TITUS
Ulrich von Eschenbach, Alexander
Part No. 9
Previous part

Chapter: 13  
Alexanders Erziehung


Verse: 1247       Daʒ kint mit vlîʒe wart gezogen
Verse: 1248    und von dem künge alsô gephlogen:

Verse: 1249    er wânde daʒ eʒ sîn wære.
Verse: 1250    geloubet mir der mære,

Verse: 1251    daʒ eʒ vil mangem noch geschiht,
Verse: 1252    der des wil gelouben niht

Verse: 1253    daʒ man in iht affe;
Verse: 1254    in dunket daʒ erʒ wol schaffe,

Verse: 1255    der doch gerne möhte nemen,
Verse: 1256    ob in witze kunde gezemen,

Verse: 1257    daʒ daʒ dirte wære sîn,
Verse: 1258    die er ziuhet, der kindelîn.

Verse: 1259       Alexander wachsen began.
Verse: 1260    nû gedâhte des der wîse man

Verse: 1261    er müese lernen die buochstabe.
Verse: 1262    dâ wolt er niht lâʒen abe.

Verse: 1263    nâch einem meister er sande,
Verse: 1264    der was in dem lande

Verse: 1265    der beste und ouch der wîste.
Verse: 1266    sîn kunst man hôhe prîste

Verse: 1267    vür ander, die meister wâren.
Verse: 1268    er was vor manegen jâren

Verse: 1269    vür werden meister gezalt.
Verse: 1270    sîn kunst sîn zuht was manicvalt.

Verse: 1271    er was ouch von hôher art.
Verse: 1272    der knappe im bevolhen wart.

Verse: 1273    er kêrte sîn herze an guote kunst,
Verse: 1274    dâ von het er der werlde gunst.

Verse: 1275    der knappe der wuochs sêre.
Verse: 1276    er lêrte in zuht und êre,

Verse: 1277    er lêrte in die karacter ê
Verse: 1278    in kriecheschem daʒ ABC,

Verse: 1279    daʒ wir alrêst müeʒen verstên,
Verse: 1280    sô man uns lât ze schuole gên.

Verse: 1281    den meister er vorhten began.
Verse: 1282    nû was der wîse man

Verse: 1283    mit allem vlîʒ dem kinde mite,
Verse: 1284    ouch het eʒ alsô guote site,

Verse: 1285    daʒ eʒ des wîsen mannes wort
Verse: 1286    ze allen zîten gerne hôrt.

Verse: 1287       Dô er zuo zwelf jâren kam
Verse: 1288    und der schrift ein teil vernam,

Verse: 1289    Aristotiles im begunde lêre geben
Verse: 1290    wie er fürsteclîcheʒ leben

Verse: 1291    und zuht und êre an sich næme,
Verse: 1292    daʒ fürsten rehte gezæme.

Verse: 1293    von sîner jugende zîte
Verse: 1294    sîn gemüete stunt nâch strîte

Verse: 1295    mêr dan ze der schrifte.
Verse: 1296    manger hant sîn herze stifte

Verse: 1297    daʒ ze strîte gezôch,
Verse: 1298    so er dem meister enphlôch.

Verse: 1299    er wuochs an dem lîbe sêre,
Verse: 1300    an der kraft michels mêre.

Verse: 1301    sîn sterke man gelîchte dem
Verse: 1302    werden Achillem:

Verse: 1303    dâ vür was der erkorn,
Verse: 1304    daʒ sterker mensch nie wart geborn

Verse: 1305    ân daʒ kint von Macedô,
Verse: 1306    des sterke sich wol gelîchet sô.

Verse: 1307    die âventiure tuot noch mê,
Verse: 1308    sie gelîchet in Alcîdê.

Verse: 1309    Alcîdes bediutet schœnen man,
Verse: 1310    der tugent und zuht bedenken kan

Verse: 1311    alsô was ouch dirre guote knabe,
Verse: 1312    im engienc des niht abe.

