TITUS
Ulrich von Eschenbach, Alexander
Part No. 27
Previous part

Chapter: 23a  
Darius' Zinsboten


Verse: 3951       Eines tages eʒ geschach
Verse: 3952    daʒ man die boten komen sach,

Verse: 3953    die her Darîus dar sande,
Verse: 3954    daʒ sie von Kriechen lande

Verse: 3955    den zins enphâhen solden
Verse: 3956    und im den bringen wolden.

Verse: 3957    vür die stat Thêbas
Verse: 3958    der boten rehte strâʒe was.

Verse: 3959    sie heten des niht gehôrt
Verse: 3960    daʒ er die stat het zerstôrt.

Verse: 3961    des vunden sie in unwiʒʒen dâ:
Verse: 3962    sie wânden in vinden anderswâ,

Verse: 3963    ouch wundert sie der mære,
Verse: 3964    wer der fürste wære,

Verse: 3965    der mit gewaltiger hant
Verse: 3966    der gote gestifte hete verbrant.

Verse: 3967    dô sie nâhen kâmen,
Verse: 3968    daʒ sie mit frâge vernâmen

Verse: 3969    daʒ eʒ der junge von Kriechen was,
Verse: 3970    der dâ lac vor Thêbas,

Verse: 3971    eʒ hete sie unbillîche.
Verse: 3972    dannoch lac der rîche

Verse: 3973    ûf dem anger mit gezelten
Verse: 3974    hêrlich von tiuren gelten.

Verse: 3975    die boten vuoren schône.
Verse: 3976    der künc von Samargône

Verse: 3977    von Darîô belêhent was
Verse: 3978    daʒ er den zins în las.

Verse: 3979    eʒ was der fürste mære
Verse: 3980    über Eurôpam kamerære.

Verse: 3981    Eurôpâ ein juncfrowe was genant,
Verse: 3982    dâ von dise lant den namen hânt:

Verse: 3983    die man des teiles gewaldic sach,
Verse: 3984    daʒ ich iu lâʒe wiʒʒen hernâch.

Verse: 3985       Die boten verjâhen zehant,
Verse: 3986    ze Alexandrô sie wærn gesant,

Verse: 3987    den sie wolden sprechen,
Verse: 3988    ob sie daʒ möhten gezechen.

Verse: 3989    der rede Permêniô wart gefrâgt.
Verse: 3990    der in mit zühten wider sagt

Verse: 3991    'mîn hêrre sol iuch gerne sehen;
Verse: 3992    wann ir wolt, daʒ sol geschehen.'

Verse: 3993    die boten erbeiʒten an daʒ velt.
Verse: 3994    niht grôʒ ein siuberlich gezelt

Verse: 3995    wart aldâ schiere ûf geslagen.
Verse: 3996    zwei kemmel hetenʒ dar getragen.

Verse: 3997    sîn dach was blâwer samît
Verse: 3998    man gesach vor noch sît

Verse: 3999    von sô rîchem gelde
Verse: 4000    ein dach ûf cleinem gezelde.

Verse: 4001    eʒ was von vier ecken.
Verse: 4002    den samît sach man bedecken,

Verse: 4003    daʒ des erlûhte lützel blôʒ,
Verse: 4004    von golde arn, die wâren grôʒ.

Verse: 4005    dar abe sie gâben liehten schîn
Verse: 4006    mit zwein knoufen guldîn,

Verse: 4007    in den rubîn lâgen,
Verse: 4008    die liehtes schînes phlâgen

Verse: 4009    und buten den ougen solicheʒ brehen,
Verse: 4010    daʒ des die Kriechen muosten jehen,

Verse: 4011    daʒ ir deheinem nie wurde kunt
Verse: 4012    sô rîch gezelt unz ûf die stunt.

Verse: 4013    man kôs an allen orten
Verse: 4014    ûf den næten tiure borten,

Verse: 4015    dar ûf verkast gesteine,
Verse: 4016    als es erdâht die reine,

Verse: 4017    sîn wîp, die küniginne,
Verse: 4018    die sich süeʒer minne

Verse: 4019    gegen dem hêrren hete erwegen.
Verse: 4020    die wolde sîn mit schônheit phlegen.

Verse: 4021    daʒ werde wîp hieʒ Dulcâmûr.
Verse: 4022    als mir die âventiure swuor,

Verse: 4023    sie was gar ob des wunsches zil.
Verse: 4024    des mohte haben fröiden vil

Verse: 4025    der werde künec Medêamanz.
Verse: 4026    lûter als ein spiegelglanz

Verse: 4027    was mit tugende ir süeʒer lîp.
Verse: 4028    mich riuwet noch daʒ werde wîp,

Verse: 4029    die ie nâch süeʒen tugenden warp,
Verse: 4030    daʒ sie âne touf vertarp.

