TITUS
Lancelot und Ginover I: Prosalancelot
Part No. 153
Previous part

Page: (314) 
Sentence: 2180    In dem baumgarten stunden schöne huß und riliche, daruß sah sie gan dru vil schöne kint.
Sentence: 2181    Darnach kamen dru, die mochten wol herren wesen uber die anderen allesampt, des ducht sie wol das ein von den dryn was vil mere und viel schöner dann die andern zwey, und ging zwuschen den andern zweyn.
Sentence: 2182    By den zweyn gingen zwen man die ir huten.
Sentence: 2183    Sie besah sie wol und bekant Pharien und Lambegusen, das sieß waren; zu den zyten lebte Phariens.
Sentence: 2184    Sie gedacht wol das es ir zwey kint weren, wann des dritten bekante sie nicht, wann es vil mere was dann die zwey.
Sentence: 2185    Da kam ein man und nam sie mit der hant und leit sie zu irm closter wert.
Sentence: 2186    Sie bekant sin nicht und wart zornig und unfro, umb das sie werlich nit wúst wer die dru kint weren, Ir was recht als sie geschlafen hett und ir alsus getreumet hett.
Sentence: 2187    Sie kam zu irselber und wond geschlafen han.
Sentence: 2188    Ir wart we von dem zorn den sie ducht das sie gehabt hett.
Sentence: 2189    Sie besah ir rechten hant und fand dry namen darinn geschriben:
Sentence: 2190    Lancelot, Lyonel und Bohort.
Sentence: 2191    Sie wart wunderlichen fro und begund sere zu weynen von freuden.
Sentence: 2192    Sie sant zuhant nach ir schwester und sagt ir was sie gesehen hett.
Sentence: 2193    »Werlich liebe schwester,« sprach sie, »mich ducht, ich weiß wedder mirs treumet oder ich es sah, wie din kint das allerschönst kint were das ich mit mynen augen ye gesah.« Die koniginn von Bonewig was ußermaßen fro.
Sentence: 2194    »Viel liebe schwester«, sprach die koniginn von Gaune, »nu weiß ich wol das unser herre got nicht wil das ich in dißer welt icht lenger lebe.
Sentence: 2195    Er hatt mir gegeben alles das ich ye und ye begerte, ich befilhe im hut mynen geist.« Sie deth ir bicht also siczende off yrm bette; uber ein kurcze -,vil darnach verschied sie.
Sentence: 2196    Sie wart mit großen eren bestatt, als man zu recht sol thun einr koniginn.
Sentence: 2197    Die koniginne von Bonewig macht großen jamer umb ir schwester und bleib manigen tag darnach zu dem Koniglichen Münster und was ein heilige frauw und dienet gott flißiclichen.
Sentence: 2198    Sie was fro umb das sie vernomen hett das ir sun noch lebete, und die historia saget uns das sie yn sitther lebendig sah und wol farnde.
Sentence: 2199    - Nu laßen wir die rede alhie und sprechen furbas von dem konig Artus von Brytanien.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.