TITUS
Ulrich von Eschenbach, Alexander
Part No. 23
Previous part

Chapter: 38a  
Über Theben (König Edippus)


Verse: 2761       Er ructe vürbaʒ mit dem her.
Verse: 2762    Thêbas vant er wol ze wer.

Verse: 2763    ôwê, nû vürht ich harte sîn.
Verse: 2764    Thêbâner lêrten in strîte pîn,

Verse: 2765    sie kunden vrumen wunden,
Verse: 2766    des die wol enphunden

Verse: 2767    die von in wurden erslagen.
Verse: 2768    als ich in nû wil sagen,

Verse: 2769    Thêbâner strît an erbet.
Verse: 2770    vil fürsten sie haben verterbet.

Verse: 2771    Amphiôn ein künic was,
Verse: 2772    der daʒ rîche Thêbas

Verse: 2773    vil gewalteclîche hielt.
Verse: 2774    sîn wîp hôchverte wielt,

Verse: 2775    Niôbês was die genant.
Verse: 2776    einen siten het daʒ lant.

Verse: 2777    ze êren und ze minne
Verse: 2778    Latônê, der gotinne,

Verse: 2779    daʒ volc opher brâhte.
Verse: 2780    Niôbê daʒ versmâhte

Verse: 2781    daʒ sie die êrte mit gebet
Verse: 2782    und ir selbe die êre niht tet.

Verse: 2783    Niôbês wart des in ein:
Verse: 2784    eins tages dô daʒ volc in opher schein,

Verse: 2785    von golde und sîden rîche cleit
Verse: 2786    die frouwe gâhes an sich leit;

Verse: 2787    dem volke sie engegen kam,
Verse: 2788    daʒ opher sie in nam,

Verse: 2789    irre zuht sie vergaʒ.
Verse: 2790    'Latônâ sol haben mînen haʒ

Verse: 2791    und wer des immer beginnet,
Verse: 2792    daʒ er ir opher bringet

Verse: 2793    oder erbiut kein êre.
Verse: 2794    ich wânde ich frouwe wære

Verse: 2795    des rîches und der lande,
Verse: 2796    nû erbiet ir mir die schande

Verse: 2797    daʒ ir iuwer sinne
Verse: 2798    kêret an ein gotinne,

Verse: 2799    der helfe iu ist vor verspart
Verse: 2800    und doch nie iuwer frouwe wart.'

Verse: 2801       Latônâ daʒ sêre clagte.
Verse: 2802    ir tohter Diânen die eʒ sagte

Verse: 2803    und Phêbo irm suon.
Verse: 2804    dem gunde ir laster wê tuon.

Verse: 2805    grôʒ zorn sîn herze bevienc.
Verse: 2806    solich râche er begienc,

Verse: 2807    der wir hœren glîche ninder.
Verse: 2808    Niôbês het vierzehen kinder,

Verse: 2809    siben meide und siben knehte.
Verse: 2810    sie wârn von edelm geslehte,

Verse: 2811    als ich die rede hôrte.
Verse: 2812    der leben Phêbus stôrte:

Verse: 2813    alle er sie ze tôde sluoc.
Verse: 2814    dar umb Niôbês in herzen truoc

Verse: 2815    kummer unde riuwe:
Verse: 2816    der was ir alsô niuwe

Verse: 2817    daʒ sie umb ir lieben kint
Verse: 2818    immer mê clagte sint.

Verse: 2819    sie wart ze eime steine.
Verse: 2820    alsô ich daʒ meine,

Verse: 2821    daʒ irm senenden herzen hart
Verse: 2822    vröude und wunne wart verspart,

Verse: 2823    niht daʒ kunde erweichen
Verse: 2824    daʒ ir vröide mohte reichen.

Verse: 2825       Ich wil iu mordes mê verjehen,
Verse: 2826    der nâch Amphiôn ist geschehen.

Verse: 2827    dô was ein künec hieʒ Lâyus.
Verse: 2828    dem was gewîssagt alsus

Verse: 2829    daʒ von im ein kint kæme,
Verse: 2830    daʒ im sîn leben næme.