Verse: 4031    durch sie er trûrens gar verphlac,
Verse: 4032    des herz sich zagheit ie bewac:

Verse: 4033    wann er an sie gedâhte,
Verse: 4034    ir minne in dar zuo brâhte

Verse: 4035    daʒ er in strîte kunde toben.
Verse: 4036    dâ von wir noch den werden loben.

Verse: 4037    er hete ze wirde sich versüenet.
Verse: 4038    iu sînem herzen stæte grüenet

Verse: 4039    der stam, dâ von erblüet daʒ rîs,
Verse: 4040    daʒ treit werdeclîchen prîs:

Verse: 4041    daʒ het sîn ellen erworben.
Verse: 4042    des was an im vertorben

Verse: 4043    alleʒ daʒ ze schanden zôch,
Verse: 4044    unprîs ie sîn herze flôch.

Verse: 4045       'Hêrre, ich wil iuch frâgen,
Verse: 4046    lât iuch des niht betrâgen,

Verse: 4047    ir enwellent sagen mir,
Verse: 4048    werder man, wie heiʒent ir?'

Verse: 4049    daʒ sprach Permêniô.
Verse: 4050    der wol gezogene fürste dô

Verse: 4051    dem frâgenden sich nante.
Verse: 4052    sînen namen er wol erkante,

Verse: 4053    dâ mit neic er dem werden man
Verse: 4054    und kêrte gegen dem künge sân.

Verse: 4055    dem sagt er 'ein bote ist komen,
Verse: 4056    von dem vil prîses wart vernomen.'

Verse: 4057    er beschiet in gar der mære
Verse: 4058    wer der fürste wære,

Verse: 4059    daʒ er zuht begienge
Verse: 4060    und in nâch wirde enphienge:

Verse: 4061    daʒ waʒ Permêniônis bete,
Verse: 4062    daʒ der künec doch gerne tete.

Verse: 4063    Medêamanz niht beite.
Verse: 4064    rîche cleider er an leite,

Verse: 4065    mit im dâ heiden wâren,
Verse: 4066    die zuht ouch niht verbâren.

Verse: 4067    man sach die Persân rîche
Verse: 4068    gecleidet wunnenclîche.

Verse: 4069    den fürsten âne schande
Verse: 4070    kôs man in solichem gewande,

Verse: 4071    eʒ wær fünfhundert marke wert,
Verse: 4072    wâ noch ein jude phandes gert.

Verse: 4073    wann daʒ eʒ was des fürsten reht,
Verse: 4074    der keiser moht wol ringern kneht

Verse: 4075    an den selben stunden
Verse: 4076    ze der reise haben vunden.

Verse: 4077    ich wolde daʒ eʒ wære verborn,
Verse: 4078    daʒ er den zins hæte verkorn,

Verse: 4079    dâ dirre nâch waʒ gesant:
Verse: 4080    dar umb sît liute unde lant

Verse: 4081    mit solichem jâmer wurden begurt,
Verse: 4082    daʒ manc anger unde vurt

Verse: 4083    und Eufrâtes daʒ waʒʒer clâr
Verse: 4084    sît nâch bluote wart gevar;

Verse: 4085    dâ von man manec getriuweʒ wîp
Verse: 4086    umb iren werden friundes lîp,

Verse: 4087    der sêre wart verhouwen,
Verse: 4088    moht in jâmer schouwen,

Verse: 4089    den man sach fröide entwîchen
Verse: 4090    und sie in jâmer rîchen:

Verse: 4091    etslîche solichen kummer leit,
Verse: 4092    der ir herze alsô durchsneit,

Verse: 4093    daʒ sie dâ von ir ende kôs
Verse: 4094    umb iren friunt, den sie verlôs.

Verse: 4095       Dem man der lande crône jach,
Verse: 4096    den wirt man in den zühten sach,

Verse: 4097    den boten er entgegen gienc,
Verse: 4098    zühteclich er sie enphienc.

Verse: 4099    dar nâch die mit im kâmen dar,
Verse: 4100    der nam er ouch mit gruoʒe war,

Verse: 4101    mit frœlîchem muote:
Verse: 4102    heidenisch het in der guote

Verse: 4103    Aristotiles der gehêret
Verse: 4104    die sprâche wol gelêret.

Verse: 4105    nû enwart daʒ niht verdagt,
Verse: 4106    im wurde dankes vil gesagt.

