TITUS
Lancelot und Ginover I: Prosalancelot
Part No. 141
Previous part

Page: (290) 
Sentence: 1989    Wolt ir das thun, so wil ich uch mit gnaden laßen; wolt irs aber nit thun, so rytent dar da ir uch behaltent, ir solt es wol bedörffen und solt dick bestanden werden, oder ir mußent mir die stat offgeben!« Da die ritter das horten, sie waren beyde, fro und unfro.
Sentence: 1990    Fro umb das sie den fried mochten haben, unfro umb das sie den fried möchten haben und doch ir manne einen im músten geben; wann sie wol wusten, welch man im wurde, das er den dot múst kiesen.
Sentence: 1991    »Herre«, sprach Leonces von Paerne, »wir hant uwern willen wol gehört.
Sentence: 1992    Ir mögent uns den man heischen, das wirs gern thun.
Sentence: 1993    Sagent uns welchen man ir heischent!« »Das thun ich«, sprach er:
Sentence: 1994    »Lambegusen, Phariens nefen.« »In truwen herr«, sprach Leonces, »des mag nit syn; so wurden wir ungetrúw das wir uch zu töten geben einen den besten ritter und den besten bacheler der nu in dißem rich lebet.
Sentence: 1995    Ob gott wil, also gemachen wir nymer frieden, da wir untrúw mit thun und verretery.« »Wie«, sprach Claudas, »wolt ir herren allesampt uchselber laßen uneren und uwer stat umb eynes mannes willen?« »Es geschiecht nymer«, sprachen sie, »das wiern uch geben.« »Nu rytent hinweg!« sprach er, »von mir gewinnent ir nymer friede noch gnade.
Sentence: 1996    Ich manen uch«, sprach er, »als myn manne das ir mir myn dry ritter wiedder gebent die ir durch mynen willen gefangen hant, oder schwert mir off den heiligen das ir des konig Bohortes kinden nicht vernomen habent, ob sie tot sint oder noch lebent!« »Herre«, sprach Leonces, »von den kinden wißen wir nicht, ir gabent uns auch keynen gefangen, ir gabent sie Phariene; dem schwuren wir allesampt zu helffen, darwiedder enwollen wir nicht thun.« »Nu wißent das«, sprach Claudas, »das ir sie wiedder mußent geben, ir wollent oder enwollent, und enwurde uch darzu nymer wedder getrúw noch holt.
Sentence: 1997    Nu hutent uch also, und stirbet myner ritter keyner, ir mußent alle darumb sterben.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.