TITUS
Ulrich von Eschenbach, Alexander
Part No. 11
Previous part

Chapter: 20  
Alexander besiegt König Niclas


Verse: 1721       Nû kâmen boten mit mæren
Verse: 1722    daʒ in dem lande wæren

Verse: 1723    die vînde gar starke
Verse: 1724    und brenten die marke,

Verse: 1725    und daʒ der künic Niclas
Verse: 1726    mit grôʒer kraft komen was.

Verse: 1727    dô Alexander daʒ vernam,
Verse: 1728    vür den künec der junge kam,

Verse: 1729    er sprach 'ich wil des niht enbern,
Verse: 1730    dirre bet sult ir mich gewern,

Verse: 1731    daʒ ir mich sendet mit her
Verse: 1732    gegen den vînden ze wer.'

Verse: 1733    daʒ der künec ungerne tet,
Verse: 1734    doch muost er leisten sîne bet.

Verse: 1735    ûʒ Kriechen lande manic helt
Verse: 1736    ze dem jungen wart erwelt.

Verse: 1737    die krônic mich bewîset hât
Verse: 1738    daʒ er vor einer guoten stat,

Verse: 1739    die die vînde gar erwegen
Verse: 1740    mit voller kraft heten umbelegen;

Verse: 1741    dâ tet er sînen êrsten strît
Verse: 1742    und machte dô ir hôchvart quît,

Verse: 1743    daʒ sie vor dem muotes rîchen
Verse: 1744    von der marke muosten entwîchen.

Verse: 1745    ich verstê mich an den mæren
Verse: 1746    daʒ die vînde der Unger wæren.

Verse: 1747    die wurden niht nâch kindes siten
Verse: 1748    von dem jungen angeriten.

Verse: 1749    guot was sîn ors Pûcivâl.
Verse: 1750    dâ von er behielt daʒ wal.

Verse: 1751    dô er die vînde dâ vertreip
Verse: 1752    vür sînen schaden im dâ beleip

Verse: 1753    an gevangen wol glîcheʒ phant.
Verse: 1754    etslîchen er mit sîn selbes hant

Verse: 1755    vienc. ouch mêr hôrt ich sagen,
Verse: 1756    etslîcher wurde von im erslagen.

Verse: 1757    in dem strîte er eʒ sô tet,
Verse: 1758    dâ von man in ze lobne het.

Verse: 1759    sæliclich eʒ im ergienc:
Verse: 1760    den künec Niclas er selbe vienc,

Verse: 1761    den er im ze dienste twanc.
Verse: 1762    alsô der junge nâch prîse ranc.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.