TITUS
Ulrich von Eschenbach, Alexander
Part No. 18
Previous part

Chapter: 24  
Philips Tod


Verse: 2021    ich hân vernomen alsô,
Verse: 2022    eines tages der alte Macedô

Verse: 2023    mit der künegîn heimlich was.
Verse: 2024    ein rîcher man Pausônias,

Verse: 2025    den twanc des sîn übermuot
Verse: 2026    und sîn kreftigeʒ guot,.

Verse: 2027    daʒ er gedâhte minne
Verse: 2028    gegen der küniginne,

Verse: 2029    die sie im hete verseit,
Verse: 2030    daʒ sîme herzen niht beheit.

Verse: 2031    er kam ûf daʒ palas,
Verse: 2032    dô der künec. niur mit der frouwen was.

Verse: 2033    eʒ was umb einen mittentac.
Verse: 2034    daʒ gesinde über al gemaches phlac.

Verse: 2035    des was der valsches reine
Verse: 2036    sîner manne al eine.

Verse: 2037    dirre kam gewâpent dar,
Verse: 2038    wol hundert man in sîner schar.

Verse: 2039    sîn tôrheit des gezam,
Verse: 2040    mit gewalt er die frouwen nam;

Verse: 2041    sîn untriuwe im daʒ riet,
Verse: 2042    den künec er von dem leben schiet.

Verse: 2043    die frowen wolt er dannan hân gefuort,
Verse: 2044    der herze mit leide was begurt,

Verse: 2045    daʒ von irs jâmers schalle
Verse: 2046    die liute erwachten alle:

Verse: 2047    ê er kæme ûʒ dem hûs,
Verse: 2048    daʒ volc kam geloufen ûʒ.

Verse: 2049    michel wart der liute nôt,
Verse: 2050    dô sie gesâhen den hêrren tôt.

Verse: 2051    Dar nâch was enbor lanc
Verse: 2052    daʒ Alexander gegen im spranc.

Verse: 2053    Pausônias die frowen hielt
Verse: 2054    ûf eim ors, der tumpheit wielt.

Verse: 2055    Alexanders güete entsleif.
Verse: 2056    Pausônias er begreif,

Verse: 2057    er warf in von dem orse nider,
Verse: 2058    ûf daʒ palas brâht er in wider,

Verse: 2059    er truoc den êrlôsen armen
Verse: 2060    mit gewalt zwischen sînen armen.

Verse: 2061    dô er den vater sach ligen tôt,
Verse: 2062    Pausônias leit die selben nôt.

Verse: 2063    die mit im wâren komen dar,
Verse: 2064    die dulten ouch die selben vâr,

Verse: 2065    der tôt iu ouch ir herze brach.
Verse: 2066    alsô er sînen vater rach.

Verse: 2067    grôʒ was des volkes ungehabe.
Verse: 2068    den künec sie brâhten ze dem grabe:

Verse: 2069    nâch ir ê nâch hôher art
Verse: 2070    der edle künec bestatet wart.

Verse: 2071       solt ich iu sagen von dem grabe
Verse: 2072    und von ir grôʒen ungehabe,

Verse: 2073    von ieglîches besunder clage:
Verse: 2074    daʒ geschæhe kûme in einem tage,

Verse: 2075    dar umb ichʒ verswîgen wil,
Verse: 2076    der rede wurde gar ze vil.

Verse: 2077    ir mugt daʒ alle wol wiʒʒen
Verse: 2078    daʒ sie sich jâmers vliʒʒen.

Verse: 2079    ir verliesen was niht cleine.
Verse: 2080    ze Korinthiâ lît der reine.

Verse: 2081    Alexander triuwe bescheinete,
Verse: 2082    den vater er sêre weinete:

Verse: 2083    man sach ouch in grôʒen pînen
Verse: 2084    daʒ süeʒe wîp erschînen.

Verse: 2085    ze allen zîten bî dem steine
Verse: 2086    vant man sie clagende aleine,

Verse: 2087    umbe irs lieben hêrren tôt
Verse: 2088    leit sie von jâmer grôʒe nôt.

Verse: 2089    ofte die guote phlac
Verse: 2090    daʒ sie unversunnen lac;

Verse: 2091    von sô grôʒen leiden
Verse: 2092    wær sie oft von leben gescheiden,

Verse: 2093    wann daʒ sie got erlôste
Verse: 2094    mit sîner helfe trôste,

Verse: 2095    der ie etswen dar sante,
Verse: 2096    der sie des tôdes erwante;

Verse: 2097    der ir die zene ûf clôʒte,
Verse: 2098    wîn oder waʒʒer in vlôʒte,

Verse: 2099    wie er eʒ gehaben mohte,
Verse: 2100    daʒ ir ze kraft dâ tobte.

Verse: 2101    sie hæten anders schiere erworben
Verse: 2102    daʒ die getriuwe wære erstorben.

Verse: 2103    sie erzeigte clagende triuwe.
Verse: 2104    jâmer mit ganzer riuwe

Verse: 2105    der reinen herze alsô besaʒ,
Verse: 2106    daʒ sie des nimmer vergaʒ

Verse: 2107    waʒ ze jâmer hôrte.
Verse: 2108    ir fröude gar zerstôrte

Verse: 2109    seneclîche wernde nôt,
Verse: 2110    die sie hete umb des künges tôt

Verse: 2111    sie was ein stam der güete,
Verse: 2112    ûʒ der herze vürbaʒ blüete

Verse: 2113    jâmer unde sorgen.
Verse: 2114    fröide ir was verborgen,

Verse: 2115    daʒ man die selten an ir sach:
Verse: 2116    von ir triuwen daʒ geschach.

Verse: 2117    alsô daʒ minneclîche wîp
Verse: 2118    quelte iren süeʒen lîp.

Verse: 2119       den man sô vil tugende giht,
Verse: 2120    daʒ den immer iht geschiht

Verse: 2121    wider irn willen, daʒ ist mir leit
Verse: 2122    (des geloubet mir ûf mînen eit),

Verse: 2123    wenn eʒ in wol zæme,
Verse: 2124    daʒ guot man von in næme

Verse: 2125    fröide, der sîn herze wurde frô.
Verse: 2126    wie kan der tôt tuon alsô,

Verse: 2127    daʒ er an süeʒen wîben
Verse: 2128    süeʒe vröude kan vertriben?




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.