TITUS
Lancelot und Ginover I: Prosalancelot
Part No. 83
Previous part

Page: (174) 
Sentence: 1120    Die jungfrauw bevalh den kinden an ir lip das sie nyman seyten wes kint sie weren, oder sie musten zuhant sterben, sprach sie.
Sentence: 1121    »Ich wil uch fúrn in ein statt da ir sollent han alles des ir erdencken kunnent in dem herczen, und uwer meyster sollen schier zu uch komen.« Alsus seyt die jungfrauw den kinden vor, und des nachtes schliefen sie beid by ir.
Sentence: 1122    Da sie des tages wart geware, da hieß sie die kint off stan und ir gesellschafft, und saßen off und ritten so lang biß sie zu dem lac kamen.
Sentence: 1123    Da die jungfrauw von dem Lack die kint beyde gesah, da was sie ußermaßen fro und macht groß feste mit den kinden und prißte die jungfrauwen die irs bracht hett, und sprach das sie ir botschafft fast wol gethan hett.
Sentence: 1124    Lancelot was geritten jagen in den walt da syn neven zu dem lack kamen.
Sentence: 1125    Da er daheim kam, da was er der kind ußermaßen fro, und sin frauw sagt im das sie ir neven weren, und Lancelot glaubt es wol.
Sentence: 1126    Lancelot hett der jungherren gesellschafft ser lieb und was yn heimlicher dann allen den andern die in dem hofe waren; das enweiß ich nit obs von natur were oder von der kind selikeit, oder darumb das sie der frauwen nefen solten syn.
Sentence: 1127    Da was manig schon jungeling in dem hofe, und Lancelot enhett ander keyn heimlich zu dheynen dann zu yn zweyn alleyne, und der yn groß ere vor den andern allesampt.
Sentence: 1128    Sie aßen sampt, sie schliefen sampt.
Sentence: 1129    Alsus was Lancelot und beyde syn nefen mit großen freuden by der jungfrauwen lang in dem lac.
Sentence: 1130    - Hie laßen wir die rede beliben von Lancelot und sinen nefen und sprechen furbas wie Claudas mit sin winden thet die er gefangen hett.
Sentence: 1131    Uns sagt die hystoria alsus furbas:
Sentence: 1132    da Claudas die zwen winde gefangen hett fur die zwey kint, da ging er aldar da sin sun Dorin tot lag, und macht großen janier.
Sentence: 1133    So großen jamer kund er nicht gemachen als ubel im zu mut was, wann er nicht gewon was großen ruwen zu haben.
Sentence: 1134    Er was stolczes gemutes ye gewesen und achtet off ein clein ding nicht vil, wann nu was im das meyst leyt geschehen das im geschehen mocht; das enwas auch nicht unmuglich, wann er enhett nicht me kinde dann syn alleyn.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.