TITUS
Ulrich von Eschenbach, Alexander
Part No. 2
Previous part

Chapter: 1  
Über Philip


Verse: 173       Eʒ was in Kriechen lande
Verse: 174    (Philip man in nande)

Verse: 175    ein rîcher künec von hôher art.
Verse: 176    sîn lîp, sîn guot was ungespart

Verse: 177    wa er eʒ erzeigen solde.
Verse: 178    eʒ streich nâch sînem solde

Verse: 179    liute vil, die er beriet,
Verse: 180    die sîn milte von kummer schiet.

Verse: 181    er lebte hêrlîche:
Verse: 182    sîn gelt der was rîche,

Verse: 183    sîn habe was gemeine,
Verse: 184    ern wolde niht aleine

Verse: 185    sîn guot verzern.
Verse: 186    er kunde sich wol schanden wern,

Verse: 187    der was der hêrre gar ein gast.
Verse: 188    er truoc der ganzen wirde last.

Verse: 189    er wære ritter oder kneht,
Verse: 190    wan er kam, er was im reht.

Verse: 191    nâch hôher wirde sîn ellen strebt.
Verse: 192    nû het der hêrre gelebt

Verse: 193    mit sîner vrouwen manic jâr
Verse: 194    daʒ sie niht kindes gebar,

Verse: 195    daʒ man dâ heiʒet ein suon
Verse: 196    daʒ begunde dem hêrren wê tuon.

Verse: 197    er was dar umbe dicke unfrô.
Verse: 198    der fürste gedâhte alsô,

Verse: 199    ob er verschiede ân erben,
Verse: 200    daʒ sîn müeste verterben

Verse: 201    lant liute und sîn wîp,
Verse: 202    die was im liep alsam der lîp.

Verse: 203    daʒ kunde sie wol verschulden.
Verse: 204    sie lebte nâch sînen hulden

Verse: 205    und minnet in sô sêre,
Verse: 206    ob ie dehein frouwe mêre

Verse: 207    gewan einen liebern man,
Verse: 208    daʒ wolt sie âne nît lân.

Verse: 209    sie was kiusch und wol gezogen,
Verse: 210    an wîplîchen siten niht betrogen,

Verse: 211    von hôher fürsten art geborn.
Verse: 212    die frouwe was dâ für erkorn

Verse: 213    daʒ sie die schœnste wære
Verse: 214    (die âventiur sagt uns die mære)

Verse: 215    die man bî irn zîten vant.
Verse: 216    Olimpiades was sie genant.

Verse: 217    zuo ir schœne hete sie tugent.
Verse: 218    sich vleiʒ ouch ir süeʒe jugent

Verse: 219    an swaʒ ze guote tohte:
Verse: 220    swâ sie daʒ gevüegen mohte,

Verse: 221    ungerne hete sie eʒ vermiten.
Verse: 222    sie kunde wol mit guoten siten

Verse: 223    sô gen den gebâren
Verse: 224    die ir diener wâren,

Verse: 225    daʒ sie ir gunden guotes wol.
Verse: 226    ir herze was ganzer tugende vol.

Verse: 227    wie sie ein heidnîn sî gewesen,
Verse: 228    ich hoffe daʒ sie sî genesen

Verse: 229    von ir triuwe, der sie was rîche,
Verse: 230    mit Âdam in himelrîche.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.