Verse: 2831    die frowe eines kindes swanger was.
Verse: 2832    dô die zît kam daʒ sie genas,

Verse: 2833    dem künge man daʒ sagte.
Verse: 2834    niht wol im daʒ behagte

Verse: 2835    daʒ daʒ kint was ein kneht.
Verse: 2836    er vorhte im hæte reht

Verse: 2837    und wâr sîn wîssage gesagt.
Verse: 2838    der künec der was gar verzagt.

Verse: 2839    man sach den hêrren vil unfrô.
Verse: 2840    der künegîn gebôt er sô

Verse: 2841    daʒ sie daʒ kint tœten hieʒe
Verse: 2842    und bî leben niht enlieʒe:

Verse: 2843    wolt sie daʒ gebot vermîden,
Verse: 2844    sie müeste selbe lîden

Verse: 2845    von sînen handen den tôt.
Verse: 2846    die frouwe waʒ in grôʒer nôt.

Verse: 2847    alsô die guote sprach
Verse: 2848    'sô leide mir nie mê geschach.

Verse: 2849    waʒ sol mîn ungetriuweʒ leben,
Verse: 2850    sît ich mit willen dem tôt muoʒ geben

Verse: 2851    die fruht, die von mir ist geborn?
Verse: 2852    wie haben die gote irn zorn

Verse: 2853    sô starke geworfen ûf mich!
Verse: 2854    alze grôz ist ir gerich.'

Verse: 2855    daʒ kint sie ofte kuʒte,
Verse: 2856    sie druct eʒ zuo ir bruste.

Verse: 2857    'ôwê, nû truoc dich doch mîn lîp.
Verse: 2858    waʒ sol ich nû unsælic wîp ?

Verse: 2859    jâ wolt ich gerne niht genesen
Verse: 2860    daʒ dû bî lîbe soldest weʒen:

Verse: 2861    jâ vorht ich aleine daʒ,
Verse: 2862    als uns der wîssage maʒ,

Verse: 2863    daʒ mîn hêrre daʒ leben von dir verlür,
Verse: 2864    dâ von ich grôʒen schaden kür:

Verse: 2865    umbe mich wurde guot rât.
Verse: 2866    ôwê der grôʒen missetât,

Verse: 2867    der man mir immer sol jehen.
Verse: 2868    dar umb sol man mich trûric sehen.'

Verse: 2869       Der frouwen wîplich triuwe riet,
Verse: 2870    die sich von wirden nie geschiet.

Verse: 2871    dâ von in getriuwer site
Verse: 2872    immer mê muoʒ volgen mite;

Verse: 2873    von ir triuwe ir süeʒe kan erwarmen,
Verse: 2874    daʒ sie sich kunnen erbarmen,

Verse: 2875    dâ der manne herze ist hart,
Verse: 2876    alsô sint sie mit guote bewart.

Verse: 2877    des ouch daʒ kint geniuʒet hie.
Verse: 2878    ich wil iu sagen wie.

Verse: 2879    dô die vil guote
Verse: 2880    saʒ in swærem muote,

Verse: 2881    eines sie gedâhte
Verse: 2882    daʒ ir doch cleinen trôst brâhte.

Verse: 2883    daʒ kint hieʒ sie bewinden
Verse: 2884    mit sîdenen tuochen linden;

Verse: 2885    ein veʒʒel sie bereiten hieʒ
Verse: 2886    (mit blî sie daʒ bewirken lieʒ),

Verse: 2887    dar in wart geschoben der knabe.
Verse: 2888    michel was ir ungehabe

Verse: 2889    und ir jâmer manicvalt.
Verse: 2890    daʒ kint legt man in einen walt.

Verse: 2891       Dô daʒ kint alsô gelac
Verse: 2892    in dem walde wol halp den tag,

Verse: 2893    nû kam ein hirte zehant.
Verse: 2894    bî dem kinde er rîcheit vant,

Verse: 2895    sîne güete ouch des gezam,
Verse: 2896    daʒ kint er frœlich zuo im nam.

