TITUS
Ulrich von Eschenbach, Alexander
Part No. 4
Previous part

Chapter: 7  
Neptânabus täuscht Olimpiadis


Verse: 293       Dô der gast sô lange dâ bleip,
Verse: 294    gemach und fröide im sorge vertreip.

Verse: 295    der frouwen güete und ir tugent,
Verse: 296    ir schœne, ir wunneclîche jugent

Verse: 297    begunde in sêre twingen.
Verse: 298    er jach im müeste gelingen

Verse: 299    an der frouwen oder er wære tôt
Verse: 300    ir minne in brâht in grôʒe nôt.

Verse: 301    vrou Amor was dâ niht laʒ.
Verse: 302    sie twanc des hêrren herze daʒ

Verse: 303    er umb ir minne sîn leben
Verse: 304    williclîchen wolde geben,

Verse: 305    mohteʒ anders niht gewesen.
Verse: 306    in dûhte er solde niht genesen,

Verse: 307    im wær ouch daʒ leben unmære,
Verse: 308    ob er ir minne enbære.

Verse: 309    in brâht die minne dar zuo
Verse: 310    daʒ er spâte unde fruo

Verse: 311    der clâren niht moht vergeʒʒen.
Verse: 312    alsô hete in beseʒʒen

Verse: 313    mit ir süeʒen minne
Verse: 314    die edle küniginne.

Verse: 315    frou Minne ist doch wunderlich
Verse: 316    daʒ sie niht versinnet sich

Verse: 317    sie enkunne werden man
Verse: 318    mit irm gewalt bringen dar an,

Verse: 319    daʒ er sinne verphligt
Verse: 320    unde gar sich bewigt

Verse: 321    êren guotes unde lîbes
Verse: 322    durch minne fremdes wîbes.

Verse: 323       Waʒ sol ich dâ von sprechen mê?
Verse: 324    mir ist ouch selben ê

Verse: 325    liep unde leide
Verse: 326    die zwei beide

Verse: 327    von der minne worden kunt.
Verse: 328    sie het mich alsô sêre verwunt

Verse: 329    und gevangen ûf den lîp,
Verse: 330    wan daʒ mich ein sælic wîp

Verse: 331    mit minneclîchem trôste
Verse: 332    von senender nôt erlôste.

Verse: 333    die eine hât an mir getân
Verse: 334    daʒ alle frouwen müeʒen hân

Verse: 335    mîn dienst mîn lop vil bereit.
Verse: 336    mir ist ir aller swære leit.

Verse: 337    wer niht enweiʒ waʒ minne sî,
Verse: 338    der ist grôʒer sorgen frî.

Verse: 339    minne kan gewalten
Verse: 340    an jungen und an alten,

Verse: 341    ir kan nieman wider gesîn,
Verse: 342    eʒ sî künec oder künegîn.

Verse: 343    wen sie gesliuʒet in ir bant,
Verse: 344    grôʒer swære sie den gemant.

Verse: 345    eʒ sî wîp oder man,
Verse: 346    wem Amor gesiget an,

Verse: 347    der darf niht sorgen mêre,
Verse: 348    swen sie mit minnen gêre

Verse: 349    in sîn herze schiuʒet
Verse: 350    und mit gewalt besliuʒet.

Verse: 351       Alsô het sie disem man,
Verse: 352    den ich ê genennet hân,

Verse: 353    sîn herze mit kraft durchgangen
Verse: 354    und in ir bant bevangen,

Verse: 355    daʒ er niuwan trahte
Verse: 356    wie er daʒ geahte,

Verse: 357    daʒ er sîn dinc an vienge
Verse: 358    daʒ sîn wille an ir ergienge.

Verse: 359    beide naht unde tac
Verse: 360    niht wan gedanke er phlac,

Verse: 361    waʒ im dar zuo tohte
Verse: 362    unde wie er mohte

Verse: 363    die frouwen an gekêren,
Verse: 364    daʒ eʒ ergienge nâch êren.

