TITUS
Lancelot und Ginover I: Prosalancelot
Part No. 162
Previous part

Page: (332) 
Sentence: 2341    ich wolts gern bescheiden syn.« »Ich wil es uch bescheiden«, sprach die frauwe, »als ferre als ich darumb weiß, und verstent es vil recht, so das es uch ummer me gedenck.
Sentence: 2342    Als ir mich gehort, so bedenckent uch wol ee ir dhein dingk ane get, das es uch so schwere sy das irs mit großen eren nicht vollebringen mögent!
Sentence: 2343    Es enist nit ein kleyn ding ritterschafft.
Sentence: 2344    Es wart nit zum ersten umb ein spotsach off geleyt, noch darumb enwas ritterschafft nit offgeleyt von erst, noch gemacht.
Sentence: 2345    Sie wart gemacht und offgeleit also das nymant ritter solt werden dann edellút und von hohem geschlecht.
Sentence: 2346    Wir hetten allesampt einen vatter und ein muͦtter von allererste wann da nyt und haß begund zu wahsen und gewalt begund vor das recht zu gan, zu den zyten waren alle lút glich herre und glich edel.
Sentence: 2347    Da da kranck lút nicht kunden genesen vor den starcken, da marhten sie under yn das man den krancken und den armen solt geben riechtere und schirmer, die sie zu recht solten halten vor allen den, die yn gewalt deren, und solten sie irs unrechten wieddertriben und hinderwert stoßen.
Sentence: 2348    Zu dißem geriecht wurden diße gesaczt die das gemeyn volck vil erkentlich darzu erkurn mit gemeynem radt und die sie wönden das yn recht darzu keme.
Sentence: 2349    Das waren alle die stercksten und die meysten und die schönsten und die könsten und die getruwesten, diß waren alles die die byderbsten waren mit dem libe und mit dem herczen.
Sentence: 2350    Nu wißent das wol«, sprach sie, »das man die ritterschafft vergebens nit engab noch spötlich; man leyt yn ein schwere burden off den hals, ee dann sie ritter werden.
Sentence: 2351    Ich wil uch sagen was das was da sich die ordenung von der ritterschafft von allererst an hub:
Sentence: 2352    der willen hett ritter zu werden und darzu erkorn was von aller der gemeynde das er ritter solt werden, der must wesen hubsch on dorperkeyt und gut on schalckeyt, barmherczig syn uber die armen und milte wiedder die durstigen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.