Verse: 2897    mit im truoc eʒ der man
Verse: 2898    von dem walde ze hûse dan.

Verse: 2899    den hirten untriuwe flôch.
Verse: 2900    daʒ kint er lieplîche zôch,

Verse: 2901    als ob eʒ wær sîn eigen suon.
Verse: 2902    der hirte kunde wol triuwe tuon,

Verse: 2903    des der knappe dô genôʒ.
Verse: 2904    er wuohs sêre und was nû grôʒ.

Verse: 2905    in hete der alte gehêret
Verse: 2906    kurzewîle vil gelêret,

Verse: 2907    schâchzabel, schieʒen, seitenspil,
Verse: 2908    des kunde der junghêrre vil.

Verse: 2909    nâch manheit sîn herze ranc.
Verse: 2910    sîn edel art in des twanc

Verse: 2911    die im niht blîben dâ verjach.
Verse: 2912    zuo dem hirten er sprach

Verse: 2913    'hêrre, ir habt mir wol getân.
Verse: 2914    daz diene ich ob ich triuwe hân.'

Verse: 2915    er hete von dem hirten vernomen,
Verse: 2916    wie er im was zuo komen,

Verse: 2917    dar umbe wolt er des niht sparn,
Verse: 2918    er wolde die rede baʒ ervarn

Verse: 2919    und frâgte in der mære,
Verse: 2920    wer sîn vater wære.

Verse: 2921    er was starc, ein schœner man,
Verse: 2922    mit zühten schiet er von dan.

Verse: 2923       Polippus der hêrre hieʒ,
Verse: 2924    der in vil ungerne lieʒ ;

Verse: 2925    Edippus der knabe was genant.
Verse: 2926    in hern Phêbus lant

Verse: 2927    der junghêrre kam,
Verse: 2928    der in zuo gesinde nam.

Verse: 2929    er gap im cleider unde phert.
Verse: 2930    Edippus wart dem künge wert.

Verse: 2931    dô er wol ein jâr dâ beleip,
Verse: 2932    ein alteʒ leit in dannen treip

Verse: 2933    Edippus der was cluoc.
Verse: 2934    dem künge er sîn heimlich gewuoc,

Verse: 2935    den er durch sîn dienste bat
Verse: 2936    daʒ er im wolde geben rât,

Verse: 2937    wâ er sînen vater funde,
Verse: 2938    ob er in des bewîsen kunde.

Verse: 2939    Phêbus der künec in lêrte
Verse: 2940    daʒ er gegen Phocîdes kêrte.

Verse: 2941    urloup nam der junge man.
Verse: 2942    gegen der stat huop er sich sân,

Verse: 2943    im was der reise vil gâch.
Verse: 2944    vor im ein stat er ligen sach,

Verse: 2945    Dechlôn was die genant,
Verse: 2946    dâ er unwiʒʒende vant

Verse: 2947    Lâyum, den künec von Thêbas,
Verse: 2948    sînen vater; sîn muoter ouch dâ was.

Verse: 2949    für den künec er kam gegangen,
Verse: 2950    von dem er wart enphangen.

Verse: 2951    er frâgte in der mære
Verse: 2952    waʒ sîn gewerp dâ wære.

Verse: 2953    er sprach 'hêrre, anders niht,
Verse: 2954    wann töht ich iu ze dienste niht,

Verse: 2955    des wær ich, hêrre, iu bereit.'
Verse: 2956    den fürsten zuht niht vermeit,

Verse: 2957    er sprach 'daʒ wil ich gerne hân.'
Verse: 2958    ze gesinde enphienc er in sân.

Verse: 2959    er wart ze den benant
Verse: 2960    die vor im truogen îsengewant:

Verse: 2961    mit den er dienen solde,
Verse: 2962    des er im wol lônen wolde.

Verse: 2963       Eines tages dô der künic saʒ
Verse: 2964    in sînem palas unde aʒ,

Verse: 2965    sîn gedanc in dar zuo brâhte,
Verse: 2966    daʒ er vergeʒʒener dinc gedâhte

Verse: 2967    und an daz kint, daʒ was vercleit.
Verse: 2968    sîn herze im niuwen kummer seit.