Verse: 1313    er was schœne unde starc,
Verse: 1314    untugent sich gar an im verbarc.

Verse: 1315    swaʒ ze missewende zôch
Verse: 1316    allenthalben er daʒ vlôch.

Verse: 1317    der muoter er was gelîche.
Verse: 1318    der edle fürste rîche

Verse: 1319    vil guoter site phlager.
Verse: 1320    von der lernunge was er mager

Verse: 1321    und dâ von daʒ er trahte
Verse: 1322    wie er daʒ geahte,

Verse: 1323    ob er des rîches solde phlegen,
Verse: 1324    daʒ er nâch wirde kunde stegen.

Verse: 1325    sîn vrîeʒ herze im reht verjach
Verse: 1326    alleʒ daʒ im sît geschach.

Verse: 1327    wie er der jâre wære kranc,
Verse: 1328    nâch hôher wirde sîn herze ranc

Verse: 1329       Eines tages eʒ geschach,
Verse: 1330    daʒ in sîn meister bleichen sach

Verse: 1331    dar under dicke werden rôt.
Verse: 1332    er merkte wol des knappen nôt,

Verse: 1333    daʒ er mit gedanken ranc,
Verse: 1334    daʒ in sîn kriegeʒ herze twanc.

Verse: 1335    er was in trûrigem muote.
Verse: 1336    dô vrêget in der guote

Verse: 1337    Aristotiles waʒ im wære,
Verse: 1338    durch waʒ er soliche swære

Verse: 1339    und ungemüete an sich næme,
Verse: 1340    daʒ kinden niht enzæme.

Verse: 1341    den meister er sêre widersaʒ.
Verse: 1342    er sagte im rehte umbe waʒ

Verse: 1343    beide naht unde tac
Verse: 1344    sîn herze grôʒer sorgen phlac.

Verse: 1345    er sprach 'lieber meister mîn,
Verse: 1346    sol ich darumb niht trûric sîn?

Verse: 1347    mîn vater ist ein alt man,
Verse: 1348    der beginnet uns schiere abe gân,

Verse: 1349    nû wir sîn bedorfen wol.
Verse: 1350    so ich künges werc uoben sol

Verse: 1351    und beginnen ritterlîcher tât,
Verse: 1352    wer gît mir dan getriuwen rât,

Verse: 1353    als mîn vater tæte,
Verse: 1354    ob ich in bî mir hæte?

Verse: 1355    so er mich solde helfe wern,
Verse: 1356    sô muʒd ich leider sîn enbern,

Verse: 1357    die er mir lange her gehieʒ.'
Verse: 1358    daʒ antlitze er nider lieʒ,

Verse: 1359    im vielen die zeher tougen
Verse: 1360    über die wangen von den ougen.

Verse: 1361    'solt er mir lange weʒen bî,
Verse: 1362    sô blib ich manger sorgen vrî.

Verse: 1363    nû ist er leider worden ze alt.
Verse: 1364    im hât her Darîus mit gewalt

Verse: 1365    sîn guot abe ertwungen.
Verse: 1366    deiswâr ist im gelungen

Verse: 1367    daʒ er im zinses hât verjehen,
Verse: 1368    des sol von mir niht geschehen.

Verse: 1369    gan mir got daʒ ich sol leben,
Verse: 1370    im sol mîn hant den zins geben,

Verse: 1371    deʒ er wol enphindet,
Verse: 1372    dâ von sîn leben swindet.

Verse: 1373    alhie ich deʒ vor gote swer
Verse: 1374    im enwirt kein gelt mêr

Verse: 1375    gegeben von disem lande.
Verse: 1376    ich trahte nâch sîme phande.

Verse: 1377    in mîn ahte ich daʒ nim,
Verse: 1378    er muoʒ mir zinsen als im

Verse: 1379    mîn vater lange hât getân:
Verse: 1380    des wirt er nimmer erlân.

Verse: 1381    dannoch sol er mir sîn leben
Verse: 1382    vür mîn guot ze gelte geben.'

