TITUS
Ulrich von Eschenbach, Alexander
Part No. 21
Previous part

Chapter: 40  
Heerschau vor Corinthus


Verse: 2327       Mit vrœlîchem muote
Verse: 2328    dancte in der guote.

Verse: 2329    'ir habt iuch wol besprochen.
Verse: 2330    deiswâr nû wirt gerochen

Verse: 2331    alleʒ daʒ die Asiân
Verse: 2332    uns ze leide haben getân.

Verse: 2333    nû hœret mê daʒ ich iu sage.
Verse: 2334    von hiute über vierzehen tage

Verse: 2335    sô wil ich herschouwunge hân
Verse: 2336    vor Corinthus ûf dem plân.

Verse: 2337    dar sult ir komen alle,
Verse: 2338    den mîn gebot gevalle.'

Verse: 2339    er begunde rîchlîche geben
Verse: 2340    und ahte niht ûf swacheʒ leben.

Verse: 2341    ein milte machte ir leben veil.
Verse: 2342    sie wurden von sîner gâbe geil.

Verse: 2343    die ê lâgen sam die wîp,
Verse: 2344    die wolden banchen nû den lîp.

Verse: 2345    sie begunden sich rotieren,
Verse: 2346    einander pungieren

Verse: 2347    die âbende ûf dem velde.
Verse: 2348    eʒ wart ze widergelde

Verse: 2349    etslîcher von des andern hant
Verse: 2350    vil harte gevellet ûf den sant.

Verse: 2351       Ze dem tage als der künic sprach
Verse: 2352    daʒ her man schône ligen sach

Verse: 2353    vor Corinthus ûf dem plân:
Verse: 2354    nâch sîme gebot daʒ was getân.

Verse: 2355    sie lâgen in den ouwen.
Verse: 2356    dô begunde der künic schouwen,

Verse: 2357    waʒ er liute mohte hân,
Verse: 2358    die im wolden bî gestân.

Verse: 2359    nû tet des valsches gegenniet,
Verse: 2360    als im Permêniô ê riet.

Verse: 2361    vier alte werde man
Verse: 2362    er mit zühten vür sich hieʒ gân.

Verse: 2363    er bevalh in liute unde lant,
Verse: 2364    zwei tûsent volkes er in benant,

Verse: 2365    daʒ in warten solde,
Verse: 2366    so er von dem lande wolde.

Verse: 2367    die viere wâren fürsten hêr.
Verse: 2368    sie kunden wol geben lêr

Verse: 2369    und rât ze strîtes dingen,
Verse: 2370    dâ von den vînden muoste misselingen.

Verse: 2371       Ich wil iu die werden nennen,
Verse: 2372    daʒ ir ir namen mugt erkennen.

Verse: 2373    der liute mac ich iuch niht gewern,
Verse: 2374    des sol iuwer dheiner gern.

Verse: 2375    daʒ eine was der milde,
Verse: 2376    der mit sînem schilde

Verse: 2377    ritters werc hât geworht
Verse: 2378    in mangen landen unervorht,

Verse: 2379    der burcgrâve von Corinthiâ,
Verse: 2380    Thedalûn man in nante dâ.

Verse: 2381    Passigweiʒ der ander hieʒ.
Verse: 2382    des herze daʒ nie gelieʒ

Verse: 2383    daʒ ze prîse tohte,
Verse: 2384    wâ erʒ getuon mohte.

Verse: 2385    sîn ellen ie nâch prîse strebte,
Verse: 2386    die wîle daʒ der werde lebte.

Verse: 2387    sîn leben was von arte hô:
Verse: 2388    er phlac des landes Macedô.

Verse: 2389    der clâre süeʒe Philodant
Verse: 2390    was der dritte genant,

Verse: 2391    der ze Nâpels des hordes phleger was.
Verse: 2392    lûter als ein spiegelglas

Verse: 2393    was er mit tugenden reine.
Verse: 2394    der werlde gemeine

Verse: 2395    was er von sîner tât erkant:
Verse: 2396    sô werden prîs erwarp sîn hant.

Verse: 2397    der hovegrâve was der vierte,
Verse: 2398    der daʒ lant wol zierte

Verse: 2399    mit tagenden und mit prîse.
Verse: 2400    Justînus hieʒ der wîse,

Verse: 2401    er was ein fürste von art.
Verse: 2402    mit den vieren was daʒ lant bewart.

