TITUS
Lancelot und Ginover I: Prosalancelot
Part No. 136
Previous part

Page: (280) 
Sentence: 1908    Ich gedete uch nye keyn ding darumb irs mir zu redet mögent off gegeben.« »Herre Claudas«, sprach er, »were ich uwer man nit gewesen, ich hett zuhant off uch bezüget also von dißenselben dingen, wollent irs uchselben unschuldig haben, so das ir uch woltent han geweret wiedder mich, das ir wol bewarnt hant das ich uch uwer manschafft uffgebe; wann myne truw muß ich behalten wie sie uch geben.
Sentence: 1909    Wann ich manen uch der truwen die ir mir gabent, das ir die lösent, und wißent wol das ir dheynen argern fynt hant dann mich, waran es ye gehe.
Sentence: 1910    Ir enkument auch nymer vor Gaune, ir findent die dainne die uch mit gewalt daruß schlagent und uch dot schlagen, mögent sie uch verwaltigen; des hant sie sich allsampt wol beraten.
Sentence: 1911    Darumb sy uch nit zu gach, ir dörffent auch nymer me sanfft geschlafen wedder tag noch nacht als lang als ir hie ligent, ir sollent mere gnung Kreischen und sollent pavilune gnug sehen hauwen und brennen und lút schlagen und wunden!« »Wie«, sprach Claudas, »sol ich mich húten dann vor dir?« »ja ir werlich«, sprach Phariens, »als viel als ich mit dem schwert erreichen mag, da enspare ich uwer nit.
Sentence: 1912    Nochdann mögent ir me forchten als lang als Lambegus lebet, das er uch nymer gevehet, er schlag uch dot sicherlichen, mag er uch uberwinden.
Sentence: 1913    Und were Lambegus dot, nochdann lege uwer tode in myner hant.
Sentence: 1914    Ob ir den herren von Sant Zirren ye lieb gewunnent, so thunt syner selen icht gutes, der lip ist verlorn.
Sentence: 1915    Ee ich ummer eßsens enbiß, ich wil im syn heubt thun abschlagen mit eim schonen schwert und synen zweyn gesellen, und wil uch die heubt alle dru mit einem mangen herby thun werffen.« Er nam das roß mit den sporn und reyt off yens felt mitten, ferre von Claudas, und stapphet algemechlich geyn der stat.
Sentence: 1916    Da hurten die ritter nah im uß wol mit zwenczig mannen mit schilten und mit glenen off ir ahseln geworfen.
Sentence: 1917    Da sie Phariens komen sah, da reyt er noch gemechelicher, biß er fur die porten kam.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.