Verse: 1383       Dô Aristotiles het gehôrt
Verse: 1384    des junchêrren clagende wort,

Verse: 1385    trœsten er in begunde,
Verse: 1386    ale er vil wol kunde.

Verse: 1387    waʒ im der wîʒe sagte,
Verse: 1388    dem knappen daʒ wol behagte.

Verse: 1389    er bôt willegeʒ hœren dar
Verse: 1390    unde nam mit vlîʒe war

Verse: 1391    wie er in daʒ guote lêrte
Verse: 1392    und daʒ bœse werte.

Verse: 1393    er sprach 'wiltu fürste sîn,
Verse: 1394    sô soltu daʒ herze dîn

Verse: 1395    vlîʒen guoter dinge.
Verse: 1396    wiltu daʒ dir gelinge,

Verse: 1397    du solt wenen dîne jugent
Verse: 1398    guoter site und ganzer tugent.

Verse: 1399    dîn herz sol wesen küene.
Verse: 1400    mit den friunden du dich süene,

Verse: 1401    hâst du gegen in zerbrochene iht
Verse: 1402    sô man dich in zorne siht

Verse: 1403    und gegen den vînden in haʒʒe:
Verse: 1404    dar an dich niht enlaʒʒe.

Verse: 1405    swer mit den vînden strîten sol,
Verse: 1406    der bedarf guoter vriunde wol.

Verse: 1407    doch sol ein ieglich wîse man
Verse: 1408    ze allen zîten gerne hân

Verse: 1409    getriuwe friund und die behalten,
Verse: 1410    ob er kan sinne walten.

Verse: 1411       Merkent rehte mîne wort,
Verse: 1412    hêrre, sie sint iu guot gehôrt.

Verse: 1413    sô ir ihtes beginnet,
Verse: 1414    daʒ guot sî, daʒ volbringet;

Verse: 1415    suochent ze iuwern hêrren rât,
Verse: 1416    sô lebt ir âne missetât.

Verse: 1417    ir sult mir eines volgen:
Verse: 1418    den schalkhaften sît erbolgen

Verse: 1419    und die wesen lugenære,
Verse: 1420    die lânt iu sîn unmære;

Verse: 1421    lânt sie niht belîben,
Verse: 1422    ir sult sie von iu trîben.

Verse: 1423    wer den selben volgen wil,
Verse: 1424    der mac erwerben schanden vil.

Verse: 1425    ir vil ungetriuwen wort
Verse: 1426    verrâten hie und trœsten dort.

Verse: 1427    ir sult den bœsen man
Verse: 1428    vürziehens gar erlân:

Verse: 1429    eʒ ist alleʒ an im verlorn.
Verse: 1430    wirt im ze eim mâl ûf iuch zorn,

Verse: 1431    er trahtet iu immer mêre
Verse: 1432    ûf lîp ûf guot und ûf êre;

Verse: 1433    wie er iu daʒ angewinne,
Verse: 1434    dar an kêrt er sîn sinne,

Verse: 1435    des in sînes bœsen herzen rât
Verse: 1436    keine wîse niht enlât.

Verse: 1437    den getriuwen sult ir minnen
Verse: 1438    von allen iuwern sinnen.

Verse: 1439    volgent mîner lêre:
Verse: 1440    den biderben erzeigent êre,

Verse: 1441    wâ irʒ gevüegen kunnet,
Verse: 1442    guotes im wol gunnet:

Verse: 1443    daʒ ist alleʒ wol bestat
Verse: 1444    an dem, der gegen iu triuwe hât.

Verse: 1445    enruochet wer er sî,
Verse: 1446    ist er et vor valsche vrî,

Verse: 1447    biutet er iu sîn dienest an:
Verse: 1448    ir solt in gerne bî iu hân

Verse: 1449    und in iuwer gnâde enphâhen,
Verse: 1450    mit heimelîche zuo im gâhen.

