TITUS
Ulrich von Eschenbach, Alexander
Part No. 7
Previous part

Chapter: 9b  
Über Nabuchodonosor


Verse: 985       Ich wil iu ein teil verjehen
Verse: 986    waʒ vor Darîô ist geschehen,

Verse: 987    von Nabuchodonosor, der daʒ rîche hielt,
Verse: 988    der ouch grôʒer rîcheit wielt.

Verse: 989    der selbe Nabuchodonosor
Verse: 990    hete gemachet hie bevor

Verse: 991    ein siule von golde.
Verse: 992    der hôchvertige wolde

Verse: 993    daʒ volc dar zuo twingen
Verse: 994    ze dienste der siule bringen.

Verse: 995    den liuten allen er gebôt
Verse: 996    daʒ sie die siule für got

Verse: 997    an sîner stat mit irm gebet
Verse: 998    êrten, und wer daʒ niht tet

Verse: 999    der muoste zorn lîden,
Verse: 1000    den er gerne mohte mîden.

Verse: 1001    daʒ sî iu allen geseit:
Verse: 1002    der künec bediutet die gîtikeit,

Verse: 1003    die des twinget den man,
Verse: 1004    daʒ er die siule betet an.

Verse: 1005    die siule bediutet unrehteʒ guot,
Verse: 1006    daʒ den liuten schaden tuot,

Verse: 1007    die an ir rîchtuom geloubent
Verse: 1008    und got der sêle roubent.

Verse: 1009       Sich hieʒ anbeten hie vor
Verse: 1010    der selbe Nabuchodonosor:

Verse: 1011    dar zuo brâht in sîn übermuot
Verse: 1012    und sîn kreftigeʒ guot,

Verse: 1013    daʒ in des dûhte, er wær got.
Verse: 1014    wer niht enleiste sîn gebot,

Verse: 1015    den wolt er gar verterben
Verse: 1016    und an dem lîbe ersterben.

Verse: 1017    Jhêrusalêm sagte sich wider:
Verse: 1018    dar umbe der künic sider

Verse: 1019    strîtes dar sich bewac,
Verse: 1020    Jhêrusalêm er umbelac.

Verse: 1021    die stat er in an gewan.
Verse: 1022    gevangen hieʒ er füeren dan

Verse: 1023    daʒ volc gen Babilôniâ,
Verse: 1024    wênic liute lieʒ er dâ.

Verse: 1025    dô man die andern dannen treip,
Verse: 1026    Golodîas dâ beleip

Verse: 1027    und die mit im dâ wâren:
Verse: 1028    der hieʒ der künec niht vâren.

Verse: 1029    noch mêr von im dâ geschach,
Verse: 1030    die mûre er ûf die erde brach.

Verse: 1031       Nabuchodonosor den tîvel
Verse: 1032    bediutet âne zwîvel,

Verse: 1033    der mit sîme gewalte
Verse: 1034    des twinget jung und alte

Verse: 1035    daʒ sie im dienen müeʒen.
Verse: 1036    er kan die sünde süeʒen,

Verse: 1037    er ist der sündære got,
Verse: 1038    die gerne leistent sîn gebot.

Verse: 1039    Jhêrusalêm bediutet die,
Verse: 1040    die sich alsô stellent hie

Verse: 1041    daʒ sie nâch gote wellen leben
Verse: 1042    und den sünden widerstreben.

Verse: 1043    sô des Nabuchodonosor wirt gewar,
Verse: 1044    er komt mit heres kraft dar

Verse: 1045    und belegt sie mit bœsen gedanken,
Verse: 1046    daʒ sie an güete muoʒ wanken.

Verse: 1047    der vil ungehiure
Verse: 1048    brichet in die miure.

Verse: 1049    er vertilget iren berc,
Verse: 1050    ich mein ir guote werc,

Verse: 1051    der sie heten begunnen.
Verse: 1052    sô er sie hât gewunnen,

Verse: 1053    sô füert er sie gen Babilôn,
Verse: 1054    dâ wirt vil sûr ir lôn:

Verse: 1055    in wirt dâ aller jâmer kunt
Verse: 1056    in der bittern helle grunt.

Verse: 1057       Nû sult ir ouch des nemen war,
Verse: 1058    waʒ bediute dise cleine schar,

Verse: 1059    die Golodîas dâ behabt.
Verse: 1060    daʒ sint die, der werc sîn begrabt

Verse: 1061    gegen gote mit guoten sinnen,
Verse: 1062    daʒ ir niht mac gewinnen

Verse: 1063    der tîvel Nabuchodonosor,
Verse: 1064    als ich gesagt hân dâ vor;

Verse: 1065    die alsô hie gewerben,
Verse: 1066    sô in die lîbe ersterben,

Verse: 1067    daʒ ir sêle komt für got
Verse: 1068    und vrî sint von der helle nôt.

