TITUS
Ulrich von Eschenbach, Alexander
Part No. 28
Previous part

Chapter: 23b  
Alexanders Winterlager


Verse: 4263       dô er ze dem keiser kam
Verse: 4264    und er die rede rehte vernam,

Verse: 4265    als im der junge hete enboten,
Verse: 4266    er swuor bî allen sînen goten

Verse: 4267    daʒ er râche gegen im næme,
Verse: 4268    die Alexandrô übel kæme.

Verse: 4269    mit manger hande fröidenspil
Verse: 4270    hete kurzewîle vil

Verse: 4271    Alexander, der dâ heime bleip.
Verse: 4272    den winter frœlich er vertreip.

Verse: 4273    der sich enden dô began,
Verse: 4274    daʒ man het ûf den sumer wân

Verse: 4275    und sich huop deʒ lenzen teil,
Verse: 4276    der mit süeʒem sange geil

Verse: 4277    die vogelîn kan machen,
Verse: 4278    daʒ in muoʒ trûren swachen,

Verse: 4279    daʒ sie den winter hân erliten.
Verse: 4280    des kan sîn süeʒe sie erbiten,

Verse: 4281    daʒ er in ir herze dringet
Verse: 4282    und die cleinen dar zuo bringet,

Verse: 4283    daʒ von irm süeʒen schalle
Verse: 4284    heide und ouwe erclingent alle.

Verse: 4285    wenne der lenze sie versüenet
Verse: 4286    mit des meien kunft, sô grüenet

Verse: 4287    walt und anger beide.
Verse: 4288    man siht berc und heide

Verse: 4289    mit ir beider gewalte
Verse: 4290    in wunnenclîcher gestalte;

Verse: 4291    der walt ouch von in loubet,
Verse: 4292    des in der winter beroubet,

Verse: 4293    der wirt wunnenclîchen gar
Verse: 4294    mangerleie wol gevar,

Verse: 4295    des manic trûric herz wirt frô.
Verse: 4296    die selbe zît was komen dô.

Verse: 4297       Der Alexander het erbeit.
Verse: 4298    schône het er sich bereit

Verse: 4299    und die mit im dannekêr
Verse: 4300    gegen Darîô heten über mer.

Verse: 4301    der hêrre sich niht sûmte.
Verse: 4302    doch ê er eʒ dâ rûmte,

Verse: 4303    eʒ sprach der werde guoter
Verse: 4304    ze der künegîn sîner muoter

Verse: 4305    'frouwe, ir sît hie künegîn,
Verse: 4306    lât iu wol bevolhen sîn

Verse: 4307    beide liute unde lant.
Verse: 4308    noch mê, frouwe, sît gemant,

Verse: 4309    daʒ ir durch mînen willen tuot:
Verse: 4310    sît dem armen volke guot.

Verse: 4311    ich bit iuch al gelîche,
Verse: 4312    beide arm und rîche,

Verse: 4313    daʒ ir durch triwe die künigîn
Verse: 4314    iu allen lât bevolhen sîn.

Verse: 4315    lât sie des engelten niht
Verse: 4316    daʒ man mich bî ir niht ensiht,

Verse: 4317    ir mügent niht baʒ erzeigen mir
Verse: 4318    iuwer triuwe, dann an ir.'

Verse: 4319       Die künigîn iren sun an sach,
Verse: 4320    vor jâmer die guote kûme gesprach.

Verse: 4321    'ôwê mir armen wîbe, ôwê!
Verse: 4322    waʒ sol ich nû vürbaʒ mê ?

Verse: 4323    dîn scheiden von mir mîn herze müet,
Verse: 4324    dar ûʒ dîn leben ist erblüet.

Verse: 4325    trœste mich vil armeʒ wîp,
Verse: 4326    bî mir, hêrre, hie heime blîp.

Verse: 4327    trûter sun, gedenk dar an
Verse: 4328    daʒ ich nieman enhân

Verse: 4329    wann dîn alterseine.'
Verse: 4330    'frouwe, niht enweine.

Verse: 4331    die reise sol uns wol ergân.'
Verse: 4332    den trôst gap ir der junge man.

Verse: 4333    sie het im gevolget an die stat
Verse: 4334    unz dâ er in daʒ schif trat.

Verse: 4335    er sprach 'frowe, dich wol gehabe,'
Verse: 4336    dâ mit hieʒ er stôʒen abe,

Verse: 4337    ûf dem mer fuor er dan.
Verse: 4338    nû huop sich niuwer jâmer an,

Verse: 4339    den man an der guoten sach.
Verse: 4340    weinende die frouwe sprach

Verse: 4341    'du verst, hêrre, von mir hin,
Verse: 4342    ich bin ouch nû verweiset dîn.

Verse: 4343    mîn lîp dich doch der werlde truoc.
Verse: 4344    ich hete schadens genuoc,

Verse: 4345    den ich an Philippô kôs,
Verse: 4346    mînem hêrren, den ich verlôs:

Verse: 4347    diz scheiden ist sîn ander tôt.
Verse: 4348    ô werder Dâniêlis got,

Verse: 4349    ich wil râtes warten an dich,
Verse: 4350    mit dînem tôde mîn herze brich.

Verse: 4351    wiltu mir helfe ouch versagen,
Verse: 4352    so enweiʒ ich wem mînen kummer clagen.

Verse: 4353    sende mir schiere dînen tôt,
Verse: 4354    ende mir die bitter nôt,

Verse: 4355    ich wil doch niht gerne leben.
Verse: 4356    geruoche mir dis lîbes ein ende geben.'

Verse: 4357    alsô vant man sie alle tage
Verse: 4358    umb iren sun in jâmers clage.

Verse: 4359    ûf mîne wârheit ich daʒ nim:
Verse: 4360    er was ir lieber dann sie im.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.