TITUS
Lancelot und Ginover I: Prosalancelot
Part No. 146
Previous part

Page: (300) 
Sentence: 2060    Phatiens und alle die innen der stat waren machten großen jamer.
Sentence: 2061    Die statt wart vol geschreys und jamers.
Sentence: 2062    Lambegus kam zu Claudas pavilune geritten.
Sentence: 2063    Er stund von synem roß und sah, wo Claudas gewapent saß und gedacht das Lambegus gewapent solt komen.
Sentence: 2064    Er der by sich stan gewapent ritter, umb das er nicht wol sicher was von Lambeguse.
Sentence: 2065    Die dry gefangen hetten im gesagt das er gewapent solt komen, sie wústen nit warumb.
Sentence: 2066    Lambegus kam fur Claudas.
Sentence: 2067    Er stunt offrecht vor im und sprach ein wort nicht.
Sentence: 2068    Er raufft syn schwert und wüschet es mit synem geren.
Sentence: 2069    Er süffczt sere und warff es fure off ghene erden.
Sentence: 2070    Er der synen helm abe und warff yn nyder by das swert, also dete er synen schilt.
Sentence: 2071    Claudas nam syn schwert in syne hant und deth als er Lambegusen da mit in den hals wolt schlagen.
Sentence: 2072    Des erferten sich alle dieß sahen, und begunden zu weynen die im vor als fynt waren das sie syn hercz wolten han gessen.
Sentence: 2073    Lambegus werte sich nichts nit, er stund stille.
Sentence: 2074    Claudas hiß im den halßberg uß ziehen und die hosen snelliclichen.
Sentence: 2075    Das wart zuhant gethan.
Sentence: 2076    Da er entwapent wart, er bleib stende in einem pfellornne rockelin kurcz und was ein ußermaßen schön ritter und wol geschaffen uber all syn gelieder; er enhett nit bartes.
Sentence: 2077    Er stund alles und gesah nye an Claudas, er hett allwege die recht hant gefustet.
Sentence: 2078    »Lambegus«, sprach Claudas, »wie wert du so kúne das du herre fúr mich getorstest komen?
Sentence: 2079    Du weyst doch wol das ich dich mere haßen dann alle die lebent.« »Nu mögent ir wol sehen«, sprach Lambegus, »das ich uch wenig forcht.« »Sieh hie, din dot lyt in myner hant, und stest nochdann und redest stolczeclich!« »Das meynet das ich uch wenig forcht«, sprach Lambegus.
Sentence: 2080    »Wenent ir dann das ich also gut sy oder das mich uwer so sere erbarme?« »Ich weiß wol«, sprach er, »das du schalckhafftiger bist dann alle die lebent.
Sentence: 2081    Du bist beyd, böse und ein zage«, sprach Lambegus, »und wurdest nymer so kune, als lang als du din leben hast lieb, das du mich dot schlagest.« »Warumb«, sprach Claudas, »woltestu mich nicht dot schlagen, ob du myn also geweltig werest als ich din bin?« »Hey leider, wie möcht ich din gewaltig werden!

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.