TITUS
Lancelot und Ginover I: Prosalancelot
Part No. 93
Previous part

Page: (194) 
Sentence: 1263    Ir hant ein unreyn hercz in uwerm libe, das uch der lieber ist der uch unere und schande thut dann der uch gut und ere thut.
Sentence: 1264    Welchem frummen man ein laster wirt gethan, er treyt es ummer in sim herczen biß ers gerichet mit synen eren.« »Schwig schiere!« sprach Phariens, »der man ist nit schuldig synen herren zu töten durch keynerhande missetat die er úmmer gethun mag.
Sentence: 1265    Sieht er synen herren in noten das er den lip must verliesen, er ist im schuldig zu helffen mit lib und mit guͦt; er sy dann vor von im gescheiden, das er im sin manschafft und das gut, das er von im hatt, off hab gegeben.
Sentence: 1266    So bin ich yn schuldig zu beschutten vom tode wo ich mag, und myn trúw zu behalten die ich im gegeben han.
Sentence: 1267    Mynes herren kint bin ich schuldig zu beschirmen allenthalben und zu behuten wo ich mag, wann ich irs vatter man was und ich lang mit yn gewest bin.« Da nam er Claudas heubt mit beyden henden und hub yn off von der erden.
Sentence: 1268    Und Claudas hett alles wol verstanden was Phariens gesprochen hett, und sprach als ein man der des todes angst hett:
Sentence: 1269    »Ay Phariens, durch got gnad, laßet mich nicht döten!
Sentence: 1270    Zu uwer selikeyt hant ir hut gesprochen etschlich rede, die ich hut gehort han.
Sentence: 1271    Seht hin myn schwert!
Sentence: 1272    Ich geh es uch off als eim dem getrúwesten man der in der welt lebett.
Sentence: 1273    Ich wil uch zuhant beyde kint in uwer gewalt geben.
Sentence: 1274    Ir solt auch wol wißen furwar:
Sentence: 1275    und hett ich uch und beyde kint zu Bohories, so enschehe uch nymmer argk von mynenthalben, ir habent von dißem tag úmmer me furbaß myn fruntschafft gewunnen mit der großen truw die ich hut an uch funden han!« Als schier als Claudas das gesprach, so enwart nye schlag furbas geschlagen, und ließen beydenthalben das stryten.
Sentence: 1276    Phariens gebott alle sym here das sie hinwiedderwert furen und nicht me anfechten noch enstritten, er wolt die kint allzuhant holen.
Sentence: 1277    Claudas ging in den pallast und Phariens mit im; er hieß bald die kint furbringen.
Sentence: 1278    Da er das wort volle gesprach, da viel er nyder fur Phariens in unmacht; er hett sere geblutet und was dotwunt.
Sentence: 1279    Phariens sprang zu im und ein gut teil syner ritter, die all wonden das er tot were, und daten im den helm von dem heubt und sprengten im kalt waßer under syn augen.
Sentence: 1280    Über ein lang wile kam er wiedder zu imselber von der onmecht und schampt sich hart sere das er vor allen den luten in onmacht was gevallen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.