TITUS
Ulrich von Eschenbach, Alexander
Part No. 29
Previous part

Chapter: 28  
Überfahrt nach Persien


Verse: 4361       Alexandern den künic hêr
Verse: 4362    sach man varn ûf dem mer

Verse: 4363    alsô hêrlîche,
Verse: 4364    man kôs daʒ er was rîche.

Verse: 4365    er het doch niht volkes mê
Verse: 4366    dann als ir habt vernomen ê.

Verse: 4367    sie wâren aber ze strîte erwelt,
Verse: 4368    die mit im fuorte der junge helt,

Verse: 4369    mit den die kiele wârn geladen:
Verse: 4370    die vorhten wênic der vînde schaden,

Verse: 4371    guote ors, harnasch in niht gebrach,
Verse: 4372    wol man sie berihtet sach.

Verse: 4373    der grôʒen kiele wârn,
Verse: 4374    dâ mit man sie sach varn,

Verse: 4375    ân ahzehen zweihundert,
Verse: 4376    ze ieglîchem gesundert

Verse: 4377    ein galîne und ein barke.
Verse: 4378    seigeten snel und starke,

Verse: 4379    der sie gnuoc mit in fuorten,
Verse: 4380    die marner vaste ruorten.

Verse: 4381    ûf des künges galînen
Verse: 4382    sach man dach erschînen

Verse: 4383    von rôtem scharlache,
Verse: 4384    dar ûf von tiurer sache

Verse: 4385    gekrœnte lewen silberwîʒ
Verse: 4386    gâben dar abe liehten glîʒ.

Verse: 4387    die andern hete ouch niht vermiten,
Verse: 4388    ûf der galînen man het ersniten

Verse: 4389    seltsæne dach von bilden
Verse: 4390    nâch der werden schilden.

Verse: 4391    als ich die wârheit hân vernomen,
Verse: 4392    sie wâren ûf daʒ mer komen,

Verse: 4393    daʒ in nihtes gebrach.
Verse: 4394    rîcheit man an ir verte sach.

Verse: 4395    mit spîse wârn die kiele bewart,
Verse: 4396    der in genüeget ûf die vart.

Verse: 4397    von tambûren dicke erhal
Verse: 4398    ûf den kocken sô lûter schal,

Verse: 4399    dâ von daʒ mer sich erwegt
Verse: 4400    und die vische wurden erregt.

Verse: 4401    eʒ wart nie künc sô rîche,
Verse: 4402    der ie sô hêrlîche

Verse: 4403    ûf dem wâge wurde gesehen,
Verse: 4404    als wir dem Kriechen müeʒen jehen.

Verse: 4405    nû was der künec und ouch sîn her
Verse: 4406    sô verre komen ûf daʒ mer,

Verse: 4407    daʒ man ze dem grunde
Verse: 4408    niht geankern kunde.

Verse: 4409    dô er niht wann waʒʒer sach,
Verse: 4410    seneclich der junge sprach

Verse: 4411    'ô mîn lant, veterlîcheʒ lant,
Verse: 4412    wie mich dîn süeʒe hin wider mant!

Verse: 4413    jâ senet sich daʒ herze mîn
Verse: 4414    wider dâ ich geborn bin.

Verse: 4415    alsô kan dîn süeʒe wenen,
Verse: 4416    daʒ sie ir herze ouch nâch dir senen,

Verse: 4417    die vlühtic kocke unde kiel
Verse: 4418    dir nû sêre enphremden wil.

Verse: 4419    waʒ du der werden verliusest,
Verse: 4420    an den du mangel kiusest!

Verse: 4421    dir was vil wirde von in bî,
Verse: 4422    der du nû muost wesen frî

Verse: 4423    und ouch die süeʒen clâren wîp,
Verse: 4424    die nû quelen irn lîp,

Verse: 4425    der ougen stæte vlieʒen
Verse: 4426    und der regene zeher gieʒen:

Verse: 4427    der minne sie sich ânen,
Verse: 4428    die nû der Persânen

Verse: 4429    lant wellen besuochen.
Verse: 4430    durch mich sie des geruochen.

