TITUS
Lancelot und Ginover I: Prosalancelot
Part No. 148
Previous part

Page: (304) 
Sentence: 2099    Und wißent das furware das ich nyrgen zwen ritter erkenne die nu sirit, der geselschafft ich als gern hett als uwer zweyer.
Sentence: 2100    Get herre naher und nement uwer manschafft wiedder; und alles das gut das ir von mir hettent zu lehen das wil ich uch beßern von iar zu jare!« Phariens was ein synnig man und wise; er sprach, er wolt es gern thun.
Sentence: 2101    »Ir hant mir hut so vil liebes gethan das ich wol zu recht sol thun alles das uch lieb ist.
Sentence: 2102    Ich wils uch ummer gnaden das ir mym nefen den lip hant gelaßen.
Sentence: 2103    Ir sint gewerlich ein der byderbste man der in der welt lebet.
Sentence: 2104    Ich wil uch úmmer gern dienen umb die ere die ir mir hut gethan hant.
Sentence: 2105    Herre«, sprach er, »ir wöllet das ich uwer man werde:
Sentence: 2106    ich wil es gern thun wann ichs gethun mag.
Sentence: 2107    Ich han geschworn off den heiligen das ich dheyns irdischen menschen man enwerd ee dann ich freisch mere von des konig Bohorts zweyn kinden, die myn recht herren sint.« »Nu hant ir gesprochen«, sprach Claudas, »das ir woltent thun was mir lieb ist.
Sentence: 2108    Nu wil ich das ir das gut wiedder nement das ir von mir zu lehen hant, on manschafft zu thun.
Sentence: 2109    Farent hinweg und suchent die kint!
Sentence: 2110    Wolt ir, ich geben uch lút genug die mit uch farn, und bringent die kint herre oder anderswar dar ir wollent.
Sentence: 2111    Ich wil uch ir lant geben, das irs gewaltig sint biß das die kint wapen mögen getragen.
Sentence: 2112    So wil ich das sie ir lant von mir enpfahen und werden myn man, und wil auch das ir myn man werdent, wann ir die kint funden hant.« »Herre«, sprach Phariens, »als ir gesprochen hant das keine mir licht nit recht, wann solch abentur möcht mir in kurczen ziten zu handen gan, das ich in uwerm land must missethun ec dann ichs uch enbieten mocht; so her ich mich wiedder got verwirckt und wiedder die welt.
Sentence: 2113    Ich wil uch sagen was ich thun wil:
Sentence: 2114    ich wil uch das mit myner truw geloben und mit myner ritterschafft, werden die kint funden oder nit, das ich nymant keyn manschafft thun, ir solt es zu allererst wißen, ob ir lebent.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.