Verse: 365    'ist daʒ nû daʒ ich sie bite,
Verse: 366    jâ hât sie alsô kiusche site

Verse: 367    ir ist ouch sô liep ir man,
Verse: 368    daʒ sie ims niht verswîgen kan,

Verse: 369    sô bin ich der verlorne
Verse: 370    schier von sîme zorne.

Verse: 371    Er hât mir êren vil erboten:
Verse: 372    des dank ich im und ouch den goten,

Verse: 373    die ze helfe mir des gedâhten
Verse: 374    daʒ sie mich her brâhten.

Verse: 375    zwâr mir wære geschehen wol,
Verse: 376    wan daʒ ich grôʒen kumber dol

Verse: 377    durch diz minniclîche wîp,
Verse: 378    die nû quelet mînen lîp.

Verse: 379    ôwê mir vröudelôser man,
Verse: 380    wie sol ich daʒ gevâhen an

Verse: 381    daʒ mir sô engestlîchen stât
Verse: 382    und michʒ ir minne doch niht erlât ?

Verse: 383    ich enweiʒ waʒ ich armer tuo,
Verse: 384    ichn bite der gote helfe dar zuo.

Verse: 385    ei Kâûn, mîn werder got,
Verse: 386    du maht mir wol helfen von der nôt.

Verse: 387    Apollo unde Tervigant
Verse: 388    die sîn ouch dar umbe gemant.

Verse: 389    mich sol der heilege Mahmet
Verse: 390    wol erhœren an mîme gebet.

Verse: 391    waʒ mê werder gote sî,
Verse: 392    der helfe muoʒ mir wesen bî.

Verse: 393    Vênus die gotinne
Verse: 394    die kêre gegen mir ir sinne

Verse: 395    und füege daʒ an ir ergê
Verse: 396    mîn wille, wie eʒ dar nâch gestê.'

Verse: 397       Nû moht er eʒ lenger niht gesparn,
Verse: 398    an der guoten er wolt ervarn

Verse: 399    ob er eʒ erwerben kunde
Verse: 400    daʒ er genâde an ir funde.

Verse: 401    nû het sich gefüeget daʒ alsô
Verse: 402    daz der alte von Macedô

Verse: 403    nâch sîner gewonheit
Verse: 404    sîn lant beschowende reit.

Verse: 405    dem ie valsches gebrast
Verse: 406    der frowen dem gesinde bevalh den gast.

Verse: 407    sîn wirdikeit im daz riet.
Verse: 408    mit fröiden er von der frouwen schiet,

Verse: 409    gegen sînen vînden kêrter dô.
Verse: 410    sîner ûʒvart wart der trûrege frô.

Verse: 411    sîn swære begunde ringen.
Verse: 412    er hofte im solde gelingen.

Verse: 413    er tet als er wol kunde:
Verse: 414    schrîben er begunde

Verse: 415    einen brief gap er ir in die hant.
Verse: 416    dar an sie geschriben vant

Verse: 417    als im was ze muote.
Verse: 418    dô die reine die guote

Verse: 419    den brief an gesach,
Verse: 420    die schrift ir dirre worte verjach.

Verse: 421       'Frouwe mîn, ich bite dich
Verse: 422    durch dîne zuht erhœre mich.

Verse: 423    ich tuo dir kunt mit senender klage
Verse: 424    den kummer, den ich alle tage

Verse: 425    hân nâch dîner minne.
Verse: 426    süeʒe küniginne,

Verse: 427    du wîplîcheʒ wîp,
Verse: 428    trœste mînen senenden lîp.

Verse: 429    dîn schœne an mir hât gesiget.
Verse: 430    mîn herze verkastet liget

Verse: 431    nâch dir in ganzen sorgen.
Verse: 432    geruoche mir fröude borgen

Verse: 433    und lâ mir trûren swinden.
Verse: 434    wilt du, sô mac ich vinden

Verse: 435    hôhen muot, den ich habe verlorn.
Verse: 436    für lachen ich siufzen habe erkorn.