Verse: 1451    ist er niht ein edel man,
Verse: 1452    mac er niht schœnen lîp hân,

Verse: 1453    ist er an habe niht gerîchet:
Verse: 1454    er hât daʒ sich gelîchet

Verse: 1455    gold und edlem gesteine,
Verse: 1456    daʒ sint sîn tugende reine.

Verse: 1457    wer der mit ganzen triuwen phliget,
Verse: 1458    vür grôʒen hort daʒ selbe wiget.

Verse: 1459    guot ist guot behalten,
Verse: 1460    der sîn alsô kan walten,

Verse: 1461    daʒ er niht dâ mite bejeit
Verse: 1462    daʒ man schande von im seit;

Verse: 1463    guot hât etswâ bœsen site,
Verse: 1464    dâ eʒ krenket mangen mite.

Verse: 1465    übric guot bringet den man
Verse: 1466    daʒ er unzuht kan begân,

Verse: 1467    der er dâ vor was ein gast,
Verse: 1468    dâ im des guotes gebrast.

Verse: 1469       Ist daʒ niht ein strenge nôt
Verse: 1470    daʒ manger lebt und doch tôt

Verse: 1471    ist an wirde und an êre?
Verse: 1472    waʒ solt dem sterbens mêre?

Verse: 1473    tôt lîp enfüelet niht,
Verse: 1474    er enweiʒ waʒ im geschiht:

Verse: 1475    als ist dem vertorben,
Verse: 1476    der an êren ist erstorben,

Verse: 1477    der sîn deheine vüele hât,
Verse: 1478    waʒ der lîp schanden begât.

Verse: 1479    von rehten siten ein biderbe man
Verse: 1480    an allen dingen gefromen kan.

Verse: 1481    man sol den vür den edlen hân,
Verse: 1482    der rehte tugent begên kan

Verse: 1483    sît mit den worten sleht
Verse: 1484    und an dem gerihte reht.

Verse: 1485    nieman ir sult sô liep hân,
Verse: 1486    durch den ir daʒ reht wolt lân

Verse: 1487    und gerihtes verphlegen.
Verse: 1488    ir sult der gâbe iuch bewegen,

Verse: 1489    die die rehten urteile
Verse: 1490    crümmen unde machen veile.

Verse: 1491    eineʒ sî iu vor geseit:
Verse: 1492    nâch rehte hœrt barmherzikeit.

Verse: 1493    wer von dem schuldigen nimet guot,
Verse: 1494    der muoʒ haben den muot,

Verse: 1495    daʒ er im wese mit helfe bî,
Verse: 1496    wie gar eʒ wider daʒ, reht sî.

Verse: 1497    ist daʒ iuch erslîchet
Verse: 1498    und iwer herze begrîfet

Verse: 1499    mit iren vesten banden
Verse: 1500    die muoter aller schanden,

Verse: 1501    ich meine die leiden gîtekeit,
Verse: 1502    sô wil iu êre wesen leit.

Verse: 1503    wirt sie bî iu wonhaft,
Verse: 1504    sô hât iuwer wirde keine kraft,

Verse: 1505    ir müeʒet rehtes verphlegen
Verse: 1506    und iuwer sælden gar bewegen.

Verse: 1507    wolt ir haben reht, daʒ, sî sleht,
Verse: 1508    sô rihtet nâch der stete reht,

Verse: 1509    niht als der hof sî gestalt:
Verse: 1510    der hof vert niwan mit gewalt.

Verse: 1511    ir solt des geruochen,
Verse: 1512    die gnâde an iuch suochen,

Verse: 1513    die lât gnâde vinden.
Verse: 1514    an iu sol niht verswinden

Verse: 1515    ir kunnet iuch über die armen
Verse: 1516    ze aller zît erbarmen.

Verse: 1517    wer gerne ze iuwern gebote sî,
Verse: 1518    dem sît guotes willen bî;

Verse: 1519    wer aber iu widerstê,
Verse: 1520    und iuwer gebot übergê,

Verse: 1521    den druckent wâ ir kunnet,
Verse: 1522    niht êren dem selben gunnet.

