TITUS
Ulrich von Eschenbach, Alexander
Part No. 3
Previous part

Chapter: 2  
Neptânabus flieht nach Makedonien


Verse: 231       Nû was eʒ alsô komen
Verse: 232    (als ich die rede hân vernomen

Verse: 233    und an dem buoche vant geschriben)
Verse: 234    daʒ von Êgypten wart vertriben

Verse: 235    ein künec der hieʒ Neptânabus.
Verse: 236    dem gefuogt eʒ sich alsus,

Verse: 237    daʒ sîn wesen dâ niht tohte
Verse: 238    und dâ niht belîben mohte.

Verse: 239    sîn herze in alsô lêrte
Verse: 240    gen Kriechen lande er kêrte.

Verse: 241    dô des landes hêrre hete vernomen
Verse: 242    des vertriben küneges komen,

Verse: 243    sîn wirde in dar zuo brâhte
Verse: 244    daʒ er alsô gedâhte

Verse: 245    (er wolde sich dar an bewarn
Verse: 246    daʒ er iht kunde missevarn)

Verse: 247    wie er den fürsten wolde enphân,
Verse: 248    daʒ er sîn êre mohte hân.

Verse: 249    der künec Philip niht vermeit,
Verse: 250    an des ellenden herberge er reit.

Verse: 251    dô der gast daʒ vernam
Verse: 252    daʒ der fürste zuo im kam,

Verse: 253    ein teil er im widersaʒ,
Verse: 254    wenn er vorhte daʒ

Verse: 255    sîn schade solt sich mêren.
Verse: 256    er sprach 'wil mir: nû kêren

Verse: 257    dirre fürste ze dem ergsten teile,
Verse: 258    sô bin ich zuo unheile

Verse: 259    in diz lant komen her.
Verse: 260    waʒ ob lîhte daʒ er

Verse: 261    durch zuht des geruochet,
Verse: 262    daʒ er mich nâch güete suochet?'

Verse: 263       Dô der künec an sîn herberge kam,
Verse: 264    der gast die zuht an sich nam

Verse: 265    daʒ er im engegen gienc.
Verse: 266    der wirt in lieplîche entphienc.

Verse: 267    Neptânabus im des genâde bôt.
Verse: 268    er sprach hêrre, diz ist âne nôt.

Verse: 269    wann ir eʒ het geboten mir,
Verse: 270    hêrre, ich wær iu komen schier

Verse: 271    war ir mir hetet bescheiden.'
Verse: 272    nû wart dô von in beiden

Verse: 273    friuntlicher rede vil getan.
Verse: 274    die wil ich underwegen lân.

Verse: 275       Der wirt ân alle schande
Verse: 276    behielt den gast in sîme lande

Verse: 277    wol nâch künges rehte.
Verse: 278    er hieʒ ritter unde knehte

Verse: 279    daʒ sie sîn næmen mit flîʒe war.
Verse: 280    jâ kunde der edle künic clâr

Verse: 281    alleʒ daʒ bedenken wol
Verse: 282    waʒ fromer wirt bedenken sol.

Verse: 283    der werde fürste von Macedô
Verse: 284    was mit sîme gaste frô.

Verse: 285    Macedoniâ ist Kriechen landes ein teil.
Verse: 286    got gebe dem guoten manne heil,

Verse: 287    der mit willigem muot
Verse: 288    ze aller zît daʒ beste tuot,

Verse: 289    und der alsô gewirbet,
Verse: 290    so im der lîp erstirbet

Verse: 291    daʒ nâch im ân alle scham
Verse: 292    wandels vrî lebt sîn nam.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.