Verse: 437    des tôdes kan ich mich niht erwern,
Verse: 438    mich welle dîn wîplich güete nern.

Verse: 439    sît ich dich, frouwe, alrêst an sach,
Verse: 440    sô hân ich grôʒ ungemach

Verse: 441    von dîner schœne gedolt.
Verse: 442    süeʒeʒ wîp, nû bis mir holt.

Verse: 443    erzeige an mir den guoten site,
Verse: 444    des man giht der volge mite

Verse: 445    tugenthaften wîben.
Verse: 446    lâ mich frô belîben.

Verse: 447    du maht mir fügen beide
Verse: 448    liep unde leide,

Verse: 449    du maht mich bringen in den tôt:
Verse: 450    wilt du, du hilfest mir ûʒ nôt,

Verse: 451    in dînen gnâden sô bin ich.
Verse: 452    ô werder lîp, nû trœste mich.

Verse: 453    ich wil dir immer sîn bereit
Verse: 454    dienstes unde stætikeit:

Verse: 455    des gib ich dir mîn triuwe.
Verse: 456    unwendic ist mîn riuwe,

Verse: 457    wilt du, frouwe, aleine.
Verse: 458    du bist die ich meine

Verse: 459    in mîme herzen immer.
Verse: 460    von dir kom ich nimmer.

Verse: 461    ich wil alhie ersterben
Verse: 462    oder ich muoʒ erwerben

Verse: 463    dîner süeʒen minne lôn,
Verse: 464    dô enlâʒ ich niht von.

Verse: 465    frouwe, mîner sælden hort,
Verse: 466    ich bite dich daʒ du mîne wort

Verse: 467    rehte wellest verstên,
Verse: 468    du lâʒ sie in dîn herze gên.

Verse: 469    lâ dîn güete an mir erblüen.
Verse: 470    reine fruht, dich sol niht müen

Verse: 471    daʒ ich sô vil wider dich
Verse: 472    gereden tar: gewere mich.

Verse: 473    dich dunket der rede lîhte ze vil,
Verse: 474    du hâst, frouwe, waʒ ich wil

Verse: 475    und treist des mîn herze gert:
Verse: 476    würd ich des von dir gewert

Verse: 477    sô bin ich tôdes frî genesen
Verse: 478    und muoʒ in fröiden immer wesen.'

Verse: 479       Dô die künigîn gelas
Verse: 480    als vor ir geschriben was,

Verse: 481    ir kiusche herze sêre erschrac.
Verse: 482    sie sprach 'nieman enmac

Verse: 483    guoteʒ verdienen umb den man,
Verse: 484    der ganze triuwe nie gewan.

Verse: 485    waʒ man im ze êren tuot
Verse: 486    daʒ wær gelâʒen alsô guot

Verse: 487    niht anders ist sîn widergelt,
Verse: 488    wan der ûf ein bœseʒ velt

Verse: 489    guoten sâmen rêret,
Verse: 490    daʒ im niht wider kêret

Verse: 491    niuwan distel unde dorn.
Verse: 492    eʒ ist zwâre gar verlorn

Verse: 493    swaʒ dem bœsen guotes geschiht:
Verse: 494    ern hât guotes lônes niht.

Verse: 495    wâ solt ein bœser guoteʒ nemen ?
Verse: 496    wie mohte sîn herze des gezemen?

Verse: 497    eʒ hât mîn vil werder man
Verse: 498    disem ungetriuwen vil getân

Verse: 499    liebes und erboten michel êre,
Verse: 500    nû trahtet er sêre

Verse: 501    wie er daʒ kunne erdenken
Verse: 502    daʒ er in muge gekrenken,

Verse: 503    den werden, den guoten,
Verse: 504    den süeʒen wol gemuoten.

Verse: 505    zwâr wie grâ man in siht,
Verse: 506    er sol des engelten niht.

