TITUS
Ulrich von Eschenbach, Alexander
Part No. 24
Previous part

Chapter: 38  
Alexander erobert Theben


Verse: 3177       Thêbâner heten sich bewegen
Verse: 3178    sie wolden mit im strîtes phlegen.

Verse: 3179    des heten sich die vermeʒʒen,
Verse: 3180    die die stat heten beseʒʒen.

Verse: 3181    die stat mit liuten was bewart,
Verse: 3182    ir tor wâren vaste verspart.

Verse: 3183    die stat was vil veste
Verse: 3184    und ein burc die beste,

Verse: 3185    die in dem lande inder was.
Verse: 3186    dâ vür hât man noch Thêbas.

Verse: 3187    dâ von im guoten trôst gehieʒ
Verse: 3188    daʒ volc sich ûf die veste verlieʒ

Verse: 3189    und sazten sich dem künge wider:
Verse: 3190    dâ von sie schaden enphiengen sider.

Verse: 3191    der künec sant einen boten dar,
Verse: 3192    daʒ der næme irs willen war:

Verse: 3193    Hector wart dar gesant.
Verse: 3194    der reit hin alzehant

Verse: 3195    ze den vînden gegen der stat.
Verse: 3196    frides er die innern bat.

Verse: 3197    einer her abe wider in sprach,
Verse: 3198    der im die wîle frides jach,

Verse: 3199    unz daʒ er gesagte,
Verse: 3200    waʒ im ze reden behagte.

Verse: 3201    'welt ir witze walten,
Verse: 3202    sô sult ir niht lange halten.

Verse: 3203    redent bî der zît waʒ ir welt
Verse: 3204    und schaffent iuch wider ûf daʒ velt,

Verse: 3205    habt niht ze lange hie vor.'
Verse: 3206    dô sprach der starke Hector

Verse: 3207    'iuwer hêrre von dem lande
Verse: 3208    mich her zuo iu sande,

Verse: 3209    daʒ ir im die stat ûf tuot.'
Verse: 3210    er sprach 'des habt deheinen muot

Verse: 3211    warumb ir sult im dienen,
Verse: 3212    ir erlâʒent uns iuwers vienen.

Verse: 3213    welt ir niht anders sagen,
Verse: 3214    ir muget der rede wol gedagen.

Verse: 3215    die wîle ir uns so nâhe sît,
Verse: 3216    ir muget gewinnen übel zît.

Verse: 3217    iuwer munt ze hêrren uns des giht,
Verse: 3218    des wir ze hêrren wellen niht.'

Verse: 3219       Hector sprach 'waʒ frides ist daʒ?
Verse: 3220    tragt ir mir dar umbe haʒ,

Verse: 3221    daʒ ich iu rede tuo erkant,
Verse: 3222    als mich der künec hât gesant?

Verse: 3223    daʒ ist wunderlîcher site,
Verse: 3224    ir krenkent iuch sêre dâ mite.

Verse: 3225    ich râte iu daʒ ir iuwern muot
Verse: 3226    gegen dem künge kêrent in guot:

Verse: 3227    daʒ dunket mich wîslich getân,
Verse: 3228    ob ir niht schaden welt enphân.'

Verse: 3229    'wir geben umb iuwers hêrren drô',
Verse: 3230    ze drîʒic jâren niht ein strô

Verse: 3231    und umb iuwer aller haʒ.
Verse: 3232    rîtent hin und sagt im daʒ.'

Verse: 3233    dô sprach der junge und valsches laʒ
Verse: 3234    'ir sult iuch bedenken baʒ.

Verse: 3235    vil lieber mir wære,
Verse: 3236    daʒ ich im bræhte die mære,

Verse: 3237    die er gerne hôrte.'
Verse: 3238    'uns verdriuʒet iuwer worte,

Verse: 3239    die ir tâlanc gegen uns tuot.
Verse: 3240    iuwer claffen uns sêre muot.

