TITUS
Ulrich von Eschenbach, Alexander
Part No. 20
Previous part

Chapter: 28  
Alexander ruft zum Feldzug gegen Darius


Verse: 2229       Er hete sinne bî jugent,
Verse: 2230    rehte zuht und ganze tugent.

Verse: 2231    an guoten siten niht betrogen
Verse: 2232    vil ritter grâven herzogen

Verse: 2233    ze beider sît man bî im sach,
Verse: 2234    den man grôʒer wîsheit jach,

Verse: 2235    daʒ sie die mit triuwen
Verse: 2236    lange heten gebiuwen:

Verse: 2237    die des vrô wâren
Verse: 2238    daʒ von sô kranken jâren

Verse: 2239    der hêrre solicher sinne phlac.
Verse: 2240    ieslîcher sich des bewac

Verse: 2241    ern solde niht vermîden,
Verse: 2242    ern wolde mit im lîden

Verse: 2243    beide übel unde guot.
Verse: 2244    alsô stunt ir aller muot,

Verse: 2245    sie heten willegeʒ herze dar.
Verse: 2246    sîner worte nâmen sie war,

Verse: 2247    die er mit wîsheit vür brâhte.
Verse: 2248       der hêrre des gedâhte

Verse: 2249    daʒ die zît in solde komen,
Verse: 2250    als dâ vor was genomen

Verse: 2251    zins von dem lande,
Verse: 2252    dô Darîus nâch sande.

Verse: 2253    sîn hêrren er gemeine bat
Verse: 2254    'gebt mir und ouch iu selben rât,

Verse: 2255    waʒ wir tuon oder lâʒen.
Verse: 2256    sich beginnet der keiser des niht mâʒen,

Verse: 2257    er sende her nâch zinse:
Verse: 2258    jâ möht er ûʒ hertem vlinse

Verse: 2259    senfter guot gewinnen,
Verse: 2260    dann daʒ im wirt von hinnen.

Verse: 2261    wart waʒ iuwer wille sî.
Verse: 2262    ich wil wesen vor im frî.

Verse: 2263    Ich wil dar nâch trahten
Verse: 2264    wie ich daʒ müge geahten

Verse: 2265    und mit welchen sachen
Verse: 2266    ich müge iuch frî machen.

Verse: 2267    ich hân mich doch des bewegen,
Verse: 2268    daʒ ich wil strîtes gegen im phlegen.

Verse: 2269    ich hân gemaches mich verzigen.
Verse: 2270    ich sol mich niht verligen,

Verse: 2271    ich muoʒ lop erwerben,
Verse: 2272    ob michs niht wendet ein sterben.

Verse: 2273    ich setze mînes gelückes teil
Verse: 2274    an sîn verdienteʒ unheil.

Verse: 2275    wer gît im sô tummen rât,
Verse: 2276    daʒ er solich unfuoge begât,

Verse: 2277    daʒ er ûf sîn ungelingen
Verse: 2278    die fürsten unfuoge kan twingen?

Verse: 2279    er sol haben mînen haʒ.
Verse: 2280    wer niht enhabe, der sage mir daʒ;

Verse: 2281    den wil ich nâch mînen staten
Verse: 2282    sô ich beste kan berâten.

Verse: 2283    mîn habe blîbet iu ungespart.
Verse: 2284    seht daʒ ir iuch sô bewart,

Verse: 2285    daʒ ir sît wol varnde
Verse: 2286    mit mir die reise niht sparnde.'

Verse: 2287       Dô die hêrren heten gehôrt
Verse: 2288    des unverzagten künges wort,

Verse: 2289    ze hant bâten sie dô
Verse: 2290    den werden Permêniô,

Verse: 2291    daʒ er dem künge sagte
Verse: 2292    wol in die rede behagte;

Verse: 2293    sie wolden im alle sîn bereit
Verse: 2294    dienstes unde stætikeit.

Verse: 2295    Parmêniô sprach zühteclîche
Verse: 2296    'edler künic rîche,

Verse: 2297    hœrent iuwer liute wort,
Verse: 2298    als ich von in hân gehôrt.

Verse: 2299    baʒ dann ich gereden kan,
Verse: 2300    diz volc ist iu gerne undertân,

Verse: 2301    wie ir, hêrre, geruochet,
Verse: 2302    waʒ ir an sie suochet,

Verse: 2303    daʒ wellen sie willeclîche
Verse: 2304    tuon al gelîche.

Verse: 2305    ob man uns sæhe in wirde siten,
Verse: 2306    wir solden iuch des, hêrre, biten

Verse: 2307    daʒ ir uns vor habt gesagt.
Verse: 2308    wir sehen iuch als unverzagt:

Verse: 2309    uns sol des niht betrâgen,
Verse: 2310    wir wellen mit iu wâgen

Verse: 2311    den lîp und alleʒ daʒ wir hân.
Verse: 2312    dâ mit lât daʒ alsô bestân,

Verse: 2313    unz nâch dem zinse boten komen.
Verse: 2314    sô ir daʒ habt vernomen,

Verse: 2315    ir sult iuch zühte nieten,
Verse: 2316    im schône wider enbieten

Verse: 2317    alleʒ daʒ iuwer wille sî.
Verse: 2318    lât iu witze wesen bî,

Verse: 2319    dar umbe iuch die wîsen
Verse: 2320    ze allen zîten prîsen.

Verse: 2321    gehabt iuch wol und sît frô.
Verse: 2322    schaft eʒ die wîle alsô,

Verse: 2323    sô ir von dem lande vart,
Verse: 2324    daʒ ir eʒ lât alsô bewart,

Verse: 2325    ob eʒ suoche ein vremdeʒ her,
Verse: 2326    daʒ manʒ iht vinde âne wer.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.