TITUS
Ulrich von Eschenbach, Alexander
Part No. 31
Previous part

Chapter: 28b  
Alexander plant die Welteroberung


Verse: 4573       die vinster ende wolde hân.
Verse: 4574    man sach den morgensterne ûf gân,

Verse: 4575    nû muoste entwîchen die naht.
Verse: 4576    die vogel huoben ir süeʒen brâht.

Verse: 4577    sie tâten mit ir sange kunt
Verse: 4578    des morgens kunft, als sie noch tuont.

Verse: 4579    nâch ir wîse süeʒen schal
Verse: 4580    brâhte vür die nahtegal,

Verse: 4581    sich soumte ouch niht der galander.
Verse: 4582    der werde Alexander

Verse: 4583    menlîcher sorgen phlac,
Verse: 4584    dar umbe er âne slâfen lac.

Verse: 4585    dô er vernam den süeʒen sanc,
Verse: 4586    dô was sîn ligen dâ niht lanc.

Verse: 4587    sîn harnasch was bî im geleit,
Verse: 4588    dâ het in gâhes în bereit

Verse: 4589    ein kamerer, der dâ bî im was.
Verse: 4590    er sazte sich ûf den matraʒ.

Verse: 4591       Daʒ her dannoch alles slief.
Verse: 4592    dem kamerer er vür sich rief,

Verse: 4593    sumelîchen er sagen hieʒ,
Verse: 4594    daʒ her er alles slâfen lieʒ.

Verse: 4595    Permêniô was schiere bereit.
Verse: 4596    sîn sun Philôtas, der gemeit,

Verse: 4597    an dem sich zagheit ie verbarc:
Verse: 4598    sîn ellen was gegen strîte starc;

Verse: 4599    und sîn bruoder Nicânor,
Verse: 4600    den werder prîs ie truoc enbor,

Verse: 4601    sô daʒ sîn leben ze hôhe zôch,
Verse: 4602    valscheit ie sîn herze vlôch;

Verse: 4603    Hector was der dirte suon,
Verse: 4604    der werdekeit wol kunde tuon,

Verse: 4605    der ie was der vînde schûr,
Verse: 4606    in strîte ir herter nâchgebûr.

Verse: 4607    Jollas er niht vergaʒ,
Verse: 4608    des tât man ie gegen prîse maʒ,

Verse: 4609    dâ von der werde nie geschiet:
Verse: 4610    sîn herz im ganze tugende riet.

Verse: 4611    dâ reit ein grâve der hieʒ Lois,
Verse: 4612    der was von art ein Franzois:

Verse: 4613    durch ritterschaft was er dar komen
Verse: 4614    von Frankrîche, hân ich vernomen.

Verse: 4615    der werde und der wîse
Verse: 4616    mit durchliuhtigem prîse

Verse: 4617    was erwahsen der tjostûr:
Verse: 4618    sîn komen wart den heiden sûr.

Verse: 4619    dâ was der werde Clitus,
Verse: 4620    von dem hân ich vernomen sus

Verse: 4621    daʒ der vil gehiure
Verse: 4622    ie brâhte menlich stiure,

Verse: 4623    wâ er die friund in nœten sach:
Verse: 4624    strîtlîcher tât man im dâ jach.

Verse: 4625    man sach in doch in zühten siten.
Verse: 4626    die sibene mit dem künge riten

Verse: 4627    ûf ein hœhe vür die gezelt.
Verse: 4628    nû sâhen sie berc und velt

Verse: 4629    erbûwet rîlîche
Verse: 4630    und grüenen wunnenclîche,

Verse: 4631    hie den weiʒen, dort den wîn,
Verse: 4632    hie gâben die vesten bürge schîn,

Verse: 4633    vil stete der fürste glîʒen sach.
Verse: 4634    in sînem herzen er verjach,

Verse: 4635    als er ze den hêrren sprach:
Verse: 4636    'mir wil nû trûren werden swach.