Verse: 2969    eʒ tet im alte mære kunt.
Verse: 2970    dô Edippus vor im stunt,

Verse: 2971    mit vlîʒe er den knappen an sach.
Verse: 2972    sîn herze der wârheit im verjach

Verse: 2973    wie er daʒ kint wære,
Verse: 2974    dâ von er grôʒe swære

Verse: 2975    oder den rê enphâhen solde.
Verse: 2976    wenden er daz wolde.

Verse: 2977    heimelîche er gebôt
Verse: 2978    daʒ man in zehant slüege tôt.

Verse: 2979       Dô Edippus daʒ vernam,
Verse: 2980    ze sîme swerte er kam.

Verse: 2981    die alten und die jungen
Verse: 2982    alle gegen im drungen:

Verse: 2983    vellen er die begunde,
Verse: 2984    als er sich wern kunde,

Verse: 2985    er sluoc ir vil vor im tôt.
Verse: 2986    dem künge fuogt er die selben nôt.

Verse: 2987    alsô lange der strît werte,
Verse: 2988    unz daʒ die küniginne gerte

Verse: 2989    frides, ob sie den möhte hân.
Verse: 2990    den gap der unverzagte man:

Verse: 2991    im wart ouch fride von in gegeben.
Verse: 2992    alsô fristen sie ir leben.

Verse: 2993    ich muoʒ der rede vil gedagen:
Verse: 2994    solt ich die tât iu alle sagen

Verse: 2995    und entslieʒen gar diz mære,
Verse: 2996    ze lang die rede wære.

Verse: 2997       Dô sie Lâyum den künec verlurn,
Verse: 2998    durch sîn frümkeit sie disen kurn.

Verse: 2999    die hêrren wolden des niht enbern,
Verse: 3000    in muoste die küngîn minne wern.

Verse: 3001    dô diz alsô geschach,
Verse: 3002    daʒ man in dâ crône tragen sach,

Verse: 3003    im bôt mit minne werden lîp
Verse: 3004    beide sîn muoter und sîn wîp.

Verse: 3005    daʒ rîche gewaltic er besaʒ.
Verse: 3006    die âventiure sagt uns daʒ

Verse: 3007    die küniginne clâr
Verse: 3008    von im zwêne süne gebar:

Verse: 3009    der eine hieʒ Etiocles,
Verse: 3010    der ander Polimites.

Verse: 3011    der künic und die künigin
Verse: 3012    durch geselleclich gewin

Verse: 3013    mêr dan durch betrâgen
Verse: 3014    an irm bette lâgen.

Verse: 3015    sie sagten einander mære
Verse: 3016    swaʒ in geschehen wære.

Verse: 3017    sie sprach 'hêrre, saget mir!
Verse: 3018    von welhem geslehte sît ir?'

Verse: 3019    durch kein übel sie des frâgte.
Verse: 3020    Edippus die wârheit sagte

Verse: 3021    'Niht mer friunde ich mir gihe,
Verse: 3022    dann ich bî mir hie ligen sihe

Verse: 3023    und der zweier kindelîn,
Verse: 3024    die von uns geborn sîn.

Verse: 3025    niht mê hân ich friunde.
Verse: 3026    vil gerne ich mê ir fünde,

Verse: 3027    west ich sie wâ suochen.
Verse: 3028    wellen mîn die gote ruochen,

Verse: 3029    mir mac alsô wol geschehen,
Verse: 3030    als ob man hôrt mir vil der mâge jehen.

Verse: 3031    einen friunt ich noch hân,
Verse: 3032    der hât mir friuntlich getân,

Verse: 3033    Polippus der alde,
Verse: 3034    der mich vant in dem walde

Verse: 3035    und mich mit vlîʒe erzogen hât.
Verse: 3036    mîn triuwe in nimmer verlât,

Verse: 3037    dô mich der werde sît ermant,
Verse: 3038    wie er mich in dem walde vant.

Verse: 3039    in eime geziertem vaʒʒe
Verse: 3040    mich vant der valsches laʒʒe

Verse: 3041    under den boumen ûf dem gras,
Verse: 3042    dâ ich hin geworfen waʒ.

