TITUS
Ulrich von Eschenbach, Alexander
Part No. 10
Previous part

Chapter: 19  
Alexander unterwirft Pûcivâl


Verse: 1657       Verre ûz der heiden lande
Verse: 1658    einen schœnen voln man sande

Verse: 1659    ûʒ Kriechen lant dem keiser wert.
Verse: 1660    von bœsen siten was daʒ phert.

Verse: 1661    grôʒer übel eʒ sich vleiʒ,
Verse: 1662    die liute eʒ ze tôde beiʒ.

Verse: 1663    des was eʒ sêre gevorht.
Verse: 1664    in einen gater man eʒ verworht

Verse: 1665    gemachet veste von îsen
Verse: 1666    welich mensche man wolt wîsen

Verse: 1667    durch sîn untât vomme leben,
Verse: 1668    den hieʒ der künec dem rosse geben.

Verse: 1669    eʒ was schœne unde grôʒ.
Verse: 1670    keine zît eʒ des verdrôʒ,

Verse: 1671    wann Alexander vür eʒ gie,
Verse: 1672    eʒ enviele nider ûf die knie.

Verse: 1673    dicke er zuo dem gatern lief:
Verse: 1674    waʒ in der meister an gerief

Verse: 1675    oder erklîche bestieʒ,
Verse: 1676    dar umbe er es niht enlieʒ,

Verse: 1677    er enbute sîne hant
Verse: 1678    durch des gatern want.

Verse: 1679    daʒ ors zehant gegen im gienc,
Verse: 1680    daʒ er eʒ mit den ôren vienc,

Verse: 1681    ouch stieʒ er ze manger stunt
Verse: 1682    im beide hende in den munt.

Verse: 1683    nâch dem orse er vaste ranc.
Verse: 1684    dar nâch was enbor lanc

Verse: 1685    daʒ der fürste vür den gater
Verse: 1686    kam, den er nande vater.

Verse: 1687    er sprach 'vater, gip mir
Verse: 1688    diz ors!' er sprach 'waʒ sol eʒ dir?

Verse: 1689    sô wolt ich gerne tœten dich.'
Verse: 1690    er sprach 'daʒ lât besorgen mich.

Verse: 1691    ir sult michʒ sehen rîten
Verse: 1692    gegen tjost und in strîten.'

Verse: 1693    balde hieʒ er springen
Verse: 1694    einen zoum im bringen.

Verse: 1695    gâhes âne verdrieʒen
Verse: 1696    den gater er hieʒ entslieʒen.

Verse: 1697    der edle junge knappe wert
Verse: 1698    selber zoumte daʒ phert.

Verse: 1699    dô er eʒ ûʒ dem gatern zôch,
Verse: 1700    daʒ volc al gemeine vlôch.

Verse: 1701    dô was ein satel al bereite:
Verse: 1702    ûf daʒ ors er den leite,

Verse: 1703    dar ûf er unverzaget saʒ.
Verse: 1704    man het in niht gewünschet baʒ,

Verse: 1705    daʒ ors was sînes willen sleht,
Verse: 1706    ze beiden sîten gar gereht.

Verse: 1707    baʒ wart beriten Pûcivâl
Verse: 1708    den zem êrsten Parcivâl

Verse: 1709    sîn ôrs, daʒ im von Ihter kam,
Verse: 1710    dô er im daʒ leben nam.

Verse: 1711    alle die dâ wârn des wundert
Verse: 1712    daʒ eʒ mê dann hundert

Verse: 1713    der liute hete ersterbet
Verse: 1714    und alzemâle verterbet,

Verse: 1715    daʒ der deheineʒ mê genas,
Verse: 1716    und dem kind sô undertænic was.

Verse: 1717    eʒ hieʒ der knappe guoter
Verse: 1718    an höu und an vuoter

Verse: 1719    und an ander spîse wenen;
Verse: 1720    eʒ dorft sich nâch liuten nimmer senen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.