TITUS
Lancelot und Ginover I: Prosalancelot
Part No. 18
Previous part

Page: (44) 
Sentence: 213    Da er sah das syn herre der konig dot lag, da gab er eynen so großen schrey das yn die koniginn hort und erschrack so sere das sie das kint ließ ligen vor den pferden,und schurczt ir cleyder off und lieff uff die höhen und fant den knecht ligen off dem konig, und macht den grosten jamer der ie gehört wart.
Sentence: 214    Da die konigin yren herren dot sah, da viel sie in onmacht uff yn und macht großen jamer und clagte sere ir groß leyt.
Sentence: 215    Sie raufft ir hare, das wiß und schön was und langk, und reiß ir cleyder und warff sie von ir und zurkramp und zurkraczt ir antlicz, das schon was, das ir das blut den hals nyder ranne, der wiß was als der schne, und vermunte irs herren großen tugende und syner großen byderbkeit, und schrey so lut das bergk und tale und der felse wiedder halle.
Sentence: 216    So vil weynt die koniginne das sie nit me enmocht und so múde wart großes ruwen das sie nicht me mocht gesprechen, und vil wiedder in unmacht mange lange stund.
Sentence: 217    Da sie wiedder qwam von der unmechte, da stalte sie großen jamer und ermante mange stund irs herren frumkeit und syn große gúte.
Sentence: 218    Darnach clagte sie yrn großen schaden den sie hett, und clagt und weynt ußermaßen sere und sprach, ir were der dot lieber dann das leben, und schalt den dot das er sie so lang vermeyde.
Sentence: 219    Als sie lang großen jamer gemacht hett, da gedacht ir wie ir kint was bliben ligen vor der pferd fuß, und gedacht das es die pferd zu tode getreten hetten, und gab eynen schrey so sie allerlutest mocht, und sprang uff als ein mensch das von synnen ist komen, und lieff dar da sie das kint gelaßen hett, und forcht sere das es dot were, das sie zuhant nyder viel in onmacht, ee sie von der hohe hinab kam.
Sentence: 220    Uber ein lang wil, da sie zu irselber kam, da sprang sie off und lieff bald die höhe nyder, alle zurißen und alle zuraufft ir harre, das sere schön was.
Sentence: 221    Da sie by die pferd kam die off dem lack waren verliben, da sah sie yren sun ußer der wiegen gebunden, und sah wo yne ein jungfrauw hatt an ir schoß allnacket und truckt yn dick an sich sußiclich zwúschen ir brust und kußt yn an synen munt und in syn augen manige stunt.
Sentence: 222    Sie enhett nit unrecht, wann es was das schönst kint das ie keyn man mit synen augen gesah.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.