Verse: 4107    dâ mit vuort er die werden man
Verse: 4108    under sîn gezelt dan,

Verse: 4109    mit zühteclîchen witzen
Verse: 4110    bat er die geste sitzen.

Verse: 4111    Medêamanz wolt sîn botschaft sagen,
Verse: 4112    der wirt sie in dannoch bat verdagen.

Verse: 4113    er sprach 'sô ir geruowet baʒ,
Verse: 4114    sô wil ich hœren alleʒ daʒ

Verse: 4115    mir Darîus enboten hât.'
Verse: 4116    er gebôt daʒ man allen rât

Verse: 4117    den gesten schaffen solde;
Verse: 4118    des man eineʒ haben wolde,

Verse: 4119    der hieʒ er zwei geben dar
Verse: 4120    und ir phlegen nâch vlîʒe gar.

Verse: 4121    wie man sie ûf dem velde sach,
Verse: 4122    in wart gefuogt doch solich gemach,

Verse: 4123    daʒ sie mohten alsô wol genesen,
Verse: 4124    als ob sie in steten wærn gewesen.

Verse: 4125    truoc er gegen irm hêrren haʒ,
Verse: 4126    sie heten niht mangel umbe daʒ,

Verse: 4127    ir wart nâch friunde site gephlogen
Verse: 4128    von dem fürsten wol gezogen:

Verse: 4129    nihtes in gebrach.
Verse: 4130    mit guotem willen daʒ geschach.

Verse: 4131    sie wâren dâ bî im drî tage,
Verse: 4132    ê er vernæme der boten sage.

Verse: 4133    der junge ranc mit sorgen.
Verse: 4134    an dem vierden morgen

Verse: 4135    Medêamanz vür in kam.
Verse: 4136    Alexander sîn rede vernam,

Verse: 4137    der der fürste begunde.
Verse: 4138    mit zühten er sprechen kunde.

Verse: 4139    'ob ich eʒ gegen iu werben muoʒ:
Verse: 4140    der keiser enbiut iu sînen gruoʒ

Verse: 4141    und hât mich ze iu her gesant,
Verse: 4142    daʒ ir verzinsent iuwer lant,

Verse: 4143    als Philippus, der werde man,
Verse: 4144    iuwer vater hât getân;

Verse: 4145    ouch heiʒet er iuch des gâhen,
Verse: 4146    daʒ lant von im enphâhen,

Verse: 4147    des er iuch niht wil verzîhen,
Verse: 4148    ern welleʒ iu gerne lîhen

Verse: 4149    und vürbaʒ hœhen unde geben,
Verse: 4150    welt ir nâch sîme gebote leben.

Verse: 4151    er tuot gegen iu waʒ er sol.
Verse: 4152    ir habt sîne hulde wol.

Verse: 4153    im ist von iuwer frumkeit
Verse: 4154    ze guoter mâʒe vil geseit.

Verse: 4155    daʒ ir iuch fürsteclich stellet,
Verse: 4156    vil wol im daʒ gevellet.

Verse: 4157    ir habt umb mich verdient ouch daʒ,
Verse: 4158    daʒ ich immer vürbaʒ

Verse: 4159    mit den friunden mînen
Verse: 4160    mit gunst iu muoʒ erschînen.

Verse: 4161    daʒ iu der keiser êre tuo,
Verse: 4162    dâ wil ich immer râten zuo:

Verse: 4163    eʒ ist wol daʒ iu êre geschiht,
Verse: 4164    daʒ red ich durch kein lôsen niht.'

Verse: 4165       'Ir bietent mir iuwer dienste vil.
Verse: 4166    daʒ ich vil gerne dienen wil,

Verse: 4167    ob mich heil niht fliuhet;
Verse: 4168    swâ sich daʒ geziuhet,

Verse: 4169    daʒ ir daʒ gegen mir suochet
Verse: 4170    und mînes dienstes ruochet,

Verse: 4171    ob iu touc mîn dienest iht.
Verse: 4172    ich hab von dem keiser niht,

Verse: 4173    weder huobe noch daʒ lêhen,
Verse: 4174    dar umbe ich in iht welle vlêhen

Verse: 4175    oder im dienst erzeigen.
Verse: 4176    ich bin doch niemans eigen.

Verse: 4177    ich enwil von im niht hân.
Verse: 4178    hât mîn vater tôrlich getân,

Verse: 4179    des wil ich mich überheben,
Verse: 4180    ich wil im keinen zins geben.