Verse: 3241    ir müeʒt im dienst erzeigen,
Verse: 3242    ir Kriechen sît sîn eigen:

Verse: 3243    sô sî wir von den goten frî.
Verse: 3244    halt uns niht ze lange bî

Verse: 3245    und tuot zuo den vlans.
Verse: 3246    zwâr wann wæret ir niht ein gans,

Verse: 3247    ir möhtet wol zeimâl hœren.
Verse: 3248    solt ir uns gar zerstœren?

Verse: 3249    daʒ von im nimmer wirt getân.
Verse: 3250    cleine sorge wir des hân;

Verse: 3251    wir werden im nimmer dienesthaft.
Verse: 3252    sust hab wir alsô grôʒe kraft,

Verse: 3253    daʒ wir uns sîn mit strîte wern.
Verse: 3254    heiʒent in varn die eiger zern

Verse: 3255    dâ heime mit den kinden
Verse: 3256    solde man in noch vinden

Verse: 3257    den tophe umbe trîben.
Verse: 3258    wil er mit gemache blîben,

Verse: 3259    er sol von hinnen gâhen
Verse: 3260    ob er niht wil enphâhen

Verse: 3261    laster unde schande,
Verse: 3262    sô heb sich wider ze lande:

Verse: 3263    ob daʒ niht gâhes geschiht,
Verse: 3264    sînen schaden er gesiht:

Verse: 3265    wir beginnen des geruochen
Verse: 3266    daʒ wir in dâ ûʒe suochen,

Verse: 3267    den ir dâ füerent als einen gouch;
Verse: 3268    sô möht er lieber graben louch

Verse: 3269    in sînes vater garten
Verse: 3270    und dâ heime der gense warten.'

Verse: 3271       Dô Hector die rede vernam,
Verse: 3272    wider ze sînem hêrren er kam.

Verse: 3273    er sagte im die scheltwort,
Verse: 3274    als er von in hete gehôrt.

Verse: 3275    er sprach 'ich hân engolten
Verse: 3276    der botschaft, ich bin bescholten,

Verse: 3277    bœser worte man mir verjach.'
Verse: 3278    mit guotem siten der künic sprach

Verse: 3279    'sol uns die êre geschehen
Verse: 3280    daʒ wir sie mugen hie ûʒe sehen,

Verse: 3281    als sie sich vermeʒʒen hân;
Verse: 3282    wirt daʒ sô von in getân,

Verse: 3283    wir sullen in die rede gelten
Verse: 3284    mit slegen sunder schelten.

Verse: 3285    wir bringen sie des innen,
Verse: 3286    ob sie uns unminnen,

Verse: 3287    daʒ wir in daʒ selbe tuon.'
Verse: 3288    Philôtas, Permêniônis suon,

Verse: 3289    zehant für den künic trat,
Verse: 3290    durch sîn dienest er in bat

Verse: 3291    daʒ er im erloubte
Verse: 3292    und in des willen niht roubte,

Verse: 3293    daʒ er der erste müeste sîn
Verse: 3294    der gegen in tæte strîtes schîn.

Verse: 3295    er hete daʒ gerne gerochen,
Verse: 3296    daʒ sînem bruoder was übel gesprochen.

Verse: 3297    die bete kunde beswærden
Verse: 3298    von Athêniâ die werden,

Verse: 3299    die zehant ûf sprungen,
Verse: 3300    vür den künic sie drungen.

Verse: 3301    sie wâren mit ir bete sleht.
Verse: 3302    'hêrre, eʒ was ie unser reht

Verse: 3303    von alter her an dise zît,
Verse: 3304    daʒ wir hielten den êrsten strît.

Verse: 3305    des wel wir noch genieʒen.
Verse: 3306    lât iuch niht verdrieʒen

Verse: 3307    ir wolt uns bî dem siten lân'
Verse: 3308    den wir suln ze rehte hân.