Verse: 3043    ich kunde in sô erbarmen,
Verse: 3044    zwischen sînen armen

Verse: 3045    truoc er mich an sîn gemach,
Verse: 3046    dâ mir alleʒ guot geschach.

Verse: 3047    er zôch mich in grôʒer wirde.
Verse: 3048    vil schœner gezierde,

Verse: 3049    die er mit mir enphienc,
Verse: 3050    umb und an er mir die hienc.

Verse: 3051    unz ich wart ze eime man
Verse: 3052    und ein teil mich versan,

Verse: 3053    Mîn herze mir alsô geriet,
Verse: 3054    mit urloube ich von im schiet.

Verse: 3055    mînen vater ich suochen began.
Verse: 3056    mir riet Phêbus, der wîse man,

Verse: 3057    daʒ ich ze Phocîdes kæme,
Verse: 3058    aller schierst ich dâ vernæme

Verse: 3059    und erfüere dâ rehte
Verse: 3060    welich wære mîn geslehte.

Verse: 3061    mîn dinc sich alsô anevienc,
Verse: 3062    daʒ gegen Dechlôn mîn reise gienc:

Verse: 3063    nû ist mîn dinc hie alsô komen
Verse: 3064    als du, frouwe, hâst vernomen.

Verse: 3065    mit minne du mich hâst beseʒʒen,
Verse: 3066    daʒ ich des vater hân vergeʒʒen

Verse: 3067    und mêr nâch im niht frâge.
Verse: 3068    ich hân vür alle mîne mâge

Verse: 3069    süeʒeʒ wîp dich erkorn
Verse: 3070    und vür die von den ich bin geborn.'

Verse: 3071       Dô sie die rede alsô vernam,
Verse: 3072    ir wîplich güete sêre erkam.

Verse: 3073    'ôwê mir mîner werdikeit!
Verse: 3074    nû wil mir grôʒ herzeleit

Verse: 3075    liep und fröide verdringen
Verse: 3076    und mich ze sorgen bringen.

Verse: 3077    jâmer mîn fröide wil verjagen.
Verse: 3078    mîn herze muoʒ nû gar verzagen.

Verse: 3079    waʒ sol ich armeʒ wîp nû tuon?
Verse: 3080    vil lieber man, du bist mîn suon.

Verse: 3081    ich bin die, die dich gebar
Verse: 3082    und nime dîn nû mit minne war.

Verse: 3083    dînen vater du, hêrre, hâst erslagen,
Verse: 3084    der anehêrren, die ich bî dir hân getragen.

Verse: 3085    iedoch sint die kinder mîn
Verse: 3086    von dir, ir anefrouwe ich bin

Verse: 3087    wie sol unser werden rât,
Verse: 3088    sît man sô grôʒer missetât

Verse: 3089    ûf uns immer beginnet jehen?
Verse: 3090    wie ist uns beiden sô geschehen?

Verse: 3091    wes mügen wir den goten danken ?
Verse: 3092    ei Pallas, wie du kanst wanken

Verse: 3093    an helfe gegen den dînen,
Verse: 3094    die dir in dienste erschînen.

Verse: 3095    wes sol ich dir gnâde sagen ?'
Verse: 3096    sich wolde mêren der süeʒen clagen.

Verse: 3097       Dô Edippus dise wort
Verse: 3098    mit der wârheit hete gehôrt,

Verse: 3099    sînen vater er an im selber rach,
Verse: 3100    durch sîn herz ein swert er stach.

Verse: 3101    alrest wart dô niuwe
Verse: 3102    jâmer unde riuwe.

Verse: 3103    'ôwê, daʒ ich ie wart geborn.
Verse: 3104    wie hân ich armeʒ wîp verlorn

Verse: 3105    zwêne man, vater unde kint!
Verse: 3106    herze, dich jâmers underwint,

Verse: 3107    der sol dir immer wesen mite.
Verse: 3108    ich wil in hân vor fröiden site,

Verse: 3109    ich wil nimmer werden frô.
Verse: 3110    wie tuot der tôt an mir alsô,

Verse: 3111    daʒ er mich niht tôdes wert!
Verse: 3112    mîn herze doch niuwan sterbens gert.