Verse: 4181    er hât doch gnuoc verterbet.
Verse: 4182    ich bin des vater enterbet,

Verse: 4183    ouch ist diz mîn ander nôt,
Verse: 4184    mir ist der antvogel tôt,

Verse: 4185    der die guldîn eiger legte.
Verse: 4186    mit sîner hant er ê erwegte

Verse: 4187    in der werlde den grœsten stein,
Verse: 4188    ê ich des immer wurde in ein,

Verse: 4189    daʒ ich von mînem lande
Verse: 4190    deheinen zins im sande.

Verse: 4191    er sol sich der rede mâʒen,
Verse: 4192    solich hôchvart gegen mir lâʒen:

Verse: 4193    er mac dar an verliesen.
Verse: 4194    jâ möht er gerne kiesen,

Verse: 4195    daʒ er umb soliche sache
Verse: 4196    vor mir blibe mit gemache.

Verse: 4197    er muoʒ mîn undertân wesen,
Verse: 4198    ob er wil vor mir genesen.

Verse: 4199    er hât mir leides vil getân.
Verse: 4200    daʒ ich sô freche rede hân,

Verse: 4201    daʒ solt ir âne zürnen lân.
Verse: 4202    deheines guotes ich im gan.

Verse: 4203    nû sendet er nâch zinse her:
Verse: 4204    ich bin doch frî alsam er.

Verse: 4205    ob man in under crône siht,
Verse: 4206    der selben wirde man mir ouch giht.

Verse: 4207    jâ wær ich niht mannes wert,
Verse: 4208    waʒ tohte mir schilt und swert,

Verse: 4209    solt ich mich sîn niht erwern
Verse: 4210    und vor sîme gewalt ernern?

Verse: 4211    wir sollen ûf gelingen
Verse: 4212    strît zesamne bringen.

Verse: 4213    ich wil in suochen mit her
Verse: 4214    er sol berihten sich ze wer,

Verse: 4215    sô er aller beʒte kan.
Verse: 4216    mac er guote helfe hân,

Verse: 4217    der sol im aller werden nôt.
Verse: 4218    alhie swer ich sînen tôt.

Verse: 4219    ich wil daʒ ir im alsô sagt
Verse: 4220    und im der worte niht verdagt.'

Verse: 4221       Medêamanz sêre erschrac,
Verse: 4222    dô er hôrte wie die rede lac.

Verse: 4223    er sprach 'ich hân dise wort,
Verse: 4224    her künc, vil ungerne gehôrt.

Verse: 4225    ich möhte alsô sanfte ersterben,
Verse: 4226    sol ich iuwern schaden nû werben

Verse: 4227    und von iu die rede bringen,
Verse: 4228    dâ von iu mac misselingen.

Verse: 4229    ich râte iu als ir mîn bruoder sît:
Verse: 4230    verkiesent ûf den keiser nît.'

Verse: 4231    Alexander aber sprach
Verse: 4232    'mîn herze mir ie alsô verjach,

Verse: 4233    die wîle ich daʒ leben habe,
Verse: 4234    sô enstên ich des niht abe,

Verse: 4235    ichn welle ûf in schaden phlihten
Verse: 4236    und mînen schaden zuo im rihten.'

Verse: 4237    Medêamanz sprach aber mêr
Verse: 4238    'bî hern Jovem ich daʒ swer

Verse: 4239    daʒ eʒ mir ist von herzen leit,
Verse: 4240    daʒ ich dise reise ie gereit.

Verse: 4241    wie mac daʒ mînen triwen behagen,
Verse: 4242    sol ich die rede ûf iuch sagen,

Verse: 4243    dâ von ir gewinnet zorn?
Verse: 4244    ich wolde daʒ ir hetet verborn

Verse: 4245    êre, die ir mir hânt getân.'
Verse: 4246    'war umbe?' sprach der junge man,

Verse: 4247    'ich hân ir mê gegen iu gedâht.'
Verse: 4248    vil cleinôte wârn nû brâht,

Verse: 4249    er hieʒ sie vür den fürsten tragen.
Verse: 4250    Medêamanz wolt sich entsagen,

Verse: 4251    mit worten er sich werte.
Verse: 4252    im riet ein sîn geverte

Verse: 4253    daʒ er sie næme ûf widergelt.
Verse: 4254    mit urloube rœmten sie daʒ velt.

Verse: 4255    hin fuoren die Sarrazîne,
Verse: 4256    Alexander und die sîne

Verse: 4257    zogten ouch an ir gemach.
Verse: 4258    den winter man sie dâ heime sach.

Verse: 4259    von Samargôn der bote hêr
Verse: 4260    huop sich wider ûf daʒ mer.

Verse: 4261    ander reise wurden von im gespart,
Verse: 4262    er gâhte vaste der widervart.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.