TITUS
Wolfram von Eschenbach, Parzival
Part No. 740
Previous part

Chapter: 740 
740


Verse: 1    daz ich die rede mac niht verdagen,
Verse: 2    ich enmüeze ir strît mit triuwen klagen,

Verse: 3    sît ein verh und ein bluot
Verse: 4    solh ungenâde ein ander tuot:

Verse: 5    si wâren doch beide eins mannes kint,
Verse: 6    der geliuterten triuwe fundamint.

Verse: 7    den heiden minne nie verdrôz.
Verse: 8    des was sîn herze in strîte grôz:

Verse: 9    gein prîse truoc er willen
Verse: 10    durch die künegîn Sekundillen.

Verse: 11    diu daz lant ze Tribalibôt
Verse: 12    im gap, diu was sîn schilt in nôt.

Verse: 13    der heiden nam an strîte zuo:
Verse: 14    wie tuon ich dem getouften nuo?

Verse: 15    er enwelle an minne denken,
Verse: 16    sô enmac er niht entwenken,

Verse: 17    dirre strît müeze im erwerben
Verse: 18    von sheidens hant ein sterben.

Verse: 19    daz wende, tugenthafter grâl,
Verse: 20    Kondwîrâmûrs diu lieht gemâl,

Verse: 21    hie stêt iuwer beider dienestman
Verse: 22    in der grœsten nôt, die er ie gewan.

Verse: 23    der heiden warf daz swert ûf hôch.
Verse: 24    manec sîn slac sich sus gezôch,

Verse: 25    daz Parzivâl kom ûf diu knie.
Verse: 26    man mac wol jehen, sus striten sie,

Verse: 27    der si beide nennen wil ze zwein.
Verse: 28    si wâren doch beide niht wan ein:

Verse: 29    mîn bruoder und ich daz ist ein lîp,
Verse: 30    als ist guot man und des guot wîp.




Next part


This text is part of the TITUS edition of Wolfram von Eschenbach, Parzival.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.