TITUS
Ulrich von Eschenbach, Alexander
Part No. 25
Previous part

Chapter: 41  
Clyades bittet für Theben


Verse: 3721       Dô Alexander in die stat kam,
Verse: 3722    Clyades sîn lêre nam,

Verse: 3723    dem fürsten er engegen gienc,
Verse: 3724    mit vorhten er in enphienc

Verse: 3725    und mit lîren, daʒ er kunde.
Verse: 3726    dar ûfe er begunde

Verse: 3727    dise wort singen,
Verse: 3728    dem künge engegen springen:

Verse: 3729    'ô Macedô, allen fürsten ze starc,
Verse: 3730    an dir sich tugent nie verbarc.

Verse: 3731    du bist der gote geslehte.
Verse: 3732    tuo nâch dînem rehte,

Verse: 3733    lâ dich erbiten gerne.
Verse: 3734    die ordenunge der sterne

Verse: 3735    gunnen dir alles guotes wol.
Verse: 3736    alle werlt dir dienen sol.

Verse: 3737    die gotinne Clôtô,
Verse: 3738    die ist dînes lebens frô

Verse: 3739    Lachesis dîn leben lenget.
Verse: 3740    Atropos des wol gehenget,

Verse: 3741    sie enbrichet dir dîner tage niht:
Verse: 3742    sô gerne sie dich bî lîbe siht.

Verse: 3743    der gote fruht, nû volge mir
Verse: 3744    eines, daʒ wol zimet dir,

Verse: 3745    daʒ du gnâde gegen den begâst,
Verse: 3746    an den du sic genumen hâst.

Verse: 3747    (alsô het iu ouch gelêret
Verse: 3748    Aristotiles der gehêret.)

Verse: 3749    senfte, hêrre, dînen zorn.
Verse: 3750    von disem stuole du bist erkorn,

Verse: 3751    des mûre du vellest nider.
Verse: 3752    vaʒʒe dîn güete an dich wider.

Verse: 3753    du bist von hinnen frîer suon,
Verse: 3754    du solt den dînen gnâde tuon.

Verse: 3755    sippe dir die gote jehent,
Verse: 3756    die dich in irme geslehte spehent.

Verse: 3757    ich sage dir daʒ ungelogen,
Verse: 3758    hie sint der gote vil erzogen.

Verse: 3759    hie was Alcîdes wonhaft,
Verse: 3760    des tugent het sô grôʒe craft,

Verse: 3761    daʒ durch sîn tugent dem werden man
Verse: 3762    al die werlt was undertân;

Verse: 3763    den man noch vil sêre clagt,
Verse: 3764    wâ man von dem fürsten sagt.

Verse: 3765    süeʒer fürste, merke mich
Verse: 3766    sîne tugent hânt an dich,

Verse: 3767    werdeʒ kint, geerbet.
Verse: 3768    sît daʒ er ist ersterbet,

Verse: 3769    sô schaffe daʒ man alle tage
Verse: 3770    von dir die selben tugent sage.

Verse: 3771    sô dîn gewalt ie grœʒer sî,
Verse: 3772    deste mêr lâ dir bî

Verse: 3773    wonen tugent unde güete,
Verse: 3774    dar zuo habe frô gemüete.

Verse: 3775    du solt dich gerne erbarmen
Verse: 3776    über dîne armen.

Verse: 3777    daʒ rîche hât niht stætikeit,
Verse: 3778    daʒ niht vestet barmherzikeit.

Verse: 3779    haben dir die burger iht getân,
Verse: 3780    wilt du daʒ ungerochen niht lân,

Verse: 3781    sô erbarme dich doch über daʒ lant
Verse: 3782    daʒ die gote gestiftet hânt.'

Verse: 3783       Mit gesange was volbrâht
Verse: 3784    des Clyades hete gedâht

Verse: 3785    den fürsten ze êren.
Verse: 3786    der künic wolt et kêren

Verse: 3787    sînen haʒ an die stat.
Verse: 3788    swaʒ in Clyades gebat,

Verse: 3789    des künges gebôt was überhôrt,
Verse: 3790    man wîp kint wurden ermort,

Verse: 3791    sunder die dâ frouwe was:
Verse: 3792    selb vierde die genas.

Verse: 3793    die hieʒ der werde wîsen abe.
Verse: 3794    er lieʒ sie ouch bî solicher habe,

Verse: 3795    die sie nam vür guot.
Verse: 3796    eʒ wære noch reht, der wol tuot,

Verse: 3797    daʒ er des genüʒʒe ze aller zît.
Verse: 3798    nû gebôt vor schanden der gefrît

Verse: 3799    mûre unde türne brechen.
Verse: 3800    ungefüege kunde er sich rechen.

Verse: 3801    dô was genâde tiure.
Verse: 3802    dar nâch wart mit fiure

Verse: 3803    waʒ bliben was verswendet.
Verse: 3804    dâ mit sîn zorn sich endet.

