TITUS
Lancelot und Ginover I: Prosalancelot
Part No. 163
Previous part

Page: (334) 
Sentence: 2353    Er must allwegen gereyt syn die reuber und die morder zu unern und von dem weg zu thund; gerecht ritter one fruntschafft und one haß, mit frúntschafft nymant zu helffen wied- der recht, durch haß nymand syn recht zu nemen.
Sentence: 2354    Ein ritter sol zu recht durch des todes forcht dheynerley ding thun das im ymant zu schand möge verwißen oder zu boßheit.
Sentence: 2355    Er sol me schand forchten dann den dot.
Sentence: 2356    Ritterschafft wart gemacht betalliclichen umb die heiligen kirchen zu beschutten und zu beschirmen und darzu zu helffen mit libe und mit gut, wann sie sich nit gerechen mag mit arg, noch mit schwerten fechten mag noch mit wapen.
Sentence: 2357    Der ritter ist darzu gemacht das er den beschirme der den lincken backen bütet als er an den rechten geslagen wurt.
Sentence: 2358    Nu wißent das«, sprach sie, »das nye dheyn man uff pfert gesaß ee dann ritterschafft funden wart, das saget uns die schrifft, wann die ritter zu allererst begunden ryten; da von sint sie ritter geheißen.
Sentence: 2359    Und die wapen die er treyt sol zu recht keyn man tragen, er sy dann ritter zum ersten; sie wurden yn umb unbiederbekeit zu allererst nit gegeben zu tragen, da lyt groß bezeichung ane.
Sentence: 2360    Das er den schilt furt umb synen hals zwúschen im und syns wiedderwarten schlag, das bezeichent das der ritter zwuschen der heiligen kirchen muß syn und zwuschen den die ir unrecht thun wollen.
Sentence: 2361    Glich als der schilt ist wiedder den schlag und wiedder den stich, also muß er wesen wiedder die heilige kirche, das sie ir fynd nicht zurstörn noch das ir nemen, es syn reuber oder ungleubig lut.
Sentence: 2362    Sol die heilig kirch bestanden syn mit abenturen, so das sie geschlagen sol werden oder affter gestoßen, darfur sol sich der ritter werffen als zu recht ein getrúw kint sol fur syn mutter, und sol den slag enpfahen.
Sentence: 2363    Es ist auch wol recht das man ir vertrag durch irs suns willen, ist er byderb und gut.
Sentence: 2364    Wirt auch die mutter geschlagen vor ir kindes augen oder ubel gehandelt, und hilfft ir das kint nit, so ist es wol recht das sie ir thúr beschließ vor im und geh im irs brotes nicht.
Sentence: 2365    Der halßberg, da der ritter mit gewapent ist und yn allenthalben behutet vor schlegen und vor stichen, bezeichent das die heilig kirch in des ritters schirm sol syn und in syner hilff und da mit umb und umb beschlossen sol syn.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.