TITUS
Lancelot und Ginover I: Prosalancelot
Part No. 134
Previous part

Page: (276) 
Sentence: 1886    Nu duncket mich, werdent sie erschlagen oder gefangen, das das von mynen schulden sy.« »Wie mocht das syn?« sprach Claudas, »das sint doch myn man allesampt und hant myn stat vor mir beschlossen!« »Das ist wol recht«, sprach Phariens, »wo man gewapent lút sieht komen fur ein stat, das man die stat beschließ und halt so lang biß man wol sicher sy ob sie wollen fried oder unfried; darumb han wir die stat beschlossen das wir nicht enwißen was lut ir warent.
Sentence: 1887    Wann wolt ir in die stat, so solt ir schwern darinn zu komen als ein getruwer herre und in gute, ich wil das gemachen das man uch die porten off sol thun, und solt mit gemach darinn faren und keren.« »Ich enwil nymer darinn komen«, sprach Claudas, »es sy dann mit irm großen schaden der die dainn sint.« »Herre«, sprach Phariens, »ich han die lut in myner hut, ich bitt uch, als mit recht der man synen herren bitten sol, das ir mich nit uneret, wann nemet die stat und die lút mit gnaden und mit fried off; hant sie wiedder uwern willen icht gethan, das rechent selb gnediclichen nach uwerselbs willen!« »Herzu«, sprach er, »gethun ich nymer gnad, sunder das ergst das ich darzu gethun mag.« Sin hohsten barune sprachen, und reche er synen son nicht an den von der stat und das laster das sie im gethan heten, er gewänne nymer men ere.
Sentence: 1888    Phariens trat furbaß und sprach:
Sentence: 1889    »Herre, ich bin uwer man, das ist ware, ich han wiedder uch gethan als ich zu recht thun solt, wann ir myn bedörfftet, ich wil uch uwer manschafft offgeben, das ich nye men gedete.
Sentence: 1890    Sehent hien, ich gebe sie uch off, wann mich duncket das ir myn nicht me endörffent noch mynes rates, darumb das uch duncket das ir unser gewaltig sint.
Sentence: 1891    Mich duncket wol auch, belieb ich wol uwer man, das ir doch furbas wenig soltent achten off myne früntschafft; ich wil faren in ein solche stat da man mir wol glauben sol und da man gern myne herbe boten sol.
Sentence: 1892    Nu ir herren«, sprach er, »die da sprechent das uwer herre syn ere verlorn habe, ob er sich nicht enreche von den die in der stat sint:
Sentence: 1893    nu wil ich sehen wie ir im helffen wolt sin leyt rechen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.