Verse: 3805    Clyades von sîner kunst
Verse: 3806    bejagt aldâ des hêrren gunst.

Verse: 3807    wie er dô ûf der lîren sanc,
Verse: 3808    er hete mangen herten swanc

Verse: 3809    mit swerte durch die helme geben,
Verse: 3810    dâ von mangem swant sîn leben,

Verse: 3811    den man ûf dem wale blîben sach,
Verse: 3812    dô vor der stat der strît geschach.

Verse: 3813    von der geburt er edel was.
Verse: 3814    eʒ was wol daʒ er genas.

Verse: 3815    sich hete daʒ spil der werde man
Verse: 3816    durch hübschheit genomen an:

Verse: 3817    er wolde sîn haben êre,
Verse: 3818    durch anders niht mêre.

Verse: 3819       Nû lac dâ nider Cathmus werc.
Verse: 3820    eʒ het sô wunneclîchen berc,

Verse: 3821    dar umbe er stifte Thêbas.
Verse: 3822    den namen vant ir Pallas.

Verse: 3823    Alexander sich bedâhte sider,
Verse: 3824    die stat hieʒ er bûwen wider.

Verse: 3825    dô daʒ alsô was geschehen,
Verse: 3826    die er die trægesten hete gesehen

Verse: 3827    und an den er zagheit wart gewar,
Verse: 3828    die hieʒ er behûsen dar.

Verse: 3829    er hieʒ sie nâch ir triuwen
Verse: 3830    dâ phlegen unde biuwen.

Verse: 3831    des künges fröide was grôʒ,
Verse: 3832    des die fürstîn wol genôʒ,

Verse: 3833    die dô was beliben bî leben,
Verse: 3834    die wolt er einem manne geben.

Verse: 3835    des sie der hêrre niht erlieʒ.
Verse: 3836    Jôram ein fürste hieʒ,

Verse: 3837    dem die frowe ze teile wart.
Verse: 3838    nâch ir süeʒen hôhen art

Verse: 3839    wart bestat daʒ werde wîp.
Verse: 3840    sie vant ouch werden ritters lîp

Verse: 3841    an Jôram, des herze tugende gert.
Verse: 3842    des was wol die süeʒe wert,

Verse: 3843    ob ir minneclich gemach
Verse: 3844    von dem hêrren dô geschach.

Verse: 3845    sie was vor missewende frî.
Verse: 3846    irm herzen was triuwe bî.

Verse: 3847    wîplich güete ouch bî ir wonde.
Verse: 3848    daʒ sie dâ vor guotes gonde

Verse: 3849    dem fürsten und im heiles bat,
Verse: 3850    daʒ was niht übele bestat.

Verse: 3851       Die frowe gegen Alexander stunt.
Verse: 3852    er tet ir sîne rede kunt.

Verse: 3853    'von mir ist iuwer hêrre tôt.
Verse: 3854    geloubent, frouwe, es tet mir nôt.

Verse: 3855    wie daʒ dinc nû komen sî,
Verse: 3856    ich wil iu sîn mit helfe bî.

Verse: 3857    alles guotes ich iu gan.
Verse: 3858    ich wil iu geben einen man,

Verse: 3859    des ir iuch nimmer durfet geschamen.
Verse: 3860    frouwe, er hât ouch fürsten namen.

Verse: 3861    verkiesent ûf mich iuwer vêhen.
Verse: 3862    diz lant sî iuwer lêhen,

Verse: 3863    frowe, mit dem fürsten Jôram.'
Verse: 3864    ze manne sie dô den hêrren nam

Verse: 3865    sît eʒ der künic wolde,
Verse: 3866    billîchen sie eʒ tuon solde.

Verse: 3867    ir swære was dannoch niuwe:
Verse: 3868    des twanc sie wîplich triuwe.

Verse: 3869    ûʒ irm herzen gegen berge vlôʒ
Verse: 3870    regen, dâ mit sie begôʒ

Verse: 3871    durch ir ougen ir wengel clâr.
Verse: 3872    man nam ûf ir brüstel war

Verse: 3873    daʒ dar ûf zeher vielen,
Verse: 3874    die ûʒ irs herzen grunde wielen.

Verse: 3875    wie die süeʒe was in jâmers nôt,
Verse: 3876    ir munt doch soliche rœte bôt,

Verse: 3877    daʒ sich dem niht kunde gelîchen,
Verse: 3878    sô gewalticlîchen

Verse: 3879    die rôse ûʒ irm gemache dringet
Verse: 3880    des morgens, des sie twinget

Verse: 3881    touwes süeʒe, dar nâch die sunne.
Verse: 3882    im mohte wol bringen wunne

Verse: 3883    sô süeʒer munt, wen in des luste,
Verse: 3884    daʒ sie den hêrren kuste.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.