TITUS
Lancelot und Ginover I: Prosalancelot
Part No. 143
Previous part

Page: (294) 
Sentence: 2018    Rechte koniges stat, du macht wol zu recht Sante juliens herberge heißen und Aller Freuden Star, du bist wol geziert mit manigem ersamen burgere.
Sentence: 2019    Ay Lambegus, vil lieber nefe, wolt gott von hymel das ich were als ir sint, ich ritt werlich zu dem konig Claudas und erlößt diße edel statt und manigen getruwen man und manigen getruwen ritter und edeln die darinn sint!
Sentence: 2020    Und wst ich wol das ich darumb sterben solt, nochdann enwolt ich nicht laßen, ich wolt zu im ryten, um diße ersame stat zu erlösen und manigen ersamen man darzu.« Phariens schweig das er ein wort nicht ensprach, und begund fast jemerlich zu weynen.
Sentence: 2021    Lambegus begund syn mut zu wachsenne, und kam fur gesprungen und sprach zu sym oheim:
Sentence: 2022    »Herre«, sprach er, »nu enweynent nicht me!
Sentence: 2023    So mir die trúwe, ich uch schuldig bin und aller der welt und myme libe, von mir enwirt nymmer so gut statt verlorn und so manch edel ritter vertrieben, ich wil frölich mynen dot zu Claudas holen und wil zu im ryten so ich erst mag!« »Hey lieber neve, du hast mich betrogen; umb das ich es sprach enwil ich nicht das du sterbest, got enlaß mich dinen dott nymer geleben!
Sentence: 2024    Ich wil dirs nymer geraten, ob gott wil, wir mußen noch ein wil beyten und sehen was gnad uns got thú.
Sentence: 2025    Enwil uns got anders helffen nicht, so mußen wir zu yn gan off das felt und sie bestan.
Sentence: 2026    Darzu han wir zyt gnug, mag es nit beßer wesen.
Sentence: 2027    Herinn mag uns etschlicherhand abentur zukomen das wirs gemechelicher ab komen.« »Des dörffen wir alles nicht«, sprach Lambegus, »sither die stat mit mir erlößt mag werden.
Sentence: 2028    Darumb wirt nymer man gestochen noch geschlagen.« Phariens wart unfro, und was im so leit das er nah ußer synen synnen was komen.
Sentence: 2029    Er sprach zu synem nefen ob es syn ernst were das er zu Claudas faren wolt.
Sentence: 2030    »ja ich werlich, lieber öheim«, sprach er, »durch mynes libeswillen enwúrt nymer gut stat verlorn noch als manig hoh man vertrieben als herzu höret.
Sentence: 2031    Ich hort uch selber sprechen mit uwerm munde:
Sentence: 2032    ob ir wert als ich, ir woltent sicherlich sterben, umb die stat zu erlösen und also manigen edeln man als darzu höret.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.