TITUS
Aegidius Romanus, De regimine principum
Part No. 40
Previous part

Chapter: IV 
Capitulum IV


Sentence: 745    Us dissen vorgeschriben leren mag man czehin, wie gar scheidelich is ist, das eyn furste die synen nicht in gutikeit unde gerechtikeit regiret unde vorweset, sunder yn ungutec unde mit unrechtem getwange, wenne die underdanen werden ym gram unde stellen ym in vil sachin.
Sentence: 746    Daz ist eynem fursten gar scheidelich unde unsicher.
Sentence: 747    Dar umme sal eyn furstee gedencken, wie her sin volk in sulcher gutikeit under rechfertikeyt vorstehe unde flißg unde achtunge uff sie habeh, so habin sie yni lib.
Sentence: 748    Das ist ym gar nucze unde ist ym auch lustig unde sicher.
Sentence: 749    Aber das eyn furste keyne achtunge uff die synen hat, als das her sich mus besorgen vor yn, das sie yn hassin unde ym gram syn, das ist gar bedrublich unde scheidelich dar zcu.
Sentence: 750    Das die underdanen eynen fursten lib habin unde yn auch fochten unde vor ougen habin, gehorn dry ding.
Sentence: 751    Das erste ist, das her sy woltetig.
Sentence: 752    Da van ist var gesayt.
Sentence: 753    Das andere, das her sy feste unde stargmutig, als das her sich selbir secze vor eynen gemeynen nucze unde beschirmunge des landis unde der lude, wenne is not dut.
Sentence: 754    Wenne eynen sulchin fursten hat das volk zcu male lib, wenne sie setczen ire hoffenunge unde drost uff yn.
Sentence: 755    Das dritte ist, dasp sie glich unde gerecht syn, wenne eynem sulchen fursten, der glich, gerecht unde gutig ist, hat das volk lib, abir eynem ungerechtin, ungutigen fursten ist is gram.
Sentence: 756    Dach sal eyn furste also gutig nicht sin, das her obildeters unde bose ludet nicht wolle straffen adder pynigen, wenne das sal heru mit nicht laßen, so halden yn die synen in grosser wirden unde fochten.
Sentence: 757    In der selbin straffunge sin dry ding zcu merekin.
Sentence: 758    Das erste ist die pyne adder straffunge.
Sentence: 759    Wenne wo eyner swerlicher unde groslicher hat obirdretin unde missetan, da sal her yn auch hertlichery umme straffin.
Sentence: 760    Das ander ist, daz der furste nicht sal an sehen die person des obirdreter adder obildetir, wenne eyn gerechter furste sal durch die gerechtikeit keynis obildeters schonen, wenne is sal nymant von guten wercken unde van der gerechtikeit dretin weder umme vater nach umme muter nach umme keynen mag adder frunt nach umme keyne ander ding.
Sentence: 761    Wenne das die underdanen sehen, das der furste gerechte ist, so fochtit eyn iezlicher, obil zcu dun, unde czuhet sich van argen dingen.
Sentence: 762    Also wirt der furste gefochtit unde auch gewirdiget van den synen.
Sentence: 763    Czum dritten mal sal man an sehen die wise der pyne adder der straffunge.
Sentence: 764    Unde das gescheit denne, wan eyn furste synen richteten unde ammecht mannen ernstlich befelit unde sie heißet, das sie in sulchin straffungen der obildeter nicht loße syn, sunder dun, was recht ist.
Sentence: 765    Wie wol aber eynem fursten not ist, das yn die synen lib habin unde auch fochten, dach sal her dar nach mer stehen, daz man yn lib habe, wan das man yn fochte.
Sentence: 766    Wenne hijr vor ist gesagit, das eyn furste zcu forderst sal dar uff denkken, das her syne lude leyde zcu dogunden.
Sentence: 767    Wenne nu burger unde die andern, die in dem furstethum sin, nach dogunt stehin unde behalden die gesecze unde die gebot des fursten durch liebe, die sie habin zcu erlichen dingen, zcu eynem gemeynen nucze unde zcu dem fursten, so sin sie dar umme meher zcu loben, wenne ab sie is deten durch die fochte der pyn.
Sentence: 768    Dach mus man etczliche mit der hebe haldin zcu goten dingen unde etczliche mit getwange unde mit fochte haldin van bosen dingen.





Next part


This text is part of the TITUS edition of Aegidius Romanus, De regimine principum.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.