TITUS
Lancelot und Ginover I: Prosalancelot
Part No. 181
Previous part

Page: (370) 
Sentence: 2649    »Darumb«, sprach der ritter, »das ich nymand so kune finde der mirs uß gethúr ziehen.« »Warumb durch gott?« sprach der knapp; »wolt irs gedulden, ich zieh es uch uß, es sy dann das es so fast stecke das ich es nit uß bringen möge.« »Ich wolt wol«, sprach der ritter, »das yrs yczunt uß hettent gezogen als ir zu recht solt.« »Welch ist das recht?« sprach der knappe.
Sentence: 2650    »Das ist das recht«, sprach myn herre Ywan, »also als es der ritter eyschet; zwenczig ritter mochtens zu end nicht bringen.« Er sagt im von end uncz zu ende was daroff gesaczt were.
Sentence: 2651    Der knapp begund sich zu bedencken.
Sentence: 2652    Myn herre Ywan nam den knappen mit der hant und sprach das er mit im ging.
Sentence: 2653    »Ich wil nit«, sprach er, »das ir umb so hohe sach gedenckent.« »Warumb?« sprach der knappe.
Sentence: 2654    »Darumb«, sprach myn herre Ywan, »das in dißem huse die besten ritter sint von der welt, die sich daran nit enkerent; und ir ensint noch nit ritter und wollent darumb gedencken?« Da sprach der gewunt ritter:
Sentence: 2655    »Enist er noch nit ritter?« »Neyn er noch«, sprach myn herre Ywan, »er sol aber morn fru ritter werden; er hatt yczunt die cleyder an, das mögent ir wol sehen.« Da der knapp hort das er ritter nicht enwas, er sprach ein wort nit me, wann also vil das er urlob nam zu dem ritter und bevalh yn gott.
Sentence: 2656    Und der siech ritter sprach das yn gott gut múst machen.
Sentence: 2657    Myn herre Ywan leyte yn in den sal da die tafeln waren gesaczt; man ging eßsen.
Sentence: 2658    Nach eßsen nam myn herre Ywan synen knappen und furte yn in syn herberg.
Sentence: 2659    Des abendes zwuschen tag und nacht leyt er yn in eyn kirchen, da er alle die nacht wachet biß an den tag und sprach sin gebete.
Sentence: 2660    Myn herre Ywan was alle die nacht mit im.
Sentence: 2661    Des morgens da es tag wart da leyte er yn wiedder in syn herberg und dete yn slafen biß hohe meßzyt.
Sentence: 2662    Er hieß yn off stan und geleyte yn mit dem konig zu der kirchen da er messe solt boten.
Sentence: 2663    Alweg zu hochgezitt hort der konig hochmesse zu dem thum von der Star wo er was.
Sentence: 2664    So fúrte man dann zu dem mönster aller der wapen die des tags ritter wolten werden, und musten sich wapen in dem múnster, und da gab yn der konig den halßslag.
Sentence: 2665    Wann das schwert gurt er yn nit umb e nach messe, so sie ußer dem múnster kamen.
Sentence: 2666    Zuhant da die messe wart gesungen, myns herren Ywans geselle saß off syn roß und reyt von mym herren Ywan so er allerbaldest mocht zu dem ritter der da gewunt was.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.