Verse: 4431    jâ vörht ich daʒ die süeʒen wîp
Verse: 4432    dar umbe haʒʒen mînen lîp,

Verse: 4433    daʒ ich in minne unde man
Verse: 4434    mit dirre vart enphremdet hân.

Verse: 4435    grôʒe sælde ist mir beschert
Verse: 4436    daʒ ir deheiner ungerne vert.'

Verse: 4437       wie er mit sorgen runge
Verse: 4438    und in die senende twunge,

Verse: 4439    er kunde doch frô belîben,
Verse: 4440    dem volke die zît vertriben,

Verse: 4441    daʒ sie der arbeit niht verdrôʒ.
Verse: 4442    sie dûhte in wære der sælden lôʒ

Verse: 4443    ûf der verte vür gevallen.
Verse: 4444    man hôrte die quecken schallen

Verse: 4445    und haben frô gemüete:
Verse: 4446    daʒ machte des hêrren güete,

Verse: 4447    des herze strîtlich gir besaʒ.
Verse: 4448    sîner lande er gar vergaʒ,

Verse: 4449    der muoter und ander friunde.
Verse: 4450    er ahte niht der ünde,

Verse: 4451    die ûf dem wâge sich regten
Verse: 4452    und die kiele vaste wegten.

Verse: 4453    er bat sie vaste gâhen.
Verse: 4454    Asîam sach er im nâhen.

Verse: 4455       Dô der junge fürste rîch
Verse: 4456    der lande gebirge sô wunnenclich

Verse: 4457    gegen im erschînen sach,
Verse: 4458    ze hant sîn herze sô verjach,

Verse: 4459    (daʒ im prîs wolde nâhen,
Verse: 4460    er hieʒ et vaste gâhen)

Verse: 4461    er sprach 'trâcheit vliehent!
Verse: 4462    die ruoder vaste ziehent!

Verse: 4463    bevelhent iuch dem segel niht,
Verse: 4464    wir varn dâ uns êre geschiht.'

Verse: 4465    die ê gemaches phlâgen,
Verse: 4466    trâcheit sich die bewâgen,

Verse: 4467    in den schiffen sie umbe sprungen,
Verse: 4468    umb die ruoder sie sich drungen,

Verse: 4469    die sie vaste ruorten.
Verse: 4470    die kiele sie gâhes fuorten,

Verse: 4471    daʒ sie dem stade kâmen nâ.
Verse: 4472    dô nam Alexander sâ

Verse: 4473    einen grôʒen swæren schaft,
Verse: 4474    den schôʒ der werde mit kraft.

Verse: 4475    von der galînen er verwunt
Verse: 4476    die erde. dâ mit tet er kunt

Verse: 4477    daʒ er dâ herte wolde sîn.
Verse: 4478    die marner wurfen die anker în.

Verse: 4479    waʒ man in den schiffen vant
Verse: 4480    daʒ brâhte man snelle an daʒ lant.

Verse: 4481    lûter ein waʒʒer niht ze grôʒ
Verse: 4482    ûʒ dem gebirge in daʒ mer vlôʒ.

Verse: 4483    Thanais daʒ waʒʒer heiʒet:
Verse: 4484    dâ bî daʒ her erbeiʒet

Verse: 4485    nider ûf ein schœneʒ gras.
Verse: 4486    von grôʒen gezelten rîche palas

Verse: 4487    wurden dô gâhens ûf geslagen,
Verse: 4488    die ouch daʒ mer dar hete getragen.

Verse: 4489    schônheit man ûf dem velde sach.
Verse: 4490    man hôrte von busînen crach,

Verse: 4491    von tambûren unde seitenspil
Verse: 4492    was dâ fremder tœne vil.

Verse: 4493    sie heten dâ spîse, guoten wîn,
Verse: 4494    der etlîchem daʒ houbt sîn

Verse: 4495    mit sîner craft erschellet,
Verse: 4496    daʒ er wart gevellet

Verse: 4497    ûf daʒ gras sunder sper.
Verse: 4498    solich was des trinkens wer,

Verse: 4499    daʒ sie in Asîam heten brâht.
Verse: 4500    alsô vertriben sie die naht.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.