TITUS
Lancelot und Ginover I: Prosalancelot
Part No. 86
Previous part

Page: (180) 
Sentence: 1163    Vil lieber sun, diße dru ding hettent ir baß an uch dann keyn man der nu lebet.
Sentence: 1164    Sitther das die welt gestunt, so weiß ich wol das nye kein man so milt enwart noch als frölicher gesellschafft mit aller der welt als du wert, vil lieber sun myn.
Sentence: 1165    Ir wart vil fröer gebens dann keyn man nemens, und all uwer sorg was, den ir gebent, das sieß nicht ennemen woltent, wann uch ducht das ir allczyt zu wenig gebent.
Sentence: 1166    Owe leider, das wir nuͦ scheiden múßen!
Sentence: 1167    Ir warent so naturlichen stolcz, beyde libs und muͦtes, das ir uber alle die welt keinen man mynnen mochtent der zu hochwertig was und zu sere uberwens sines muͦtes.
Sentence: 1168    Wiedder schelck warent ir sere und wiedder verreter, also das ir sie mit den augen nit mochtent angesehen, und sprachen, vil liebes kint, das keyn gut man sin augen solt laßen sehen schalckheit oder keynerhand boßheyt.
Sentence: 1169    Durch beide uwer augen stanck die boßheit off uwer hercze, das hort ich uch sprechen, vil lieber sun, das ich ye kint hort gesprochen.
Sentence: 1170    Vil liebes kint, doch ich herticlich wiedder dich thete, du wert mir doch lieber dann mynselbs lip!
Sentence: 1171    Das was auch nicht mit all umb das ir myn kint warent, wann das ich uch so frumme sach und so gut in all wise; und das ich mich wiedder uch so fremd macht, das was darumb das ich nicht kund gesehen die großen miltikeit die in uwerm herczen was.
Sentence: 1172    Liebes myn kint, ich hett all myn alten sitten gewandelt durch dynen willen; ich enwart nye milte, das hettestu, liebes kint, wol gebessert, hett dich got laßen leben, mit diner großen miltikeit.
Sentence: 1173    Du wert wol gemacht mit aller gút und gar on alle boßheit als gelutert golt.
Sentence: 1174    Und als der rubin wert ist vor anderen gesteyn, als wert wert du vor andern rittern, mustestu mir noch ein kurcze wil han gelebet.
Sentence: 1175    Ich wen wol das dich gott nie so schön und so volkumen hett gemacht, wann das er dich von mir wolt scheiden, als ich dich allergernst sehe und allergernst by dir were, und das er mich vor leid sterben wolt thun.
Sentence: 1176    Ich weiß auch wol das ich lenger leben muß dann mir liep sy, wann den besten trost, den ich ummer men gewinne, den múßen mir fremd lút machen mit ir gút.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.