TITUS
Lancelot und Ginover I: Prosalancelot
Part No. 135
Previous part

Page: (278) 
Sentence: 1894    Ich wil auch wol das irs wißent das unser so viel dainn ist, das ir stryt gnung sollent han ee dann ir von uns scheident.
Sentence: 1895    Da von sy uch zu gach nit!
Sentence: 1896    Hant ir dheinen man under uch allen der sprechen getar das die von Gaune dheinerhand dinck wiedder ir herren hant gethan, darumb er sie vertriben sol oder döten, das wil ich alhie wiedderreden das des nicht ensy!« und bott des syn wette dem konig.
Sentence: 1897    Da was dheyn man so kúne der darwiedder spreche.
Sentence: 1898    Dann Claudas der was zornig und fragt Phariens ob er durch schelten dar were komen.
Sentence: 1899    »Ir sint myn man und wollent dann vechten mit mynen rittern von mynen dotschlagenden finden?« »Herre«, sprach Phariens, »uwer man enbin ich nicht, uwer dotschlagende fynd sint sie noch nicht.
Sentence: 1900    Wann hútent wol das sies icht werden!
Sentence: 1901    Der ir noch wol und detent myn bete und nement recht von yne und gebent friedel« »Ich wil nicht«, sprach Claudas, »das ir mich icht me darumb bittent.« »Herre«, sprach Phariens, »ich han uch uwer manschafft offgeben, ich wil auch das ir wißent das ir keynen argern fynt hant dann ich bin; wo ich uch geschaden mag an lib und an gut, das wil ich thun.
Sentence: 1902    Ich wil von uch ryten on urlub und one fruntschafft, wann also viel, das ich uch manen das ir uwer truw lösent die ir mir gabent, das ir in myne gefengniß soltent komen wann ich uch mante.
Sentence: 1903    Des manen ich uch das irs thúnt off uwer koniglich truwe.« Claudas sprach das er im nye keyn truwe gegebe.
Sentence: 1904    »Ich wil es zuhant off uweren lip bereden«, sprach Phariens, »sint ir so kúne das ir uch geturret weren.« »Herre Phariens«, sprach Claudas, »ir sint fast dorecht das ir mit mir fechten wollent vor allen mynen barunen.
Sentence: 1905    Ich wil also mit uch nicht fechten.
Sentence: 1906    Schluge ich uch alhie zu tode, des hette ich kleyn ere, wann ich manen uch das ir uwer truwe behaltene die ir mir gegeben hant.
Sentence: 1907    Uwer manschafft mögent ir mir nit offgegeben, es sy dann ob ich uch unrecht wolt thun und das uwern genoßen allen kunt sy.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.