TITUS
Ulrich von Eschenbach, Alexander
Part No. 30
Previous part

Chapter: 28a  
Erzählerexkurs: Die Weltkarte


Verse: 4501       Asîâ daʒ wîte lant
Verse: 4502    nâch einer künegîn ist genant,

Verse: 4503    die etswenne der rîche wielt,
Verse: 4504    nâch ir den namen eʒ behielt.

Verse: 4505    als ich an dem buoche las,
Verse: 4506    die welt in driu geordent was.

Verse: 4507    daʒ ein teil heiʒet Affricâ,
Verse: 4508    daʒ ander Eurôpâ,

Verse: 4509    Asîâ ist daʒ drite,
Verse: 4510    daʒ Darîus dô befrite,

Verse: 4511    der sîn gewaldiclîchen phlac.
Verse: 4512    den zwein sîn wîte über lac,

Verse: 4513    hœrent waʒ Asîânen reif
Verse: 4514    der lande wîte umbegreif.

Verse: 4515    Thanais und Mêtidôʒ,
Verse: 4516    zwei waʒʒer ze guoter mâʒe grôʒ,

Verse: 4517    die dar umbe vlieʒent
Verse: 4518    und der rîche vil beslieʒent,

Verse: 4519    dâ mite von den andern beiden
Verse: 4520    Asîâ ist gescheiden.

Verse: 4521    daʒ rîche gebirge Kaucasas
Verse: 4522    ze dem lande zinshaft was:

Verse: 4523    man vindet Lignâlôe den walt
Verse: 4524    aldâ in schœner varwe gestalt

Verse: 4525    beide sumer unde winder.
Verse: 4526    seltsæne rinder

Verse: 4527    hât der walt, als man mir sagt.
Verse: 4528    niuwan der keiser dar inne jagt

Verse: 4529    und dem er eʒ erlouben wil.
Verse: 4530    dâ vlieʒen clârer waʒʒer vil,

Verse: 4531    die daʒ edel gesteine tragen,
Verse: 4532    dâ von wir noch vil krefte sagen.

Verse: 4533    daʒ paradîs dem gebirge nâhen ligt,
Verse: 4534    daʒ eʒ sich rüerens dar an bewigt.

Verse: 4535       Daʒ künigrîche Assyriâ,
Verse: 4536    Mêdâ und Persiâ,

Verse: 4537    Mesopotamiâ und Arâbî,
Verse: 4538    Trîbalibôt und Tenabrî:

Verse: 4539    in Arâbî mirre und wîrouch wirt,
Verse: 4540    der fênix ouch sîn fruht dâ birt;

Verse: 4541    ein kunst heiʒet lôicâ,
Verse: 4542    die ist ouch erdâht dâ.

Verse: 4543    golt gimme und elephant
Verse: 4544    bringet Indiâ daʒ lant.

Verse: 4545    Tyriâ und Sydôn,
Verse: 4546    Syriâ und Amâzôn,

Verse: 4547    Leunsnugruns und Suntîn,
Verse: 4548    Celidôn und Lanzesardîn,

Verse: 4549    Lididiâ und Hippipotiticôn,
Verse: 4550    Yrcâniâ und Cilicôn,

Verse: 4551    Armêniâ und Siciâ,
Verse: 4552    Caldeâ und Babilôniâ;

Verse: 4553    die lant sie niht vermîdet,
Verse: 4554    dâ man zwir sæt und snîdet,

Verse: 4555    und daʒ lant der helleruden,
Verse: 4556    der vil ungetriuwen Juden.

Verse: 4557    Palestîn heiʒet daʒ rîche,
Verse: 4558    des gewalticlîche

Verse: 4559    ze der zît die Juden wielten.
Verse: 4560    Jhêrusalêm sie ouch hielten.

Verse: 4561    die stat vindet man ouch dâ,
Verse: 4562    dâ die süeʒe Marîâ

Verse: 4563    Jhêsum den heiler enphienc,
Verse: 4564    dâ von unser leit zergienc,

Verse: 4565    und dâ sîn süeʒe menschlich art
Verse: 4566    durch uns an dem criuze ersterbet wart;

Verse: 4567    und dâ der reine wart begraben,
Verse: 4568    die werden stat sie ouch dâ haben.

Verse: 4569    Solt ich nennen al die lant
Verse: 4570    die in dem ringe sint benant,

Verse: 4571    sô wurde der rede gar ze vil:
Verse: 4572    dar umbe ich sie verswîgen wil.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.