Verse: 4637    den admirât ich wil vertrîben,
Verse: 4638    alhie wirt mîn belîben.

Verse: 4639    waʒ Eurôpâ hât der lant,
Verse: 4640    gesellen, die teilet iu mîn hant.'

Verse: 4641    sîn menlich herze, daʒ er truoc,
Verse: 4642    ze allen zîten des gewuoc

Verse: 4643    daʒ ze manheit hôrte.
Verse: 4644    zagheit er nie bekorte.

Verse: 4645    dannoch sprach der künic mêr,
Verse: 4646    daʒ sie gebuten in dem her

Verse: 4647    daʒ sie des landes schônten,
Verse: 4648    die wîle sie drinne wonten.

Verse: 4649    'vür eigen ich mirʒ erkorn hân,
Verse: 4650    man sol mirʒ unverheret lân.

Verse: 4651    der liute sol man vâren,
Verse: 4652    die alsô gegen uns gebâren

Verse: 4653    daʒ sie uns wellen widerstreben
Verse: 4654    und niht nâch unserm gebote leben.

Verse: 4655    diz ist mîn rehtes eigen,
Verse: 4656    daʒ ich wol wil erzeigen:

Verse: 4657    des sol man eʒ genieʒen lân.'
Verse: 4658    nâch sîme gebote dô wart getân.

Verse: 4659       Dô er der lande war genam,
Verse: 4660    und wider ze den sînen kam,

Verse: 4661    die sîn rîten heten verslâfen.
Verse: 4662    diz mære wil ich noch zâfen

Verse: 4663    mit den werden, der ich wil nennen mêr,
Verse: 4664    die ouch dâ wâren in dem her.

Verse: 4665    der herzoge Dêmostenes
Verse: 4666    mit den werden Cicropides,

Verse: 4667    in der schar erschein aldâ
Verse: 4668    der burgrâve von Athêniâ,

Verse: 4669    der unverzagte Eschinus.
Verse: 4670    Dîmus und Nicômacus

Verse: 4671    die der vînde wênic schônten.
Verse: 4672    die helde sûre lônten:

Verse: 4673    wâ in die vînde dienten iht,
Verse: 4674    des lieʒen sie unvergolten niht

Verse: 4675    mit des tôdes ruoder.
Verse: 4676    sie wâren zwêne gebruoder.

Verse: 4677    ein werder grâve hieʒ Niclas,
Verse: 4678    der ie der vînde schûr was:

Verse: 4679    an dem sach man ritterschaft erblüen,
Verse: 4680    die sît die heiden kunde müen.

Verse: 4681    Dêmêtrius ein fürste hieʒ,
Verse: 4682    den menlich prîs nie verlieʒ:

Verse: 4683    wâ man in bî vînden sach,
Verse: 4684    menlîcher tât man im dâ jach.

Verse: 4685    dâ was der clâre Cebalîn,
Verse: 4686    des site die heiden lêrte pîn,

Verse: 4687    der bluot er kunde vergieʒen:
Verse: 4688    dar umbe man sach rieʒen

Verse: 4689    werder wîbe ougen
Verse: 4690    offenbâr und tougen.

Verse: 4691    dâ was der junge Mêtrôn,
Verse: 4692    des hant gap strîtlîchen lôn.

Verse: 4693    er frumte manegen tôten lîp,
Verse: 4694    daʒ sît beclagten süeʒe wîp.

Verse: 4695    mir sagt von im daʒ mære
Verse: 4696    daʒ der helt wære

Verse: 4697    kamerer über Kriechenlant.
Verse: 4698    an im man niht wan manheit vant.

Verse: 4699    Tholomêus der minnen gernde,
Verse: 4700    der ie die vînde was wernde

Verse: 4701    ritterschaft, die des geruochten
Verse: 4702    und strît gegen im suochten;

Verse: 4703    er stach mit swærer lanze.
Verse: 4704    im hete der minnen schanze

Verse: 4705    sich getopelt alsô wol,
Verse: 4706    dâ von sîn herze was fröiden vol.

