TITUS
Lancelot und Ginover I: Prosalancelot
Part No. 87
Previous part

Page: (182) 
Sentence: 1177    So ich auch ye me fremder lut, die guͦt sint, sampt siehe, so myn leit ye stercker und mere ist.
Sentence: 1178    Des libes mag ich nymer me gebessert werden, wann furwert ye erger ye erger.
Sentence: 1179    Min leit ist hut angegangen.
Sentence: 1180    Hut am morgen waren zwen stanthart in der werlt, daroff die werlt stunt.
Sentence: 1181    Nu ist der ein nyder gevallen.
Sentence: 1182    Were er stend bliben, er hett der welt so vil off sich geladen das der ander teyl cleyn solt sin gewesen.
Sentence: 1183    Schone liebes kint, dißer zweyer stanthart wert du eyner, und der konig Artus ist der ander.
Sentence: 1184    Soltestu han gelebet all din rechten leptag, du hettest der burden so vil off yn geworfen das er darunder must sin gevallen, er wolt oder enwolt.
Sentence: 1185    Er mag sich wol rúmen das yn huͦt die welt allesampt angestorben ist mit dem tot der myn liebes kint huͦt zurbrochen hatt.
Sentence: 1186    Wann nu keyn man wedder gott gestritten mag, darumb muß der man vertragen so er best mag alles das im gott düt; wann das er mir nuͦ gethan hatt, des enwil ich im númmer gedancken; und welch man mich tröstet als vil als mit einem wort, ich enwurd nymer me darnach sin frunt, wann ich númmer me dißen schaden uberwinden mag.« Alsus clagte Claudas syn suͦn fast lange und viel mange stunt off yn in onmacht, das alle die wonden die yn sahen das er zuhant off sym sun sterben solt, und erselb wundert sich sere das im das hercz in dem libe nicht brast.
Sentence: 1187    Er macht so großen jamer das er alle die erbarmet dieß horten, nochdann die yn nicht lieb hetten.
Sentence: 1188    Phariens und allen den rittern und allen den burgern die mit im waren wart geseyt das Claudas sin brieg gesant hett umb hilff und wolt groß here samelen, und als er sin lút gesamelt hett, so wolt er komen und die kint mit gewalt nemen und yn beiden ir lip thun nemen.
Sentence: 1189    Da ging Phariens zu rate mit synen luten was sie thun möchten, und wurden des in ein das sie Claudas solten bestan in sym sale und solten fuer anstoßen und yn verbrennen darinn, oder er múst yn beide kint in ir gewalt geben.
Sentence: 1190    »Wir han auch viel me lút dann der konig«, sprach Phariens, »wir han recht, und er hat unrecht; wir wollen helffen unsern rechten herren.
Sentence: 1191    Bliben wir dot, unser sele werdent behalten.
Sentence: 1192    Beschutten wir unser rechten herren, so spricht uns alle die welt wol.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.