Verse: 3309    wir wellen ir wênic schône
Verse: 3310    und in der hôchvart lônen,

Verse: 3311    daʒ sie sich ir vürbaʒ mâʒen
Verse: 3312    und immer mêr erlâʒen

Verse: 3313    gegen iu sô grôzer hôchvart.
Verse: 3314    in wirt sô enge die widervart,

Verse: 3315    komen sie niuwan hervor:
Verse: 3316    wir suln verrigeln in die tor,

Verse: 3317    daʒ der velde wîte und lenge
Verse: 3318    in wirt ze kurz und ze enge.'

Verse: 3319       Dem volke was sîner frumkeit
Verse: 3320    Cycropides der name geleit:

Verse: 3321    besunder man sie erkante,
Verse: 3322    wâ man sie in strîte nante,

Verse: 3323    wâ sie wâren in dem her
Verse: 3324    und ouch von irer snellen wer.

Verse: 3325    dem künge ir rede behagte.
Verse: 3326    den snellen er dô sagte,

Verse: 3327    er wolde sie bî irm rehte lân.
Verse: 3328    des dankten im die werden man.

Verse: 3329    ritter unde frouwen
Verse: 3330    wâren komen durch schouwen,

Verse: 3331    koutfliute und gebûre
Verse: 3332    in der stat ûf die mûre.

Verse: 3333    dâ vor des veldes wênic blecket.
Verse: 3334    mit gezelten eʒ was bedecket,

Verse: 3335    von manger varwe ersniten dach
Verse: 3336    man dar ûfe ligen sach.

Verse: 3337    in rôtem samît die löwen strebten
Verse: 3338    vil silberwîʒ als ob sie lebten.

Verse: 3339    daʒ velt erlûhte in der aht,
Verse: 3340    als des meien süeʒe hæte brâht

Verse: 3341    vil bluomen ze stiure der heide,
Verse: 3342    grüene und gel die beide,

Verse: 3343    rôt, wîʒ, brûn und blâ:
Verse: 3344    der aller varwe kôs man dâ.

Verse: 3345    die gezelt wârn gehêret,
Verse: 3346    grôʒ rîcheit dar an gekêret.

Verse: 3347    ich hæte gerne ein solichʒ velt,
Verse: 3348    daʒ mir sô rîcher frühte gelt

Verse: 3349    ze mînen nœten bræhte,
Verse: 3350    ob mir des got gedæhte.

Verse: 3351    ein grôʒ gezelt sie sâhen,
Verse: 3352    dem sie gemeine jâhen,

Verse: 3353    sie heten beʒʒerʒ nie gesehen,
Verse: 3354    ob sie der wârheit solden jehen.

Verse: 3355    der meister der sîn het erdâht,
Verse: 3356    mit kunst er eʒ wol het zuo brâht

Verse: 3357    in aht knoufe guldîn,
Verse: 3358    die gâben alsô liehten schîn,

Verse: 3359    daʒ er den ûf der veste
Verse: 3360    vaste in die ougen gleste.

Verse: 3361    von rôtem samît was sîn dach.
Verse: 3362    dar ûf man geströuwet sach

Verse: 3363    nâch der baniere
Verse: 3364    von löwen vil der tiere,

Verse: 3365    grôʒ gekrœnet silberwîʒ,
Verse: 3366    wol geworht mit vlîʒ:

Verse: 3367    ze guoter mâʒe grôʒ rubîn
Verse: 3368    gâben ûʒ den ougen schîn.

Verse: 3369    man kôs dar an grôʒ wunder.
Verse: 3370    heimelîche camern besunder

Verse: 3371    wâren dâ an aller sît.
Verse: 3372    eʒ hete hof, der was wît,

Verse: 3373    eʒ was ze guoter mâʒe hôch.
Verse: 3374    mit winden man eʒ ûf zôch.

Verse: 3375    an vier orten türne lâgen,
Verse: 3376    der des nahtes wehter phlâgen,

Verse: 3377    vier banier dar ûf gestecket
Verse: 3378    mit rîcher kost volrecket.