Verse: 4707    Aminctas ein grâve hieʒ,
Verse: 4708    der siufzen in wîbe herze stieʒ,

Verse: 4709    dô er Kriechen rûmte:
Verse: 4710    an strîte der sich niht sûmte.

Verse: 4711    Perdicas der starke,
Verse: 4712    der hêrre von der marke,

Verse: 4713    die noch Budîn ist genant
Verse: 4714    (ein sît sie triffet Ungerlant,

Verse: 4715    ander sît Venêdier gemerke)
Verse: 4716    des hôchgemuoten sterke

Verse: 4717    etslich Sarrazîn enphant,
Verse: 4718    alsô daʒ im sîn leben swant.

Verse: 4719    Meleâger und Cênôs,
Verse: 4720    an den man vil prîses kôs;

Verse: 4721    Crâthêrus unde Antigôn,
Verse: 4722    die ouch brâhten sûren lôn,

Verse: 4723    wenne daʒ alsô geschach,
Verse: 4724    daʒ man die zwêne in strîte sach.

Verse: 4725    nâch der âventiure zal
Verse: 4726    dâ was ouch etslich Provenzâl,

Verse: 4727    der in ritterschefte wâgt den lîp
Verse: 4728    durch prîs und durch werde wîp.

Verse: 4729    von Provenz ein grâve Jôrân,
Verse: 4730    des helfe wir niht wellen verslân,

Verse: 4731    selb sehste ritter er dâ was.
Verse: 4732    als mir die âventiure las,

Verse: 4733    wâ sie in strîte wâren,
Verse: 4734    man sach sie sô gebâren,

Verse: 4735    als ob die helde tobten:
Verse: 4736    die vînde daʒ wênic lobten.

Verse: 4737    dâ was der stolze Gwigrimanz,
Verse: 4738    des prîs und werdikeit was ganz

Verse: 4739    er was ein gast von Britânî.
Verse: 4740    solich milde was im bî,

Verse: 4741    daʒ er dâ vor niht behielt
Verse: 4742    guotes, des er dâ heime wielt:

Verse: 4743    des kunde sîn milde niht versparn,
Verse: 4744    dar umbe muost er irre varn:

Verse: 4745    aller sîner huoben velt
Verse: 4746    hete bedaht ein cleineʒ gelt.

Verse: 4747    dâ was Hûbert ein Anglois,
Verse: 4748    und Gâlôes ein Franzois

Verse: 4749    (die zwêne wâren gesellet),
Verse: 4750    von in wurden gevellet

Verse: 4751    sint die heiden als der tou,
Verse: 4752    daʒ manic werdeʒ herze rou.

Verse: 4753       Nû enwil ich niht verdagen,
Verse: 4754    ich wil iu von eim ritter sagen,

Verse: 4755    den man in dem here sach,
Verse: 4756    als mir die âventiure jach,

Verse: 4757    der werde wære ein Aliman.
Verse: 4758    sînem lîbe ich noch guotes gan.

Verse: 4759    nû er mit uns hie niht sol leben
Verse: 4760    und noch den fürsten helfe geben,

Verse: 4761    daʒ mac den hêrren wesen leit,
Verse: 4762    die nû ze strîte sint bereit.

Verse: 4763    der werde der hieʒ Flôriân.
Verse: 4764    mich müet daʒ wir sîn mangel hân:

Verse: 4765    er tet den Asîânen wê.
Verse: 4766    der werden der was dannoch mê,

Verse: 4767    die ritterschaft dâ worhten
Verse: 4768    und schaden wênic vorhten,

Verse: 4769    die mir die âventiure hât verswigen,
Verse: 4770    dâ von ir namen sîn verzigen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.