Verse: 3113    sît unser gote an mir verzagen,
Verse: 3114    sô wil ichʒ dem gote clagen,

Verse: 3115    der himel und erde hât geschaffen:
Verse: 3116    ich wæne uns dise affen.

Verse: 3117    ich hœre got vil gewaltes jehen,
Verse: 3118    daʒ alle dinc sint von ime geschehen:

Verse: 3119    sîn kraft sol mir der erzeigen
Verse: 3120    und mich an lîbe veigen.

Verse: 3121    tôt, dich niht ensûme,
Verse: 3122    der werlde von mir rûme,

Verse: 3123    geruoche mînem swachen leben
Verse: 3124    mit dîner kraft ein ende geben.

Verse: 3125    waʒ sol ich der werlde mêr?'
Verse: 3126    man seit mir daʒ solich herzen sêr

Verse: 3127    der süeʒen herze durchsneit,
Verse: 3128    daʒ sie der tôt niht vermeit.

Verse: 3129       Die zwei kint, die nâch in bliben,
Verse: 3130    die âventiure hât von in geschriben,

Verse: 3131    dô sie nû wâren worden grôʒ,
Verse: 3132    ûf Etioclem viel daʒ lôʒ

Verse: 3133    daʒ er des rîches solde phlegen,
Verse: 3134    Polimites muost sich des bewegen.

Verse: 3135    Etiocles grôʒer sterke wielt.
Verse: 3136    Polimites vor milte niht behielt.

Verse: 3137    dar umbe maneger mit im fuor,
Verse: 3138    dô er von lande sîn reise swuor.

Verse: 3139    in Kriechen lant er kam,
Verse: 3140    des künges Adrastus tohter er nam.

Verse: 3141    mit dem sweher er daʒ an truoc,
Verse: 3142    daʒ der Krieche sich des bewuoc,

Verse: 3143    er wolde den eidem rechen,
Verse: 3144    mit Polimiten sprechen

Verse: 3145    ûf Thêbas daʒ lant erbeschaft.
Verse: 3146    er besamet sich mit grôʒer kraft.

Verse: 3147    selb sibende er fürste was
Verse: 3148    die mit im fuoren gegen Thêbas

Verse: 3149    und kâmen dar mit grôʒem her.
Verse: 3150    Etioclem funden sie mit wer.

Verse: 3151    ich wil diz mit kürze sagen,
Verse: 3152    die siben fürsten dâ wurden erslagen.

Verse: 3153    von Eurôpâ der künec Adrastus,
Verse: 3154    mit im herzoge Thideus,

Verse: 3155    Polimites wart ouch dâ gevalt,
Verse: 3156    der sînen tôt vil sûre galt.

Verse: 3157    der herzoge Parthonopêjus,
Verse: 3158    von dem sagt daʒ mære alsus

Verse: 3159    daʒ der stalte solichen mort,
Verse: 3160    des sie noch gedenken dort.

Verse: 3161    der strît von im alsô geriet,
Verse: 3162    fünfhundert er von leben schiet,

Verse: 3163    ê daʒ der hêrre werde
Verse: 3164    gevalt wurd ûf die erde.

Verse: 3165    ein fürste hieʒ Amphiorâus,
Verse: 3166    Ipomedôn und Capanêus,

Verse: 3167    ê die drî dâ tôt beliben,
Verse: 3168    sô getâne ritterschaft sie triben,

Verse: 3169    daʒ die Thêbânen dûhte ze vil.
Verse: 3170    sie brâhten ûf des tôdes zil

Verse: 3171    wol tûsent man oder mêr.
Verse: 3172    alsô ergienc der siben fürsten rêr,

Verse: 3173    die von leben schiet des tôdes pîn.
Verse: 3174    Alexander nû förht ich dîn.

Verse: 3175    einen trôst ich doch hân,
Verse: 3176    daʒ dir die sælde heiles gan.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.