Verse: 3379    eʒ hete allen den gemach,
Verse: 3380    den man an gezelte ie gesach.

Verse: 3381    dar inne saʒ der werde.
Verse: 3382    nâhen bî der erde

Verse: 3383    was im der sitz bereit,
Verse: 3384    mit rîchen tepten gar durchleit.

Verse: 3385       Den jungen man schône sitzen sach,
Verse: 3386    dô dise rede vor im geschach.

Verse: 3387    der rehten wârheit ich niht weiʒ,
Verse: 3388    ob Gamuret vor Kanvoleiz

Verse: 3389    ie gesæze sô schône,
Verse: 3390    dô im bôt die krône

Verse: 3391    und ir süeʒe minne
Verse: 3392    Herzeloide, die küniginne.

Verse: 3393    Alexander hêrschaft phlac.
Verse: 3394    eʒ was nû über mittentac:

Verse: 3395    eʒ gebôt der unverzagte
Verse: 3396    daʒ man den valkenern sagte.

Verse: 3397    man sach an im rîcheʒ cleit.
Verse: 3398    die valken wâren dô bereit:

Verse: 3399    man habt sie von dem gezelde,
Verse: 3400    er reit mit in ze velde

Verse: 3401    gegen der stat durch reiʒen
Verse: 3402    mêr dann durch beiʒen.

Verse: 3403    dise reise er niht vermeit.
Verse: 3404    er reit in grôʒer werdikeit,

Verse: 3405    als er eʒ ziugen mohte
Verse: 3406    und sînen wirden tohte.

Verse: 3407    er beiʒte der stat sô nâhen,
Verse: 3408    daʒ sie herabe wol sâhen

Verse: 3409    die quecken ritter rîten
Verse: 3410    bî im ze beiden sîten.

Verse: 3411    daʒ gebeiʒe alsô ergienc,
Verse: 3412    etslîchen reiger man dâ vienc

Verse: 3413    und ouch etslîchen antvogel.
Verse: 3414    daʒ volc was ûf dem anger gogel.

Verse: 3415    eʒ reit der tugende rîche
Verse: 3416    dem wunsche gelîche.

Verse: 3417    er hete sô wunneclîchen lîp,
Verse: 3418    wenn in gesâhen die wîp,

Verse: 3419    ob sie niht kunden toben,
Verse: 3420    sie muosten in dar umbe loben.

Verse: 3421    den mantel, den er fuorte,
Verse: 3422    mit beiden orten ruorte

Verse: 3423    ûf dem anger daʒ graʒ,
Verse: 3424    daʒ iht lanc gewahsen was.

Verse: 3425    er hete umb sich gegurt sîn swert
Verse: 3426    nider starc. er reit wol gênde ein phert.

Verse: 3427    er fuort von bluomen einen kranz.
Verse: 3428    man sach den stolzen Gramoflanz

Verse: 3429    an der Sabîns bî sînen zîten
Verse: 3430    sô schône nie gerîten

Verse: 3431    noch mit cleidern sô gezieret,
Verse: 3432    als dâ reit der wol gefieret.

Verse: 3433       Durch schouwen in der zinne
Verse: 3434    lac die herzoginne.

Verse: 3435    dô sie den künic rîten sach,
Verse: 3436    ir rôter munt im wirde jach.

Verse: 3437    'mir ist liebe geschehen
Verse: 3438    daʒ ich den fürsten hân gesehen,

Verse: 3439    dem man sô vil tagende giht.
Verse: 3440    wol man an dem werden siht

Verse: 3441    daʒ sîn süeʒe reine art
Verse: 3442    vor missewende ist bewart.

Verse: 3443    er iʒt sô minniclich gevar.
Verse: 3444    wol dem wîbe, die in gebar!

Verse: 3445    wol sie, der er ze teile wirt!
Verse: 3446    waʒ der die sælde fröiden birt!

