TITUS
Lancelot und Ginover I: Prosalancelot
Part No. 88
Previous part

Page: (184) 
Sentence: 1193    Ich han dick hörn sagen das yglich man schuldig sy synem rechten herren zu helffen; und wo er synem rechten herren hilffet zu recht, blibet er da dot, er werd als wol behalten als ob er under den beiden dot belieb, die unsers herren fynt sint.« Da sich Phariens gewapent hett und alle syn gesellschafft, da gingen sie fur den pallast da Claudas inne was mit sim volcke und hett großen jamer ob sim sune.
Sentence: 1194    Phariens hett mit im wol drißigtusent gewapenter manne von rittern und von burgern und ir kinde, beide zu roß und zu fuß.
Sentence: 1195    Da sie vor den pallast kamen, da wart groß gerüff in dem here, und Claudas fragt was des geruffes were.
Sentence: 1196    Da saget man im das alle die ritter vom lande und die burger all von der statt gewapent weren vor dem pallast.
Sentence: 1197    Da hieß Claudas sin wapen bald reichen und wapente sich so er allererst mocht, und gurt ein edel schwert umb, synen schilt umb synen hals, und ein groß helenbarten in syn hant, und den stiel wol bewunden mit ysen.
Sentence: 1198    Er enkam auch nye in stryt, er hett ein helenbarten in syner hant, die er zu beyden henden zoch.
Sentence: 1199    Er hieß sich alle syn lút wapenen.
Sentence: 1200    Da er gewapent was und alle sin lute, da ging er in ein fenster stan und sah wo Phariens vor den andern allen gewapent hielt.
Sentence: 1201    Und Claudas rieff hernider zu im was er da mit meynte oder was er sucht mit den gewapeten luten allen.
Sentence: 1202    Phariens sprach, er wolt das er im heruß gebe des konig Bohortes zwey kint.
Sentence: 1203    »Herre Phariens«, sprach Claudas, »ir sint doch myn man, und alle die mit uch sint die sint beide, myn lút und myn man.« »Herre Claudas«, sprach Phariens, »wir sint herre nicht komen zu teydingen; wann ich wil über ein die kint haben, der ich lang gehut han.
Sentence: 1204    Dasselb heischent uch diße herren allsament die mit mir hie sint.
Sentence: 1205    Als wir die kint inne han, habent ir dann uff uns icht zu sprechen, macht uns tag, wir wollen gern dar komen und antworten uch als wir zu recht thun sollent!« Claudas was listig und gedacht in sym herczen das er im alda nicht mocht gestriten, und das er im zu letst die kint must wiedder geben.
Sentence: 1206    Nochdann gedacht er das er sie wolt wiedder geben so er allertragoste mocht, wann er kúne und starck was.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.