TITUS
Lancelot und Ginover I: Prosalancelot
Part No. 178
Previous part

Page: (364) 
Sentence: 2601    Er ist ein sere schon kint und glicht wol eim edelmanne, ich wen wol das er von fast hohem geschlächt ist geborn.« »Wer ist der knapp?« sprach die konigin.
Sentence: 2602    »Werlich frauw«, sprach myn herre Ywan, »er ist ein der schönst knappe den ir ye mit uwern augen gesahett«, und saget ir wie yn die hochfertigiste frauwe dar bracht her die er ye gesehe.
Sentence: 2603    »Wie«, sprach die koniginn, »kam er nechten erst zu hofe und wil morn ritter werden?« »ja er, frauw«, sprach er, »mich duncket das er anders nicht beger.« »Ich wolt sere gerne den knappen sehen«, sprach die koniginn.
Sentence: 2604    »So gesahet ir nye dheynen so schönen noch so wol gemachten«, sprach der konig.
Sentence: 2605    »Herre Ywan«, sprach er, »geet nach im und thút yne gute cleyder anthun und heißent yn das er sich wol ziere ich wen das er gnung darzu habe -, und bringent mirn ersame zu hofe!« Er sagt der koniginne selb wie des knappen frauw zu im komen were und yn bete das ern mit keinen andern wapen ritter mechte dann mit sinselbs, die erselbe dar bracht hett, und mit synen cleydern, und wie sie sich genant hett die frauw von dem Lack.
Sentence: 2606    Des wundert die kóniginne sere, und belanget sie wann sie den knappen solt sehen.
Sentence: 2607    Myn herre Ywan ging zu dem knappen und hieß yn sich bereyten so er allerschönst mocht:
Sentence: 2608    »Der konig hatt uch enbotten das ir zu hofe kument!« Er bereyt sich so das nicht an im zu verbeßern was, er saß off syn roß, das groß und starck was, und reyt mit mym herren Ywan.
Sentence: 2609    Die straßen waren all vol volckes, umb den knappen zu besehen, und was mere uber die stat das der schön knappe des nehsten tages ritter wolt werden und das er mit synen rittercleydern zu hof fúre.
Sentence: 2610    Da lieffen burger und frauwen zu den fenstern und sprachen das sie nye so schönen knappen gesehen hetten.
Sentence: 2611    Da sie fur den sal kamen, er stunt von sym roß.
Sentence: 2612    Die mere brachen uß allenthalben in dem hofe das der schön knapp zu hofe keine.
Sentence: 2613    Ritter und knappen, frauwen und jungfrauwen lieffent allesampt uß; der konig und die koniginne lieffen allesampt uß gegen im.
Sentence: 2614    Min herre Ywan nam den knappen mit der hant und leyte yn off den sale.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.