Verse: 1069    der meide sun vil zarter,
Verse: 1070    got, durch dîne marter

Verse: 1071    die du durch uns hâst erliden,
Verse: 1072    ruoch uns vor Nabuchodonosor befriden,

Verse: 1073    den sîn hôchvart betrouc
Verse: 1074    daʒ er sich selben an louc:

Verse: 1075    er jach er wære aleine got,
Verse: 1076    des noch der tîvel hât sînen spot.

Verse: 1077       Bî des fürsten jâren
Verse: 1078    in Assirîâ wâren

Verse: 1079    drî hêrren von edlem geslehte.
Verse: 1080    ir leben was gerehte.

Verse: 1081    des künges vuore in niht behagt.
Verse: 1082    die heten im daʒ gesagt,

Verse: 1083    sie wolden an in gelouben niht,
Verse: 1084    sîn leben dûhte sie enwiht.

Verse: 1085    sie hieʒen in lâʒen dâ von.
Verse: 1086    Sydrach Mysach und Abdenagon

Verse: 1087    alsô man die hêrren nande.
Verse: 1088    dem fürsten von dem lande

Verse: 1089    wârn sie des gebotes wider:
Verse: 1090    dar umbe hieʒ sie sider

Verse: 1091    Nabuchodonosor vâhen
Verse: 1092    und des mit in gâhen

Verse: 1093    daʒ man sie brente in viure.
Verse: 1094    mit sîner gnâden stiure

Verse: 1095    half in der wâre gotes suon,
Verse: 1096    der noch helfe den kan tuon,

Verse: 1097    die im dienstes sîn bereit;
Verse: 1098    der schuof daʒ âne alleʒ leit

Verse: 1099    die hêrren von des viures rôst
Verse: 1100    alle drî wurden erlôst.

Verse: 1101       Darumbe daʒ geschach
Verse: 1102    daʒ man sît sach

Verse: 1103    den künec gewaltes rîche
Verse: 1104    einem ochsen gelîche

Verse: 1105    bûwen daʒ gevilde.
Verse: 1106    ûf heide und in der wilde

Verse: 1107    muost er holn sîne nar.
Verse: 1108    daʒ wert alsô siben jâr,

Verse: 1109    unz got durch Dâniêlis bet
Verse: 1110    an im genædiclîche tet.

Verse: 1111    sîn barmunge des erdâhte
Verse: 1112    daʒ er den künic brâhte

Verse: 1113    wider an sîn êrsteʒ leben
Verse: 1114    und geruocht im die schult vergeben.

Verse: 1115    solher hôchvart ouch engalt
Verse: 1116    Lucifer, der wart gevalt

Verse: 1117    von dem himelrîche.
Verse: 1118    er wolde sîn gelîche

Verse: 1119    dem, der sîn hete erdâht.
Verse: 1120    sîn übermuot in darzuo brâht.

Verse: 1121       Die selben jâr, die dâ vor
Verse: 1122    erliden hât Nabuchodonosor,

Verse: 1123    bediutent von anegenge siben zît,
Verse: 1124    die der tîvel hât erliden sît:

Verse: 1125    die êrsten zît von Âdam
Verse: 1126    unz zuo der zît daʒ Nôê kam;

Verse: 1127    von Nôê unz Abraham wart;
Verse: 1128    sô sint sîn pîne ungespart

Verse: 1129    nâch Abraham vürbaʒ mê
Verse: 1130    unz an den werden Moisê;

Verse: 1131    von Moisê unz daʒ geschach,
Verse: 1132    daʒ man Babilôn zerstœret sach;

Verse: 1133    dar nâch von der selben zît
Verse: 1134    unz daʒ wart her Dâvît;

Verse: 1135    von hern Dâvît unz an die frist
Verse: 1136    daʒ unser hêrre Jhêsus Christ

Verse: 1137    von der meide wart geborn:
Verse: 1138    sô ist der tîvel alles verlorn

Verse: 1139    von Christi geburt unz an daʒ zil,
Verse: 1140    daʒ got gerihte eitzen wil.

Verse: 1141    Alsô komt der jungste tac.
Verse: 1142    nieman sich dô verbergen mac,

Verse: 1143    er müeʒe vür daʒ gerihte gên
Verse: 1144    sîner werc ze rede dâ stên.

Verse: 1145    die siben alter habt ir vernomen,
Verse: 1146    wie der tîvel her ist komen

Verse: 1147    in die helle mit ungemache,
Verse: 1148    mit sîner hôchverte sache.

Verse: 1149    die ahte zît ist ân ende.
Verse: 1150    süeʒer got nû sende

Verse: 1151    uns armen dîner helfe trôst,
Verse: 1152    daʒ wir von sünden werden erlôst,

Verse: 1153    sô daz wir iht erschînen
Verse: 1154    mit dem tîvel in sînen pînen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.