TITUS
Lancelot und Ginover I: Prosalancelot
Part No. 149
Previous part

Page: (306) 
Sentence: 2115    Hie mit mag uch wol benúgen.« »Ich weiß wol«, sprach Claudas, »warumb ir zwen myn man nicht wollent werden:
Sentence: 2116    ir hant mir vorwilen gesaget das ir mich nye lieb gewunnent.« »Werlich«, sprach Phariens, »sprach ich das, so sprach ich ware vor dißern tag; hut hant ir mir,me lieb gethan und me dienstes dann ich uch mit myme ie liebes oder dienstes getete.
Sentence: 2117    Darumb ist wol recht das ich die fyntschafft zu mynnen kere.
Sentence: 2118    Anders enkan ich uch nicht geloben.
Sentence: 2119    Ir hant auch wol verstanden wo by das ist, ir mögent wol sicherlichen faren war ir wolt, vor mir noch vor myme nefen dörffent ir dheyn hut haben darumb das wir uch úmmer leyt gethun, wir enlaßens uch zu allererst wißen mit eim botten oder mit unsselber.
Sentence: 2120    Wir wollen hinweg ryten mit uwerm urlob.« Da Claudas hort das er sie nit lenger behalten enkunde, er gab yn urlob off solche rede als sie gesprochen hetten.
Sentence: 2121    Lambegus wapete sich wiedder und saß off syn roß.
Sentence: 2122    Da er off geseßen was, da hieß im Claudas ein glene reichen, die ein scharpff ysen hett wol schnidende, der schafft was groß und starck.
Sentence: 2123    Das dethe er umb das das Lambegus keyne mit im dar bracht hett.
Sentence: 2124    Phariens und sin nefe schieden von des konigs pavilune.
Sentence: 2125    Sie kamen wieder in die stat und namen urlob zu allen den die da waren.
Sentence: 2126    Phariens furt mit im sin wip und sin kint.
Sentence: 2127    Also wart der fried gemacht zwuschen Claudas und synen lúten und den barunen von der statt und von dem land.
Sentence: 2128    - Nu mußen wir diße rede laßen von Claudas und von den barunen von Gaune und sprechen ein wil furbas von Phariene und von des konig Bohortes zweyn kinden, die mit der frauwen sint von dem Lack.
Sentence: 2129    Phatiens und syn gesellschafft bereyten sich und ritten hinweg zu dem lack.
Sentence: 2130    Der knapp der mit Lambegus komen was der geleite sie aldar zu dem lacke, und waren der frauwen gar wilkum.
Sentence: 2131    Bohort was michel fröwer sins meysters kunfft dann Lyonel des synen.
Sentence: 2132    Er hett sere gezürnet gegen sinem meister darumb das er so lang entwelt hett.
Sentence: 2133    Er hett auch die jungfrauwen so lieb das er off nymants fruntschafft nicht enacht dann off die ire.
Sentence: 2134    Das was dieselb jungfrauw die durch synen willen gewunt was.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.