TITUS
Lancelot und Ginover I: Prosalancelot
Part No. 54
Previous part

Page: (116) 
Sentence: 704    Got der lon uch das ir wol sprechent!
Sentence: 705    Das weiß ich wol das mir myn frauw koniges kint dick gesprochen hant, und ir hant gesprochen als ein getrúw ritter, und wil ich uch ummer deste lieber han in mym herczen, das irs hut gesprachent.« Da der ritter vernam das er im nit me wolt sagen, da sprach er zu im:
Sentence: 706    »Lieber juncker, wer ir sint, so laß uch got wol gefarn!
Sentence: 707    Ir mögent wol ein edelman syn so mich duncket.
Sentence: 708    Sehent hien, ich wil uch zwen die besten wind geben die uwer augen ye gesahen, und nement sie in den worten das uch gluck und ere muß geschehen, und das gott uwers vatter sele muß gnaden, ob er tod ist; und lebet er aber, so gebe im gott selikeit und ere!« Da Lancelot hort das die wind so gut waren, da wart er sere fro und sprach das er die wind gern wolt nemen.
Sentence: 709    »Gehulff mir gott«, sprach er, »das ich noch dar keine da ich sie uch vergelten mocht, das wolt ich gern thun!« Ir yetwedder bevalh den andern gott und schieden.
Sentence: 710    Und Lancelot reyt syn gesellschafft gehelich suchen.
Sentence: 711    Dem ritter enkam der gedanck nye von dem herczen, und wolts fur war haben das er des konig Banes kint were.
Sentence: 712    Lancelot und sin meyster kamen zuhauff und all ir gesellschafft, biß an dry die Lancelot suchten.
Sentence: 713    Da sie yn sahen das mager pfert ryten, da wundert sie alle warmen er keine.
Sentence: 714    Und da er sin winde bracht neben im geleytet mit eyner kettenen, sinen bogen an sinem hals und synen köcher an synem gurtel, da fragt syn meister war syn pfert komen were.
Sentence: 715    »Ich hans verlorn«, sprach er.
Sentence: 716    »Wer gab uch da diß?« sprach syn meister.
Sentence: 717    »Es wart mir gegeben.« Sin meisten englaubt es im nicht und beschwur yn by den truwen die er syner frauwen solt, das er im sagt war er sin pfert hett gethan.
Sentence: 718    Da enwolt Lancelot nit liegen und sagt im alle die abentur die im begegent was, von sim pferde und von dem rech und von dem ritter.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.