Verse: 3447    sie hât ze dirre werlde heil,
Verse: 3448    die enphæhet sîner minne teil.

Verse: 3449    wol der werden süeʒen zuht,
Verse: 3450    die bringen kan sô reine fruht.

Verse: 3451    hæten sinne dise man,
Verse: 3452    sie solden dich gerne ze hêrren hân.

Verse: 3453    wol der, die sich minne gegen dir bewigt!
Verse: 3454    waʒ minne lônes an dir ligt!

Verse: 3455    wær eʒ der manne wille gewesen,
Verse: 3456    bî den frouwen wær er wol genesen.'

Verse: 3457    eʒ was ir von herzen leit
Verse: 3458    daʒ er niht lange vor ir reit.

Verse: 3459    er kêrte von dem velde
Verse: 3460    mit den rittern gegen dem gezelde.

Verse: 3461       Nû was daʒ eʒʒen gereit.
Verse: 3462    nâch sîner gewonheit

Verse: 3463    der fürste ze tische saʒ.
Verse: 3464    vil werder ritter vor im aʒ.

Verse: 3465    man vernam in der stat überal
Verse: 3466    von vil busînen lûten schal.

Verse: 3467    dô was bereit (als mir gewuoc
Verse: 3468    der meister) alles des genuoc,

Verse: 3469    des rîchem künge gezam.
Verse: 3470    dô man die tischlachen abe nam,

Verse: 3471    jene des gewuogen
Verse: 3472    die die tambûre dô sluogen,

Verse: 3473    die huoben sich für die gezelt
Verse: 3474    vaste gegen der stat ûf daʒ velt.

Verse: 3475    sie machten alsô grôʒen schal,
Verse: 3476    der lûte in die stat hal,

Verse: 3477    flöutære, videlære,
Verse: 3478    als dâ ein hôchzît wære.

Verse: 3479    die innern sêre des verdrôʒ
Verse: 3480    daʒ dirre hôchvart was so grôʒ

Verse: 3481    und daʒ sie sô lange dâ beliben.
Verse: 3482    nâch eʒʒen den âbent sie vertriben

Verse: 3483    mit rîten ûf dem plange.
Verse: 3484    sie huoben schal mit sange

Verse: 3485    und begunden kurzewîle vil
Verse: 3486    mit manger hande fröidenspil,

Verse: 3487    des erdâhte Alexander,
Verse: 3488    hie ein storje, dort die ander,

Verse: 3489    die sich sêre wurren.
Verse: 3490    ir vrechen ors die kurren.

Verse: 3491    dirre viel, jener besaʒ,
Verse: 3492    dirre harte vürbaʒ,

Verse: 3493    jener ûf sitzens phlac,
Verse: 3494    dirre ûf dem anger lac:

Verse: 3495    alsô sich die jungen
Verse: 3496    ûf der planîe drungen.

Verse: 3497    die wîsen riten sich besehen,
Verse: 3498    wâ in daʒ möhte geschehen

Verse: 3499    daʒ sie in zuo möhten komen:
Verse: 3500    sie heten einhalp war genomen

Verse: 3501    wâ sie hin zuo solden,
Verse: 3502    sô sie stürmen wolden.

Verse: 3503    sie muosten des rîtens verphlegen:
Verse: 3504    die sunne het schînes sich bewegen,

Verse: 3505    des tages lieht abe nam,
Verse: 3506    die naht mit ir vinstere kam.

Verse: 3507       Dô der künc erbeiʒet was,
Verse: 3508    er sprach zuo Philôtas

Verse: 3509    'vor nieman ich daʒ hil,
Verse: 3510    ob mir dîn jugent volgen wil,

Verse: 3511    alleʒ daʒ ich ze êren
Verse: 3512    an dich mac gekêren,

Verse: 3513    daʒ wirt von mir niht verlân.
Verse: 3514    ich hân ouch den selben wan

Verse: 3515    ze allen den mînen,
Verse: 3516    die mir in dienste erschînen,

Verse: 3517    den wil ich sîn in triuwen mite.
Verse: 3518    nû sterkent an mir ouch triuwen site.

