XIII:
Sentence: 302    Von warheit


Sentence: 303    Warheit ist eyn dogunt der vorglichnunge des wissens unde der wort.
Sentence: 304    Wenne wer anders saget, wen her weis, ader gebet sich von der warheit von obirflosse.
Sentence: 305    Wer abir das ware loukent, das in der warheit ist, unde mynner bekennet, wen is war ist, der gebet sich von der warheit von gebrechine.
Sentence: 306    Wer aber uß saget die warheit, also als is ist, der volgit der warheit, als das her sich irczeiget warhafftig unde offinbar unde also, als her ist.
Sentence: 307    Is syn aber etczlich, die dar an erren mit obirflossikeit, als das sie sich irczeigen mit worten adder mit werckin grossere, wenne sie syn.
Sentence: 308    Unde die selbin heissin romere.
Sentence: 309    Etczliche neygen sich auch van der der warheit von gebrechin, als das sie von yn selbir sagen etczliche arge ding, der sie doch unschuldig syn, adder vorlouhin etczliche gute ding, die sie an yn haben.
Sentence: 310    Unde die selbin heisset Aristotiles spotter adder vorsmeer.
Sentence: 311    Aber die warheit ist eyn dogunt unde mittelt zcwischin dissen vorgenenten zcwen undogunden, als das sie den rum vordrucket unde die spotterye messiget.
Sentence: 312    Wer nu wil warhafftig syn, der sal die warheit nu nicht von ym louken nach bekennen von ym selbir, sulcher undogunt, der her unschuldig ist.
Sentence: 313    Dach darff her nicht sagin alles, das her an ym selbir weys adder irkennet.
Sentence: 314    Wenne wie wol nymant legin sal, dach ist is nicht not, alleczijt unde yn allen stetin die warheit zcu sagin.
Sentence: 315    Unde also steet die warheit- zcu vorderst weder den rum, als das sichn nymant rume grosser dinge, wen is war ist.
Sentence: 316    Dar nach steet sie weder die spotterye unde vorsmeunge, als das nymant syn selbir spotte adder sich selbir vorsmelicho mache unde sage von ym selbir undogunt, der her unschuldig ist, adder vorlouken des, das war ist.
Sentence: 317    Sint dem mal nu eynem fursten nicht czemit, das her vorsmelich sy adder rumsam, sunder erbar finde warhaftig, so czemit ym wol, das her der warheit fulge unde warhafftig sy unde nicht eyn romer noch eyn spotter.




Next part


This text is part of the TITUS edition of Aegidius Romanus, De regimine principum.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.