Verse: 1523       Swenne sich vüeget die zît,
Verse: 1524    daʒ ir gen vînden in strîte sît,

Verse: 1525    sô habt vrœlîchen muot;
Verse: 1526    trœstent daʒ volc (daʒ ist guot),

Verse: 1527    lât iuch in harnasch sehen,
Verse: 1528    daʒ sie des iht dürfen jehen

Verse: 1529    daʒ iuch des welle betrâgen,
Verse: 1530    ir enturrent eʒ ouch mit in wâgen.

Verse: 1531    man sol iuch ze allen zîten
Verse: 1532    bî den vordersten sehen strîten.

Verse: 1533    ir sult daʒ volc mit guoten siten
Verse: 1534    beide manen unde biten,

Verse: 1535    an etslîchen orten
Verse: 1536    ouch mit scharphen worten.

Verse: 1537    eʒ ist dicke geschehen,
Verse: 1538    die man in zagheit hât gesehen,

Verse: 1539    daʒ sie dâ von mit trôste
Verse: 1540    ein werder man erlôste,

Verse: 1541    daʒ man sie sach mit grimme varn
Verse: 1542    und die vînde wênic sparn.

Verse: 1543    swann eʒ sich sô geziehe
Verse: 1544    daʒ der vînt vor iu vliehe,

Verse: 1545    wolt ir tuon daʒ wol behagt,
Verse: 1546    sô sît der êrste der nâch jagt;

Verse: 1547    swann eʒ aber alsô geschiht
Verse: 1548    daʒ man die iwern entwîchen siht,

Verse: 1549    sô sît hinden an der schar,
Verse: 1550    nement der vînde eben war.

Verse: 1551    wer iuch dann siht halten
Verse: 1552    und solicher manheit walten,

Verse: 1553    der wær ein verschemter man,
Verse: 1554    der danne von iu vliehe dan:

Verse: 1555    er müeste iu helfe bî gestên,
Verse: 1556    solt eʒ im an daʒ leben gên.

Verse: 1557    al die wîle sult ir iuch umb sehen
Verse: 1558    und die vînde rehte spehen,

Verse: 1559    wann ir in sît sô nâhen bî,
Verse: 1560    welch des heres craft sî;

Verse: 1561    waʒ eʒ ze îsen müge hân
Verse: 1562    liute und die ze fuoʒe gân.

Verse: 1563    seht ir sie danne manheit blôʒ,
Verse: 1564    so enruocht niht, ei der hûfe grôʒ,

Verse: 1565    sît der êrste der dar var.
Verse: 1566    mit strîteclîchem hurte dar

Verse: 1567    in die rote sult ir dringen.
Verse: 1568    daʒ swert lât vaste erclingen

Verse: 1569    ûf helm und ûf schilde.
Verse: 1570    wa ir seht ûf dem gevilde

Verse: 1571    von den vînden gedrenge,
Verse: 1572    dâ sûment iuch niht die lenge;

Verse: 1573    lernent durch sie gaʒʒen houwen
Verse: 1574    daʒ eʒ die vînde schouwen.

Verse: 1575    wann iwer gelücke vor wiget
Verse: 1576    daʒ ir den vînden an gesiget,

Verse: 1577    vil eben iu betrahtet
Verse: 1578    wie ir daʒ geahtet,

Verse: 1579    daʒ ir den sic solt enphân
Verse: 1580    daʒ ir sîn muget êre hân.

Verse: 1581       Swâ ir vor einer veste ligt,
Verse: 1582    dâ sich daʒ volc des bewigt

Verse: 1583    daʒ sie die veste wellen geben,
Verse: 1584    die nemt und lât die liute leben;

Verse: 1585    welche sich widersetzen,
Verse: 1586    die sult ir alsô letzen:

Verse: 1587    gebietent den die ligen dâ vor,
Verse: 1588    daʒ sie brechen mûre und tor,

Verse: 1589    daʒ volc gevangen bindet.
Verse: 1590    waʒ ir hordes dâ vindet,

Verse: 1591    den teilt dem volc gemeine,
Verse: 1592    eʒ sî golt oder gesteine.