Verse: 507    ich wil gen valsche den laʒʒen
Verse: 508    nimmer dar umbe gehaʒʒen,

Verse: 509    den tugentlîchen alten,
Verse: 510    den reinen einvalten.

Verse: 511    mich fröwet noch mê sîn alte tagent
Verse: 512    dan eines jungen swache jugent.

Verse: 513    sîn triuwe ist gegen mir sô stæte,
Verse: 514    ê daʒ ich des iht tæte

Verse: 515    daʒ wære wider sîn gebot,
Verse: 516    ich wolt ê kiesen den tôt:

Verse: 517    ob sîn halt niht enwære,
Verse: 518    dannoch ich wol enpære

Verse: 519    sus getâner dinge.
Verse: 520    got gebe daʒ im gelinge,

Verse: 521    dem vil trût gesellen mîn;
Verse: 522    er sol des gar âne sorge sîn.'

Verse: 523       Dar nâch saʒ die guote
Verse: 524    in trûrigem muote,

Verse: 525    waʒ sie tuon wolde.
Verse: 526    ob sie eʒ solde

Verse: 527    irn hêrren wiʒʒen lân ?
Verse: 528    sie jach eʒ wære missetân ?

Verse: 529    sie vorht daʒ er den lîp verlür,
Verse: 530    dâ von sie schand und schaden kür.

Verse: 531    die clâre des niht enlieʒ,
Verse: 532    einen boten sie hieʒ

Verse: 533    nâch im gâhen in die stat,
Verse: 534    der in vür sie komen bat.

Verse: 535    dô der bote zuo im kam
Verse: 536    und er sîne rede vernam,

Verse: 537    der hêrre was der rede frô.
Verse: 538    niht ensûmet er sich dô,

Verse: 539    er huop sich des endes dar.
Verse: 540    er wânde daʒ gar

Verse: 541    sîn dinc wære geschaffet:
Verse: 542    nein, er was geaffet.

Verse: 543    dô er vür die vrouwen gienc
Verse: 544    zühticlich sie in enphienc.

Verse: 545    wie sie im wære gehaʒ,
Verse: 546    dar umbe sie doch niht vergaʒ

Verse: 547    wîplîcher gebære.
Verse: 548    uns sagt von ir diz mære,

Verse: 549    sie hieʒ in zuo ir sitzen.
Verse: 550    die süeʒe kunde mit witzen

Verse: 551    und mit guoten sinnen
Verse: 552    ir worte wol beginnen.

Verse: 553    sie sprach 'sagt mir, hêrre guot,
Verse: 554    wâ nâment ir sô unwîsen muot,

Verse: 555    daʒ ir des schaden werben wolt,
Verse: 556    der iu ist von herzen holt?

Verse: 557    mîn hêrre und ouch mîn werder man
Verse: 558    hât iu êren vil getân:

Verse: 559    sol er des engelten,
Verse: 560    daʒ ist doch vil selten

Verse: 561    von getriuwem man geschehen.
Verse: 562    ich hân alsô hœren jehen,

Verse: 563    daʒ man guot mit guote lônen sol.
Verse: 564    daʒ zimt getriuwen herzen wol.

Verse: 565    ir solt michs, hêrre, erlâʒen,
Verse: 566    solicher rede gegen mir mâʒen,

Verse: 567    und stünd eʒ mir niht übel an,
Verse: 568    zwâr ich sagt eʒ mînem man.

Verse: 569    den weiʒ ich von dem muote,
Verse: 570    daʒ eʒ iu ze keime guote

Verse: 571    nimmer ûʒ gegienge,
Verse: 572    swie erʒ an gevienge.

Verse: 573    ir sult die rede lâʒen varn.
Verse: 574    got sol mich dâ vor bewarn,

Verse: 575    daʒ ich des iht gedenke
Verse: 576    dâ von sich mîn êre krenke.

Verse: 577    lâʒet iuwern tumben muot
Verse: 578    geloubent, hêrre, eʒ ist iu guot.'

Verse: 579       Neptânabus sêre erkam,
Verse: 580    dô er die rede alsô vernam.