Verse: 2403       Eʒ was rehte umb die zît
Verse: 2404    so got der werlde wunne gît,

Verse: 2405    sô der wîn in blüete stât,
Verse: 2406    dâ von man den herbest hât

Verse: 2407    volle kophe bî den koln.
Verse: 2408    die zît wir gerne mugen doln,

Verse: 2409    die uns mit ir güete
Verse: 2410    ruochet ûʒ der blüete

Verse: 2411    scharphen most und guoten wîn.
Verse: 2412    dô sich verphihten in

Verse: 2413    der tavernen kinder:
Verse: 2414    sô sie vernemen den winder,

Verse: 2415    eʒ dunket sie in der staben guot.
Verse: 2416    alsô stêt in der muot

Verse: 2417    wie sie gense und veiste brâten zern,
Verse: 2418    dâ mit sie sich der sorgen wern.

Verse: 2419    die wunne sie gern wolden hân
Verse: 2420    vür die der meie bringen kan.

Verse: 2421       Der junge und niht der tumbe
Verse: 2422    reit under dem her al umbe.

Verse: 2423    alle die dâ wâren
Verse: 2424    under sehzic jâren,

Verse: 2425    die hieʒ er sich bereiten
Verse: 2426    mit im zuo erbeiten

Verse: 2427    er hieʒ daʒ volc überal
Verse: 2428    scharn und ahten mit der zal.

Verse: 2429    Clitus sagt im daʒ mære,
Verse: 2430    daʒ des volkes wære

Verse: 2431    vier tûsent und vier hundert,
Verse: 2432    die er im hæte ûʒ gesundert.

Verse: 2433    man sach aldâ vor den scharn
Verse: 2434    guote ritter mit grâwen hârn,

Verse: 2435    den man des muoste jehen
Verse: 2436    daʒ man von in hete gesehen,

Verse: 2437    wie sie mit wirdiclîcher kraft
Verse: 2438    heten gevrumt ritterschaft.

Verse: 2439    die schar die im Glitus seit
Verse: 2440    wârn ze îsen wol bereit.

Verse: 2441    man sach die grâwen in solichem site,
Verse: 2442    als in niht alter wonte mite.

Verse: 2443    man sach die fürsten ûʒ den scharn
Verse: 2444    vor den gezelten alsô varn,

Verse: 2445    daʒ er in muoste snelheit jehen,
Verse: 2446    der ir geverte hete gesehen.

Verse: 2447       Nû wolde der vuoʒgenger schar
Verse: 2448    ouch der künic nemen war.

Verse: 2449    die lâgen bî der strâʒe.
Verse: 2450    man ahte sie in der mâʒe

Verse: 2451    vür zwei und drîʒec tûsent oder baʒ,
Verse: 2452    die truogen ouch dem heiden haʒ.

Verse: 2453    er mohte unsanfte slâfen.
Verse: 2454    sie heten soliche wâfen,

Verse: 2455    die selben unwîsen,
Verse: 2456    beslagen wol mit îsen

Verse: 2457    lange stangen und helmbarten,
Verse: 2458    dâ mit vil mange scharten

Verse: 2459    die vil ungehiure diet
Verse: 2460    sît durch glanze helme schriet;

Verse: 2461    hacken unde kiulen,
Verse: 2462    dâ mit sie vromten biulen;

Verse: 2463    sie heten ouch scharphe gabilôt,
Verse: 2464    dâ mit sie valten mangen tôt.

Verse: 2465    eʒ hete daʒ volc wilde
Verse: 2466    slingen, swert, sinewelle schilde;

Verse: 2467    der wer sie ouch genuʒʒen,
Verse: 2468    dâ mit sie mangen schuʒʒen.

Verse: 2469    er dorfte wol ze solichem spil,
Verse: 2470    moht er haben, liute vil.

Verse: 2471    zwâr mich wundert sêre
Verse: 2472    wie er sô küene wære,

Verse: 2473    daʒ er sô gewaltigen man
Verse: 2474    mit sô vil volkes torste bestân

Verse: 2475    und strîtes sich gegen dem bewac,
Verse: 2476    der allen fürsten obe lac.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.