Verse: 1593    dâ von werden sie vrisch
Verse: 1594    und nâch fûlem willen risch

Verse: 1595    dô iuch abe gê daʒ guot,
Verse: 1596    dô bewîset in willigen muot.

Verse: 1597    ir sult in geloben wol,
Verse: 1598    daʒ iuwer wârheit leisten sol

Verse: 1599    ze der zît, daʒ daʒ geschiht
Verse: 1600    sô man iuch bî habe siht:

Verse: 1601    dâ von werden sie sô geil,
Verse: 1602    daʒ sie durch iuch vüeren veil

Verse: 1603    lîp êre unde guot:
Verse: 1604    daʒ machet iwer willeger muot.

Verse: 1605    swer des gegen sînen liuten phliget,
Verse: 1606    ze allen zîten er gerne gesiget.

Verse: 1607    sô eʒ wol stæter fride sî,
Verse: 1608    sô sît in doch mit helfe bî.

Verse: 1609       Wolt ir haben gesunden lîp,
Verse: 1610    sô mîdent unkiusche wîp;

Verse: 1611    kêrt iuwer sinne
Verse: 1612    an werdes wîbes minne,

Verse: 1613    dâ wehset iuwer êre von.
Verse: 1614    werde wîp haben süeʒen lon.

Verse: 1615    wer unkiusche und trunkenheit wil phlegen,
Verse: 1616    der muoʒ sich guoter sinne bewegen.

Verse: 1617    von den untugenden beiden
Verse: 1618    wirt von wîsheit gescheiden

Verse: 1619    beide wîp unde man,
Verse: 1620    swaʒ sich dar an niht mâʒen kan.

Verse: 1621    als ir mich ê hôrtent sagen,
Verse: 1622    iuwer stete gewaltes übertragen,

Verse: 1623    iuwer hantveste suln stæte sîn,
Verse: 1624    dâ mite ir in

Verse: 1625    ir ordenunge bewæret.
Verse: 1626    niht dicke sie beswæret,

Verse: 1627    daʒ sie eʒ erlîden mugen,
Verse: 1628    wolt ir daʒ sie iu ze dienste tugen.

Verse: 1629    sît des nIht erbolgen,
Verse: 1630    ir enwellet gerne volgen

Verse: 1631    der heiligen schrifte lêre,
Verse: 1632    daʒ sterket iuwer êre.'

Verse: 1633       Aristotiles der geprîste
Verse: 1634    von gote im gnuoc bewîste.

Verse: 1635    alsô mant er in stæte
Verse: 1636    daʒ er wol tæte,

Verse: 1637    daʒ nie keinen man berou.
Verse: 1638    alsô der süeʒe tou

Verse: 1639    die erde bringet berhaft:
Verse: 1640    alsô enphâhet kraft

Verse: 1641    von süeʒer manunge
Verse: 1642    ze guoten werken der junge.

Verse: 1643       Dô er dirre lêre wort
Verse: 1644    von sînem meister hete gehôrt,

Verse: 1645    in sînem muote er verjach,
Verse: 1646    heimlich er wider sich selbe sprach

Verse: 1647    'sol eʒ immer geschehen,
Verse: 1648    daʒ man mich beginnet sehen

Verse: 1649    in disem lande krône tragen,
Verse: 1650    hern Darîô wil ich widersagen

Verse: 1651    und des harte wênic sparn,
Verse: 1652    ich enwelle zehant ûf in varn.

Verse: 1653    ich sol mich niht als ein wîp
Verse: 1654    verligen. ich hab doch starken lîp,

Verse: 1655    mich sol des niht betrâgen,
Verse: 1656    ich enwelle eʒ gegen im wâgen.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.