TITUS
Ulrich von Eschenbach, Alexander
Part No. 12
Previous part

Chapter: 21  
Philips zweite Hochzeit


Verse: 1763       Dâ der junge sic erstreit
Verse: 1764    und frœlich ze hûse reit,

Verse: 1765    als er ze Korinthus kam,
Verse: 1766    leide mære er vernam,

Verse: 1767    der er gerne hete enborn.
Verse: 1768    der künec Philippus hete verkorn

Verse: 1769    sîn muoter (daʒ riet Lysias),
Verse: 1770    die wîle er in der hervart was.

Verse: 1771    Alexander der guote,
Verse: 1772    wie er wære in swærem muote,

Verse: 1773    sîner zuht er niht vergaʒ.
Verse: 1774    er gienc dâ der künic saʒ.

Verse: 1775    er sprach 'vater, die krône
Verse: 1776    nâch mînem strît ze lône

Verse: 1777    gar wunniclich geloubet
Verse: 1778    setze ich ûf dîn houbet.'

Verse: 1779    daʒ ist noch al der heiden site
Verse: 1780    und volget in in wirde mite:

Verse: 1781    wenn sie von strîte komen
Verse: 1782    und den sic haben genomen,

Verse: 1783    sô muoʒ ir künec ein krône
Verse: 1784    von lôrboum enphâhen schône

Verse: 1785    und die aht tage tragen.
Verse: 1786    daʒ wîset in strîte prîslich bejagen

Verse: 1787    und daʒ er habe den sic genomen.
Verse: 1788    nû was Lysias ouch komen,

Verse: 1789    dô der künec Philippus saʒ
Verse: 1790    mit der niuwen brût und aʒ.

Verse: 1791    Cleôpatra hieʒ daʒ schœne wîp.
Verse: 1792    jugent und schœne het ir lîp,

Verse: 1793    der künec ir grôʒer liebe jach.
Verse: 1794    Lysias der fürste sprach

Verse: 1795    'dise frouwe einen sun gebirt,
Verse: 1796    her künec, der iu gelîche wirt,

Verse: 1797    der uns ze sælden wirt geborn.'
Verse: 1798    die rede was Alexandrô zorn.

Verse: 1799    er begreif einen swæren stap,
Verse: 1800    einen ungevüegen slac er gap

Verse: 1801    Lysiâ ûf den koph,
Verse: 1802    daʒ er in spielt als ein toph.

Verse: 1803    dâ von er sîn ende nam.
Verse: 1804    Philippus clagte Lysiam.

Verse: 1805    Alexander sîn muoter bringen hieʒ,
Verse: 1806    Cleôpatram er verstieʒ.

Verse: 1807    er sprach 'vater, diz wîp
Verse: 1808    durch kein vremde mê vertrîp.

Verse: 1809    sie muoʒ und sol die krône tragen.
Verse: 1810    daʒ ich Lysiam hân erslagen,

Verse: 1811    daʒ büeʒe ich wie du gebiutest mir.'
Verse: 1812    der alte sprach 'daʒ stê ze dir.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.