Verse: 581    er sprach 'neinâ, sælic wîp,
Verse: 582    lâ mich guot unde lîp,

Verse: 583    frouwe, in dîn genâde geben,
Verse: 584    hilf mir daʒ ich müeʒe leben.

Verse: 585    hân ich dîner hulde niht,
Verse: 586    sô enruoch ich waʒ mir geschiht;

Verse: 587    sol ich dîner minne enbern
Verse: 588    sô wil ich niuwan tôdes gern.'

Verse: 589       Dô wart der frouwen güete
Verse: 590    verkêret in ungemüete.

Verse: 591    zorniclîche sie sprach
Verse: 592    'ôwê daʒ eʒ mir ie geschach

Verse: 593    daʒ mich dirre ungetriuwe man
Verse: 594    solicher rede niht wil erlân.

Verse: 595    lâʒent noch die rede sîn,
Verse: 596    ir behert mich niht der êren mîn.

Verse: 597    ich wil mit werden wîben
Verse: 598    in irme lobe belîben.

Verse: 599    ir mugt mich niht betœren.
Verse: 600    ich wil iuch nie mê hœren.

Verse: 601    kunt ir vor tumpheit iuch bewarn,
Verse: 602    sô lâʒent soliche rede varn:

Verse: 603    entriuwen wolt ir niht gedagen,
Verse: 604    ich beginn eʒ mîme hêrren clagen.'

Verse: 605       Neptânabus hôrt ir stætikeit.
Verse: 606    er sprach 'frouwe, eʒ ist mir leit,

Verse: 607    hân ich gegen iu iht missetân.
Verse: 608    mich hât betrogen ein bœser wân.

Verse: 609    zürnent niht sô sêre,
Verse: 610    ich gedenke es nimmer mêre.

Verse: 611    frouwe, lât eʒ âne haʒ.
Verse: 612    ich wil iu geloben daʒ

Verse: 613    ich eʒ hie schiere rûme.
Verse: 614    niht lenger ich daʒ sûme.

Verse: 615    ich muoʒ aber immer lîden nôt
Verse: 616    nâch iuwer minne an mînen tôt.'

Verse: 617    die frowe nam daʒ gelübde sân.
Verse: 618    waʒ solt tuon der ellende man,

Verse: 619    ern redete nâch irm willen
Verse: 620    wie er sie mohte gestillen?

Verse: 621    dâ mit er von der guoten schiet.
Verse: 622    sîn senendeʒ herʒe im dannoch riet

Verse: 623    daʒ er dâ von niht enlieʒ.
Verse: 624    einen trôst er im gehieʒ.

Verse: 625       Eʒ kunde der êren rouber
Verse: 626    ein teil liste von zouber.

Verse: 627    vil künste von nigromancî
Verse: 628    wonten dem hêrren bî,

Verse: 629    die er zehant ane vienc
Verse: 630    und stæte dâ mit umbegienc,

Verse: 631    unz daʒ er an der frouwen
Verse: 632    sînen willen mohte schouwen.

Verse: 633    vor sînen zouberlisten
Verse: 634    kunde sie sich niht gevristen.

Verse: 635    mit zouberlîchen sachen
Verse: 636    macht er sich ze eime trachen:

Verse: 637    als in die küniginne sach
Verse: 638    in irm slâfe. sît (eʒ geschach

Verse: 639    aber von zoubers gewalt)
Verse: 640    kam er in der selben gestalt

Verse: 641    dô die küniginne saʒ
Verse: 642    mit dem künege unde aʒ.

Verse: 643    er brâhte an der stunde
Verse: 644    einen brief in sînem munde.

Verse: 645    daʒ houbt leit er in ir schôʒ,
Verse: 646    des durch vorhte verdrôʒ

Verse: 647    daʒ vil minneclîche wîp.
Verse: 648    er druct eʒ vaste an ir lîp.