Verse: 3519    lât werdikeit an iuch erblüen
Verse: 3520    und schaffent, daʒ wir die vînde müen.

Verse: 3521    die stæte harnasch tragen vor mir,
Verse: 3522    Philôtas, die bevilh ich dir.

Verse: 3523    mit den solt du rîten
Verse: 3524    bî mir, wâ mir strîten.

Verse: 3525    Nicânor, daʒ ahte,
Verse: 3526    dîn sî hînt die wahte:

Verse: 3527    der sol nemen mit dir war
Verse: 3528    der Pellêus Antoclar.'

Verse: 3529       Der künec sich des bewac
Verse: 3530    die naht er in harnasche lac.

Verse: 3531    in was dô lieht niht tiure:
Verse: 3532    sie heten sô grôʒ fiure,

Verse: 3533    wie in des tages gebrach,
Verse: 3534    dâ von man doch verre sach.

Verse: 3535    des morgens dô der tac erschein,
Verse: 3536    die innern wâren worden in ein

Verse: 3537    daʒ sie des geruochten,
Verse: 3538    vür die stat sie suochten.

Verse: 3539    sie heten eine schœne schar.
Verse: 3540    die ûʒern wurden des gewar,

Verse: 3541    in der burger banier gesniten was
Verse: 3542    die gottinne Pallas,

Verse: 3543    die in vil hôchverte schuof.
Verse: 3544    der name in strîte was ir ruof.

Verse: 3545    Cycropides niht beiten,
Verse: 3546    zehant sie sich bereiten.

Verse: 3547    dise wâren von der stat nû komen.
Verse: 3548    Orestes het sich vor genomen.

Verse: 3549    grôʒer kraft der herzoge wielt,
Verse: 3550    menlich er ûf der planîe hielt,

Verse: 3551    als er erwunschet wære.
Verse: 3552    eʒ was der helt mære

Verse: 3553    gebieter über daʒ lant.
Verse: 3554    sîn manheit was dâ vür erkant,

Verse: 3555    daʒ man im hôhes prîses jach.
Verse: 3556    geflôrieret man in halten sach

Verse: 3557    under rîcher zimierde.
Verse: 3558    eʒ het sîn hôhe wirde

Verse: 3559    daʒ verdienet umb die wîp,
Verse: 3560    daz, sie zierten sînen lîp

Verse: 3561    mit schônheit von mangen landen,
Verse: 3562    die im die clâren sanden.

Verse: 3563    ern wolde niemans diener sîn
Verse: 3564    wann frowen Pallas der gotîn,

Verse: 3565    der er im ze frouwen jach,
Verse: 3566    an die er helfe sich versach.

Verse: 3567    eʒ hete dem werden Sarracîn
Verse: 3568    ouch sîn wîp, die herzogîn,

Verse: 3569    sînen wâpenroc gehêret,
Verse: 3570    gesteine dar ûf gerêret,

Verse: 3571    verworht in sîde und in golt.
Verse: 3572    im was daʒ wîplîche wîp sô holt

Verse: 3573    und minnet sêre sînen lîp:
Verse: 3574    alsam tet er daʒ werde wîp.

Verse: 3575    man sach den ellens vesten
Verse: 3576    sô die sunnen glesten.

Verse: 3577    die burger sêre brogten.
Verse: 3578    die geste gegen in zogten.

Verse: 3579       Dô sie nû wâren nâhen,
Verse: 3580    Eschinus begunde gâhen.

Verse: 3581    er wolde tjostierens phlegen
Verse: 3582    gegen dem fürsten bewegen.

Verse: 3583    sie ersprancten beide vor den scharn,
Verse: 3584    hurteclich sie kâmen gevarn,

Verse: 3585    ietslîcher daʒ ors mit sporn treip,
Verse: 3586    ir ietweders lanze dô ganz bleip.

