TITUS
Lancelot und Ginover I: Prosalancelot
Part No. 168
Previous part

Page: (344) 
Sentence: 2430    Bekentet ir auch uwers vatters geslecht und uwer mutter, ir dörfftent wenig daran zwyveln, ir wurdent ein gut man.
Sentence: 2431    Von so hohem geslecht als ir sint enmag nymer böse man werden.
Sentence: 2432    Ich wil uch hinnen ab nit me werden zu wißen.
Sentence: 2433    Ir solt schier ritter werden von des besten mannes hant der in der werlt lebet, das ist der konig Artus.
Sentence: 2434    Wir mußen uns in dißer wochen die angegangen ist darwert bereyten, so das wir dar komen des nehsten fritages vor Sant johans meße.
Sentence: 2435    Wir hant von sunnentag nit wann sieben tag dar.
Sentence: 2436    Ich wil das ir an Sant johans tag ritter werden.
Sentence: 2437    Und got, der von der magt Sancta Maria geborn wart durch syn volck zu erlösen, und also gewerlich als Sant johans verdienst mit syner arbeit den höhsten lone den ye keyn heilig verdienst:
Sentence: 2438    also gewerlich muß gott geben das ir die gnad mußent gewinnen und die gabe, synenthalben alle die ritter zu uberhöhenne die nu leben, mit hoher ritterschafft und mit hubscheit und mit allerhand gut.
Sentence: 2439    Ich wil uch sagen ein teil wie ir diß gewinnen solt.« Alsus hat die frauw Lancelot gelobet das er schier ritter werden sol.
Sentence: 2440    Er was des so fro das er nicht fröer mocht wesen.
Sentence: 2441    »Nu hutent uch«, sprach sie, »das es nymant gefreisch, ich sol uch alles das gewinnen das ir darzu haben solt!« Sie hett vor menigem jar gewunnen alles das ein ritter haben solt zu rechte:
Sentence: 2442    einen halßberg wiß und liecht und starck, eynen helm wiß ubersilbert, ein schilt wiß als ein schne mit silberin rincken, darumb das sie wolt das nichts daran enwere, es wer alles wiß.
Sentence: 2443    Ein schwert, das dick versucht was, hett sie im gereit, und wart sither manige stunt versucht, sitherre es syn wart; es was groß und licht.
Sentence: 2444    Syn glene was wiß, der schafft was kurcz und groß und starck, das ysen was wiß und sere schnidende und starck und scharpff.
Sentence: 2445    Sie hett im ein roß bereit, das was wiß, es was groß und starck, bekerig und sere lauffende, es was licht und von großen sprungen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.