Verse: 649    dar nâch als er von danne gie,
Verse: 650    den brief er der vrouwen lie,

Verse: 651    den sie gar heimelîche nam.
Verse: 652    dâ der trache danne kam,

Verse: 653    der künec sprach ze der künegîn
Verse: 654    'frouwe guot, waʒ mac diz sîn?

Verse: 655    dô ich hielt den næsten strît,
Verse: 656    der trache mir half an aller sît.'

Verse: 657    die fürstinne dem fürsten dô verjach
Verse: 658    'hînt ich in in dem slâfe sach.

Verse: 659    mich dûhte er spræche wider mich
Verse: 660    vil rede, der hân vergeʒʒen ich.

Verse: 661    ja enweiʒ ich waʒ eʒ meinet
Verse: 662    oder waʒ eʒ uns bescheinet.'

Verse: 663    dô sprach der künic hôchgemuot
Verse: 664    'eʒ sol uns vüegen alleʒ guot.'

Verse: 665    dô sprach die küniginne clâr
Verse: 666    'hêrre, daʒ müeʒe werden war.'

Verse: 667       Die küniginne rîche
Verse: 668    den brief gar heimelîche

Verse: 669    nâch dem künige besach,
Verse: 670    der ir vremder mære jach.

Verse: 671    'ich bin ein brief und ein bote
Verse: 672    von Jovî, dem hœhsten gote.

Verse: 673    daʒ ist sînes herzen ger
Verse: 674    daʒ dîn schœne minne in wer.

Verse: 675    er sol dînen werden lîp
Verse: 676    umbevâhen, sælic wîp,

Verse: 677    mit minneclîcher liebe craft.
Verse: 678    daʒ haben die gote alsô geschaft,

Verse: 679    dich mac dâ minne wol gezemen.
Verse: 680    du solt fruht von im nemen.'

Verse: 681    nû verstê ich mich alsô,
Verse: 682    die künigîn wær der rede vrô

Verse: 683    durch die seltsæne,
Verse: 684    ale ich rehte wæne.

Verse: 685    dô twanc frouwe Minne
Verse: 686    der küniginne sinne

Verse: 687    und ir gemüete in fremde ger
Verse: 688    gegen dem gote Jupiter.

Verse: 689       Dô der künic von hûse reit
Verse: 690    in die lant nâch gewonheit,

Verse: 691    des êrsten nahtes dô sie lac
Verse: 692    an irm gemache und slâfes phlac,

Verse: 693    wie besloʒʒen was die tür,
Verse: 694    der frouwen kam der trache vür.

Verse: 695    dô dûhte die küniginne
Verse: 696    in slâfendem sinne

Verse: 697    wie sie dâ minne næme,
Verse: 698    die ir eben kæme.

Verse: 699    ale diz vernam der êren diep
Verse: 700    daʒ in die frouwe hæte liep

Verse: 701    und er dâ minne hete genomen,
Verse: 702    dô lieʒ er sie ze sinnen komen.

Verse: 703    er sprach 'ei süeʒe künigîn,
Verse: 704    nû ist an dir der wille mîn

Verse: 705    minniclîch ergangen.
Verse: 706    frowe, du hâst enphangen

Verse: 707    von rehter liebe einen suon.'
Verse: 708    waʒ solde nû die guote tuon?

Verse: 709    dô diz alsô waʒ geschehen,
Verse: 710    sie muoʒte im vürbaʒ mê verjehen

Verse: 711    mit liebe werder minne
Verse: 712    herze unde sinne.

Verse: 713    der künic sô gar sie an sich twanc,
Verse: 714    daʒ sie nâch im in sende ranc.

Verse: 715    durch ein scheiden ûf den morgen
Verse: 716    begunde die frouwe sorgen:

Verse: 717    daʒ fuogte starker liebe kraft
Verse: 718    und ouch der minne meisterschaft.

Verse: 719    ze dem künge Neptânabô
Verse: 720    sprach die künegîn alsô

Verse: 721    'hêrre, nû solt du füegen daʒ
Verse: 722    ich des belîbe âne haʒ

Verse: 723    gegen dem künge, dem hêrren mîn.'
Verse: 724    er sprach 'frouwe, daʒ sol sîn.'