Verse: 3587    der herzoge des geruochte
Verse: 3588    mit valle er den anger suochte:

Verse: 3589    von der tjost daʒ geschach,
Verse: 3590    hinder dem orse man in ligen sach.

Verse: 3591    niht lange er doch dâ nider lac.
Verse: 3592    der fürste solicher snelheit phlac,

Verse: 3593    daʒ er ân des burgrâven danc
Verse: 3594    sich wider ûf daʒ ors swanc.

Verse: 3595    dâ mite sie fuorten beide swert.
Verse: 3596    von Athêniâ den hêrren wert

Verse: 3597    brâhte der fürste in sorgen.
Verse: 3598    sie begunden einander borgen

Verse: 3599    slege und gelten ungezalt.
Verse: 3600    der burgrâve des fürsten kraft engalt:

Verse: 3601    er het im nâ vergolten
Verse: 3602    sîn vellen ûf die molten.

Verse: 3603    sie erzeigten beide einander nît
Verse: 3604    und tâten alsô herten strît,

Verse: 3605    daʒ in die manheit jâhen
Verse: 3606    die beider sît zuo sâhen.

Verse: 3607    ietslîcher swærer wunden enphant
Verse: 3608    aldâ von des andern hant.

Verse: 3609    dem burgrâven ein slac geriet,
Verse: 3610    durch zimierde und durch den helm verschriet

Verse: 3611    er den fürsten lobesam,
Verse: 3612    dâ von er widerkêre nam,

Verse: 3613    daʒ man in flühticlich sach varn
Verse: 3614    und vaste gâhen gegen sînen scharn.

Verse: 3615    er was verwunt sô sêre,
Verse: 3616    daʒ er sich immermêre

Verse: 3617    strîtes und ritterschaft bewac:
Verse: 3618    von dem slage er tôt gelac.

Verse: 3619    die sînen wârn noch sô bewegen,
Verse: 3620    daʒ sie doch strîtes wolden phlegen.

Verse: 3621    sich wolde mêren der werden zorn,
Verse: 3622    dô sie den hêrren heten verlorn.

Verse: 3623    sie dructen an daʒ fremde her.
Verse: 3624    nû was daʒ ouch der geste ger.

Verse: 3625    die schuʒʒen harte mit den bogen,
Verse: 3626    dô wart friuntschaft gar verphlogen.

Verse: 3627    die mit den spern ouch hancten,
Verse: 3628    die ros sie vaste ersprancten:

Verse: 3629    dô wart von in alsô gehurt,
Verse: 3630    man sach dâ manegen den furt

Verse: 3631    mit helme suochen in dem acker.
Verse: 3632    Cycropides wârn wacker.

Verse: 3633    sie brâhten Thêbâner in nôt
Verse: 3634    und frumten ir mangen vor in tôt.

Verse: 3635    man sach die unwîsen
Verse: 3636    vor den frechen rîsen,

Verse: 3637    als ob zîtige birn
Verse: 3638    durch schûr von dem boume rirn.

Verse: 3639    die stat dô volkes vil verlôs.
Verse: 3640    der künec dô kleinen schaden kôs.

Verse: 3641    waʒ liute dô lebendic was beliben,
Verse: 3642    die wurden in die stat getriben.

Verse: 3643    nâch den man nider lieʒ die tor.
Verse: 3644    ob ir deheiner bleip dâ vor,

Verse: 3645    der muoste lîden die selben nôt,
Verse: 3646    die man ê sînen geverten bôt.

Verse: 3647       Nû wâren tûsent wol bereit,
Verse: 3648    die sich durch sturm heten geleit

Verse: 3649    an die stat vür Thêbas,
Verse: 3650    die des âbendes verspehet was.

