TITUS
Lancelot und Ginover I: Prosalancelot
Part No. 151
Previous part

Page: (310) 
Sentence: 2147    ir mochtet licht wenen das ich es umb schmeichen spreche.« Der knappe begunde Lyonel sagen was Phariens und Lambegus mit den wapen gethan hetten und wie sie gestritten hetten wiedder Claudasen, und wie sich Lambegus hett gegeben zu döten umb fried zu machen den luten und der stat von Gaune, und wie das Claudas gebetten her Pharienen und synen nefen das sie syn man weren worden, und wie sies nicht wolten thun.
Sentence: 2148    So vil sprach der knappe gutes von yn zweyn das sie die frauw von dem Lack zu wunder besah.
Sentence: 2149    Uber ein kurcze wil darnach kam Lancelot ußer dem wald von dem gejegs und was Phariens sere fro und Lambegus, wann sie syner gesellen meister waren.
Sentence: 2150    Er sagt yn zuhant wie das Lyonel geweint hett und wie das er zu im gesprochen hett.
Sentence: 2151    Er sagt im auch wie das Leonces von Paerne wönde das es were des konig Banes sun von Bonewig.
Sentence: 2152    Phariens begunde hemach zu gedencken und saß alle die nacht und prüfete Lancelotes geberde und syn thete; er prüfete syn gan, syn stan, syn sprechen, das man wol hören mocht, so herlich sprach er, und ducht yn das er nye so herlich kint enhett gesehen.
Sentence: 2153    Die dry nefen waren so lang sampt das Phariens starb, und die in dem lack waren machten großen jamer und groß unfreud, wann sie wol wústen das er byderbe und getruw was.
Sentence: 2154    Sin wip bleib mit der frauwen vom Lack, so das sie nye von ir geschied und zwey kint, die beyde sitherre ritter wurden von Lyonels hant; der ein was genant Auguins, der ander hieß Taranis, sie waren beide byderbe ritter und stolcz.
Sentence: 2155    - Nu múßen wir ein wil von yn schwigen und von den dryen nefen und sprechen ein wil von den zweyn koniginnen die sampt sint zu Múnster Roal.
Sentence: 2156    Das spricht das buch das die zwo koniginne waren so lang zum Koniglichen Mónster das sie beide krangk waren und sere zubrochen von fasten und von weynen nacht und tag und von schweren gedencken.
Sentence: 2157    Die koniginn von Gaune hett wol gehört sagen das Claudas ir kirit gefangen hett, und wie sie ein jungfrauw mit ir behendikeit dannen gefurt hett.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.