Verse: 725    sie sprach 'dîn langeʒ mîden
Verse: 726    mac ich niht wol erlîden.

Verse: 727    geselle, sol ich dîn enbern,
Verse: 728    daʒ muoʒ mich ganzer sorge wern.'

Verse: 729    er sprach 'vil süeʒe künigîn,
Verse: 730    ich lâ dir hie daʒ herze mîn.'

Verse: 731    sie sprach 'friunt und lieber man,
Verse: 732    daʒ mîn ich dir gegeben hân

Verse: 733    und mînen vrîen lîp vür eigen,
Verse: 734    daʒ wil ich dir erzeigen,

Verse: 735    wie du, hêrre, gebiutest mir.'
Verse: 736    dô wart nâch der minne gir

Verse: 737    bêhurtet ûf der minne schilt
Verse: 738    ze rehter vuoge gezilt.

Verse: 739    ein minneclîcheʒ ringen,
Verse: 740    ein kiuschlîcheʒ twingen,

Verse: 741    ein hurtlich umbevâhen
Verse: 742    mit blanken armen nâhen

Verse: 743    gedruct an die bruste
Verse: 744    nâch der minne luste;

Verse: 745    ein minneclîcheʒ scheiden
Verse: 746    ergienc von in beiden.

Verse: 747    von minne und rehter liebe kraft
Verse: 748    wart die frouwe berhaft.

Verse: 749    eʒ nâhete dem morgen:
Verse: 750    daʒ bôt ir senedeʒ sorgen.

Verse: 751    wâ man mit sorgen tougen
Verse: 752    minnet ûf ein lougen,

Verse: 753    dâ reiʒet die minne
Verse: 754    herze unde sinne

Verse: 755    und liebet mê dar zuo den muot,
Verse: 756    dan dâ man eʒ âne sorge tuot.

Verse: 757       Zehant der künic heim kam,
Verse: 758    urloup er ze dem fürsten nam.

Verse: 759    sînes dankens was dô vil,
Verse: 760    daʒ ich durch kürze lâʒen wil.

Verse: 761    im was dâ êren gnuoc erboten,
Verse: 762    künec gesinde bevalh er den goten,

Verse: 763    ze hant schiet er von dan.
Verse: 764    er tet als ein wîse man.

Verse: 765    wie gar eʒ wær verborgen,
Verse: 766    die frowe was doch in sorgen.

Verse: 767    irn hêrren sie sêre widersaʒ.
Verse: 768    sie sprach 'wâ mite hân ich daʒ

Verse: 769    mîn got verdienet wider dich,
Verse: 770    daʒ du sô unsælic mich

Verse: 771    der werlde hâst gemachet?
Verse: 772    mîn hôhe wirde swachet,

Verse: 773    mir wil daʒ vil leide schamen
Verse: 774    verdrucken mînen werden namen.

Verse: 775    ich sol mich jâmers vlîʒen.
Verse: 776    mîn wâre vröide sol rîʒen,

Verse: 777    sien wirt in mînem herzen ganz.
Verse: 778    ich sol der wernden sorgen kranz

Verse: 779    ûf mîn houbt binden.
Verse: 780    mîn tage suln mir swinden

Verse: 781    mit leide und mit riuwen.
Verse: 782    sich sol vil stæte erniuwen

Verse: 783    in mîme herzen jâmer grôʒ.
Verse: 784    wie bin ich worden sælden blôʒ.

Verse: 785    mir selber ich niht guotes gan.
Verse: 786    waʒ touc ich sô werdem man

Verse: 787    vürbaʒ mê ze wîbe
Verse: 788    mit sô swachem lîbe?

Verse: 789    ich hân verworht sîn hulde,
Verse: 790    eʒ ist doch ân mîn schulde:

Verse: 791    solt ichs mit willen hân verjehen,
Verse: 792    jâ wær eʒ nimmer geschehen.