Verse: 3651    die fuozgenger kâmen,
Verse: 3652    daʒ harnasch sie nâmen

Verse: 3653    von den, die den lîp dâ verlurn
Verse: 3654    und ritterlîcheʒ ende kurn:

Verse: 3655    daʒ harnasch den povel fröut.
Verse: 3656    dâ lac der werden gnuoc geströut,

Verse: 3657    die von süeʒen wîben wurden beweinet,
Verse: 3658    den sie dienst mit triuwen heten bescheinet:

Verse: 3659    der heten die clâren vil verlorn.
Verse: 3660    jâmer wart von in niht verborn.

Verse: 3661    man sach die frowen dâ vor gebâren,
Verse: 3662    dô die helde bî lîbe wâren,

Verse: 3663    man kôs daʒ an ir gezirde
Verse: 3664    daʒ sie die wîp heten in wirde.

Verse: 3665       Die die stat heten belegen
Verse: 3666    die wolden nû solicher fuore phlegen,

Verse: 3667    der die innern verdrôʒ.
Verse: 3668    wie der schade wære grôʒ,

Verse: 3669    sie muosten sich dort innen
Verse: 3670    bergen hinder die zinnen.

Verse: 3671    eʒ was von clage überal
Verse: 3672    jæmerlîcher grôʒer schal

Verse: 3673    in der stat von den frouwen.
Verse: 3674    nû wâren mit ir houwen

Verse: 3675    und mit îserînen zwickeln,
Verse: 3676    mit scharphen steinbickeln,

Verse: 3677    mit starken hebstangen,
Verse: 3678    vesten unde langen,

Verse: 3679    komen an die mûre
Verse: 3680    die ungefüegen gebûre.

Verse: 3681    ir gebærde was ungewiʒʒen:
Verse: 3682    die mûre sie vaste riʒʒen.

Verse: 3683    der etslîcher den wurf enphienc,
Verse: 3684    daʒ im daʒ lachen vergienc.

Verse: 3685    wærn die tarschen niht gewesen
Verse: 3686    sô veste, ir wær deheiner genesen.

Verse: 3687    die ûʒern kunden sich bewarn.
Verse: 3688    sie sturmten mit geruoten scharn

Verse: 3689    an die stat wol vierzic tage.
Verse: 3690    ich sag iu die innern wârn in clage.

Verse: 3691    die ûʒern die mûre engunnen,
Verse: 3692    dâ von sie die stat gewunnen.

Verse: 3693    es geschach doch mit grôʒer nôt.
Verse: 3694    man truoc herabe ir mangen tôt,

Verse: 3695    der von der mûre erworfen wart.
Verse: 3696    ir vesten schilde hart

Verse: 3697    die unveigen ernerten.
Verse: 3698    von den sie sich erwerten,

Verse: 3699    die wâren unverdroʒʒen,
Verse: 3700    ir vielen hin vil erschoʒʒen.

Verse: 3701    den innern was die wîle lanc.
Verse: 3702    sie dulten von den liuten stanc,

Verse: 3703    daʒ sie kûme genâsen
Verse: 3704    von den ervelten âsen.

Verse: 3705       Der künic zuht niht vergaʒ,
Verse: 3706    er gebôt sînem volke daʒ,

Verse: 3707    daʒ eʒ der frouwen schônte:
Verse: 3708    wer ir deheine hônte

Verse: 3709    und in iht leides tæte,
Verse: 3710    sîner hulde er niht hæte.

Verse: 3711    daʒ ander volc hieʒ er vâhen
Verse: 3712    tœten unde slâhen.

Verse: 3713    nû was an der selben zît
Verse: 3714    die mûre gebrochen alsô wît,

Verse: 3715    daʒ sie riten dar în mit schar.
Verse: 3716    dô des die innern wurden gewar,

Verse: 3717    sie wâren in grôʒen sorgen
Verse: 3718    und hæten sich gerne verborgen,

Verse: 3719    hæte eʒ in gefrumet iht:
Verse: 3720    und enhalf eʒ sie niht.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.