TITUS
Aegidius Romanus, De regimine principum
Part No. 32
Previous part

Chapter: XVII 
Capitulum XVII


Sentence: 606    Wie eyn man sal die dochtere regiren, das mag man etczwas nemen us dem, das hie var geseyt ist van den elichin wibin.
Sentence: 607    Wenne als die sullen sin kusch, czuchtig unde messig, also sullen die juncfrauwen auch syn.
Sentence: 608    Sunderlich sal man by den dochtern achtunge habin uff dry ding.
Sentence: 609    Das erste ist, das man yn nicht gestate, umme zcu lauffin, als das sie deste mynner kunnen ubil dun unde das sie da van icht unscheymig werdin ader geil unde unczuchtig.
Sentence: 610    Unde dar umme sulle sie sulche ding vormiden, die yn mochten syn eyn sache, ubil zcu dun.
Sentence: 611    Wenne nu die juncfrauwen vil umme lauffin unde geben sich zcu den luden, so gewonen sie denne der manne, unde die schemde vorgeet, die dach sonderlich die junc frauwen in czocht entheldet.
Sentence: 612    Dar umme sullen die juncfrauwin nicht vil mit den luden umme geen nach sich dar zcu gewenen, so bliben sie by czucht unde by schemde.
Sentence: 613    Czum andern sal man die dochter dar zcu halden, das sie etczwas erbeiten, das yn czemit unde ynl zcu geboret unde mit nicht mussig geen, das yn da van icht unczemeliche gedanckin infallin, wenne des menschin ge danckin wilo nicht mussig syn.
Sentence: 614    Unde dar umme wenne eyn mensche nicht etczwas gutis werckis adder czemelichis gescheftis vorhanden hat, so fellen ym yn unczemeliche gedanckin unde bekummernisse.
Sentence: 615    Die werck, die den juncfrauwen czemen , syn nehen, spynnen, wircken unde mit syden umme geen unde des glich.
Sentence: 616    Czum dritten mal sal man die dochtere dar zcu halden, daz sie stille syn unde wenig redin, das stet yn wol an, wenne die stillikeit ist eyn czerunge der juncfrauwin, als Aristotiles spricht primo politicorum.
Sentence: 617    Dar umme sal man sie van jogunt uff dar zcu halden, das sie stille syn, also das sie icht dorlich adder unczuchticlich reden.
Sentence: 618    Wenne wer dorlich wort, vor myden wil, der rede nicht vil unde bedencke vor, waz her reden wil.





Next part


This text is part of the TITUS edition of Aegidius Romanus, De regimine principum.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.