Verse: 793    Nû müeʒe mir komen ze trôste
Verse: 794    des helfe, der erlôste

Verse: 795    die werden Susannen
Verse: 796    von den zwein ungetriuwen mannen,

Verse: 797    dô sie vür gerihte stunt:
Verse: 798    er tuo mir sîne helfe kunt.'

Verse: 799       ir rede begund sich mischen
Verse: 800    mit weinen und mit hischen.

Verse: 801    'ôwê er gar vervluochter man,
Verse: 802    daʒ ich sîn kunde ie gewan.

Verse: 803    die gote haben in her gesant
Verse: 804    ûf mîn laster in diz lant,

Verse: 805    sie haben mich des engelten lân
Verse: 806    daʒ ich sie verkorn hân

Verse: 807    und daʒ ich zuo dem suoche rât,
Verse: 808    der himel und erde geschaffen hât.

Verse: 809    hân ich fruht von dir genomen,
Verse: 810    wie sol mir die ze vröiden komen?

Verse: 811    sol ich mînem hêrren liegen,
Verse: 812    den werden alsô betriegen ?

Verse: 813    daʒ hât er gegen mir niht verschult.'
Verse: 814    michel was ir ungedult.

Verse: 815    'ôwê, daʒ ich ie wart geborn!
Verse: 816    jâ hân ich armeʒ wîp verlorn

Verse: 817    mîn kiusche und ouch mîn êre.
Verse: 818    mîn leben touc niht mêre.

Verse: 819    mich sol vürbaʒ nieman loben.
Verse: 820    mir ist in mîn herze geschoben

Verse: 821    des jâmers gruntveste.
Verse: 822    got wîse mich daʒ beste,

Verse: 823    war nâch ich mich rihten müge,
Verse: 824    daʒ mir armem wîbe tüge.

Verse: 825    hêrre schepher, mîn got du bist,
Verse: 826    ich weiʒ daʒ dir niht verborgen ist,

Verse: 827    ob ich dich hêrre biten tar,
Verse: 828    sô nim mîn mit dîner helfe war.

Verse: 829    eʒ geschach ân mîne schulde.
Verse: 830    du gip mir dîne hulde

Verse: 831    nâch dîner barmherzikeit:
Verse: 832    eʒ ist mir von herzen leit

Verse: 833    daʒ mir die sünde ist geschehen,
Verse: 834    des wil ich, hêrre, dir verjehen.'

Verse: 835       Alsus saʒ die reine
Verse: 836    clagende alterseine

Verse: 837    in irm heimlîchen gemache
Verse: 838    berette sie die sache.

Verse: 839    sô sie ze den liuten kam,
Verse: 840    von ir nieman vernam

Verse: 841    daʒ sie wære unfrô.
Verse: 842    sô kunde sie gebâren dô,

Verse: 843    wie ir leit wære manicvalt,
Verse: 844    ir hêrre ninder des engalt.

Verse: 845    dô sie grôʒen began
Verse: 846    und gefriesch ir werder man,

Verse: 847    er was sîn frô und gemeit.
Verse: 848    er sprach 'nû wellen mîne leit,

Verse: 849    süeʒeʒ wîp, ein ende hân.
Verse: 850    swaʒ ich clage habe getân,

Verse: 851    der wilt du mir genâde tuon.
Verse: 852    frouwe, du treist einen suon,

Verse: 853    Wol mich der lieben mære.
Verse: 854    nû ringent sich mîn swære.

Verse: 855    got gebe (sprach der alte frome)
Verse: 856    daʒ er uns ze frühte kome.'

Verse: 857    die frouwe bî irm hêrren lac,
Verse: 858    grôʒer sorgen sie phlac.

Verse: 859    sie sprach 'waʒ gotes wille sî,
Verse: 860    des müeʒ ich nimmer werden frî'

Verse: 861    alsô lebten sie beide,
Verse: 862    er mit liebe, sie mit leide.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.